Text copied!
CopyCompare
Bibeli Luayãtaalá - Zelemii

Zelemii 3

Help us?
Click on verse(s) to share them!
1Tó gbɛ̃e gì a nai, ↄ̃ à gɛ̀ zãkɛ̀ gupãlei, a fↄ̃ ɛa nↄpi kũ lↄe? Aà kũa a bùsupi gbãlɛ dúuduuɛ. Ápiↄ sↄ̃ a gbãsĩkɛ̀ ń gↄ̃ↄ dasi, ↄ̃ a ɛa lɛ́ sua saa? Ma Dii mámɛ málɛ á la.
2À wɛzu à sĩ̀sĩ wáiwaiↄ gwae, gu kpele wi á dã̀akpauo ni? Iↄ zↄ̃lɛ zɛ́ saɛ àↄ gↄ̃ↄ dã́ lán Laalubue zↄ̃lɛa guwaiwaiuwa.
3A yã́i tò ma gi lou maɛ́, káabuana i kɛɛ́o. Ń beeo á wɛ́ dɛ lán káalua wɛ́waɛ, wí lí á kũo.
4A lɛzùmazi tia a mɛ̀: Wá Mae, wá ɛ̀waasogↄↄ gbɛ̃na,
5n pↄ aↄ paawázi e bↄɛ ni? Ńyↄ̃ↄ wá kpɛ̃nɛ kũa gↄↄpii yã̀? Màa i omɛɛ, ↄ̃ iↄ yãvãikɛ á pↄeãwa.
6Kí Yosia kpalablegↄↄ Dii òmɛɛ: N Isaili pↄ̀ↄbↄzãkɛnapiↄ yãkɛa èa? Aa gɛ̀ gbãsĩkɛ̀ sĩ̀sĩ lɛsĩ píi musu ń lí yɛ̀lɛlɛↄ píi gbáuo.
7Málɛ e yã́ beeↄ kɛa gbɛa píi aa suaɛ, kási aai suao. Ɔ̃ an gbɛ̃́ Yuda náaisaideↄ ń yãkɛapiↄ è.
8Ma gínzila kpà Isaili pↄ̀ↄbↄzãkɛnapiↄwa, ma ń yá gbãsĩ pↄ́ aa kɛ̀ↄ yã́i. Kási vĩa i ń gbɛ̃́ Yuda náaisaidepiↄ kũo, ↄ̃ aa gɛ̀ gbãsĩkɛ̀ sↄ̃.
9Káaluakaa i kɛ Isailiↄnɛ yãe ũo, ↄ̃ aa ń bùsu gbãlɛ̀, aa gbãsĩkɛ̀ gbɛↄ ń líↄ yã́ musu.
10Gia ń beeo píi an gbɛ̃́ Yuda náaisaidepiↄ i sua ń nↄ̀sɛmɛndooo, sema mↄafili. Ma Dii mámɛ má ò.
11Ɔ̃ Dii òmɛɛ: Isaili pↄ̀ↄbↄzãkɛnapiↄ yã́ maa dɛ Yuda náaisaidepiↄla.
12Gɛ ǹ kpàwakɛ gugbãntoo oi ǹ mɛ: Ma Dii ma mɛ̀, à sua Isaili pↄ̀ↄbↄzãkɛnaↄ! Má fɛ̃́ázi lↄo, asa má gbɛ̃kɛ vĩ, ma pↄ aↄ paaázi gↄↄpiio. Ma Dii mámɛ má ò.
13À we á tàaei lé! Asa a bↄ ma Dii á Lua kpɛɛ, a táa'ò dii zĩ̀loↄwa lí yɛ̀lɛlɛↄ píi gbáu, i swã́sɛ ma yã́io. Ma Dii mámɛ má ò.
14Ma Dii ma mɛ̀, gbɛ̃nazĩn pↄ̀ↄbↄzãkɛnaↄ, à sua, asa á zã́n ma ũ. Má á sɛ́ wɛ̃́lɛ ń wɛ̃́lɛo dodo, bui ń buio plapla, mí suánↄ Siↄna.
15Dã̀na pↄ́ an nↄ̀sɛ muaamanↄↄ ↄ̃ má ń dilɛ aa dↄaaɛ́ ń dↄ̃ao ń laaio.
16Ma Dii ma mɛ̀, gↄↄ bee tó a kↄ̃ a dasikũ̀ á bùsuu, wa ma bàakuaánↄ kpagolo yã'o lↄo, a làasoo a gɛ̃ an sↄ̃ guuo. A ni aↄ kúmáo, mɛ́ wa a pãle kɛo.
17Zĩbeezĩ wa o Yelusalɛũɛ, Dii kpalabaa. Bui píi a si Yelusalɛũu ma tↄbↄa yã́i. An nↄ̀sɛvãi swã́gbãa yã́ a dↄaanɛ́ lↄo.
18Gↄↄ bee Yudaↄ na Isailiↄwa, aa bↄ gugbãntoo oi bùsuu sãnu, aai su bùsu pↄ́ má kpà ń deziↄwau.

19Mámɛ má ò. Má ye mà á sí ma nɛ́ↄ ũɛ, mí pↄeã bùsu kpáwá, bùsu pↄ́ a kɛfɛnkɛ dɛ buipãleↄ pↄ́a. Málɛ e áli ma sísi á Mae ũɛ, mɛ́ á we ma to weo,
20ãma á Isailiↄ a bↄ ma kpɛ, lán nↄɛ pↄ́ a zã́ tò à gɛ̀ gbãsĩkɛ̀wa. Ma Dii mámɛ má ò.
21Wii ma dↄ sĩ̀sĩ wáiwai musu, Isailiↄ lɛ́ ↄ́ↄlↄ, aalɛ awakpa, asa aa pã̀zɛaɛ, ma Dii ń Lua ma yã́ sã̀ńguɛ.
22À ɛa sua, pↄ̀ↄbↄzãkɛnaↄ, mí á gbã́gbã ń á pↄ̀ↄbↄzãkɛgyão. Wá kɛ́! Wá sumaɛ, asa ḿmɛnn Dii wá Lua.
23Sĩ̀sĩↄ ɛɛ vĩ, gbɛ̀sĩsĩↄ zↄa vĩ, Dii Isailiↄ Lua mɛ́ wá Suabana ũ.
24Za wá ɛ̀waasogↄↄ tã́aↄ wá maeↄ zĩ ài blè, an sãↄ ń ń zuↄ ń ń nɛgↄ̃ɛↄ ń ń nɛnↄɛↄ.
25Wà naalɛ ń wío, wà tó wá gɛɛ gↄ̃ kpá wá wɛ́i, asa ń wá deziↄ wa duunakɛ̀ Dii wá Luaɛɛ, za wá ɛ̀waasogↄↄ e gbã wi aà yãmao.