Jeremias 27

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

¹Hein beǥu pa he midhadì si Zedekia ziyà te Juda is anak ni Josia, migkaǥi is Nengazen kayi te kedì te, “Jeremias, baal ka te eyuǥu ne lìlìeǥi nu te panit ne ieyuǥu nu ziyà te tengel nu.

³Ne heini is menge lalag, tudtula nu ziyà te menge hadì te Edom, Moab, Ammon, Tyre, wey Sidon pinaaǥi te menge perekaǥi zan he midhendiyà te Jerusalem su ebpekidhinguma ki Hadì Zedekia te Juda.

⁴Keǥiya nu ziyà te kandan heini he menge lalag; ne para heini te menge hadì dan. Ne ke sikew te, ‘Iyan heini migkaǥi te Nengazen he Mekeǥeǥehem, he Megbevayà te Israel:

⁵Pinaaǥi te zekelà he ǥehem ku midlimbag ku is kelibutan, is menge etew, wey is menge langgam, ne iyan a ebayàbayà ke hentei is ibpezumala ku kayi.

⁶Guntaan ganì ne ibeǥey ku is menge nasyun niw ziyà te suluǥuen ku he si Hadì Nebucadnezar he hadì te Babilonia. Minsan is dumezaas he menge langgam ibpezizalem ku te kedumala zin.

⁷Ebpenilbi kandin is menge etew ziyà te langun he menge nasyun. Ebpenilbi zan daan te menge anak din wey menge apù din taman te timpu he iyan en maan edezeetan is Babilonia. Dutun he timpu, iyan en maan ebpekepenilbi is menge tig-Babilonia te mahabet he menge nasyun wey te mekeǥeǥehem he menge hadì.

⁸“ ‘Piru ǥuntaan, emun duen nasyun etawa ginhedian he kenà ebpenilbi etawa kenà ebpesakup ki Hadì Nebucadnezar he hadì te Babilonia, edsilutan ku haazà he nasyun etawa ginhedian pinaaǥi te tebek, bitil, wey menge zaru taman te igkepesakup ku sikandan ki Nebucadnezar.

⁹Umbe, kenè kew tuu te menge ebpeneuven niw, menge menenagnà, menge edluwas te kehuluǥan te menge teǥeinep, menge veyilan etawa menge etew he edsarig te menge mulin-ulin, su egkaǥi zan he kenè kew edsekupen te hadì te Babilonia.

¹⁰Tarù is egkeǥiyen dan diyà te keniyu su pinaaǥi kayi, egkengaawè kew kayi te tanè niw. Edsegseǥen ku sikiyu wey edezeetan.

¹¹Piru is menge etew ziyà te nasyun he ebpesakup wey ebpenilbi te hadì te Babilonia, idtugut ku he kenà egkengaawà sikandan diyà te keugelingen dan he tanà. Dutun dan egkeuyag-uyag wey ed-ubpà. Iyan a, is Nengazen, is migkaǥi kayi.’ ”

¹²Iyan ded heini he menge lalag migkaǥi ku ziyà te ki Hadì Zedekia he hadì te Juda. Migkaǥi a te, “Pesakup kew te hadì te Babilonia. Penilbi kew kandin wey te menge etew zin ne egkeuyag-uyag kew.

¹³Su emun kenà, ebpatey ka wey is menge etew nu te tebek, bitil, wey zaru, iring te nekaǥi te Nengazen he egkehitavù te menge etew ziyà te nasyun he kenà ebpenilbi te hadì te Babilonia.

¹⁴Kenè kew tuu te egkeǥiyen te menge ebpeneuven he kenè kew edsekupen te hadì te Babilonia, su tarù is egkeǥiyen dan diyà te keniyu.

¹⁵Iyan heini migkaǥi te Nengazen: ‘Wazè ku suǥùa heeyan is menge ebpeneuven. Edheǥeten dan is tarù he egkeǥiyen dan pinaaǥi te kegemita zan te ngazan ku. Umbe emun edtuu kew kandan, ne edsegseǥen ku sikiyu wey edezeetan, ragkes en heeyan is menge ebpeneuven.’ ”

¹⁶Ne migkeǥiyan ku is langun he menge memumuhat wey is langun he menge etew te, “Migkaǥi is Nengazen he kenè kew tuu te menge ebpeneuven he egkaǥi te kenè en egkeuǥet idlikù en puun te Babilonia is menge gelemiten diyà te valey te Nengazen. Tarù is egkeǥiyan dan diyà te keniyu.

¹⁷Kenè kew pemineg kandan. Kekenà, silbiyi niw is hadì te Babilonia, ne egkeuyag-uyag kew. Kinahanglan pe be he egkezeetan heini he inged!

¹⁸Emun tutuu sikandan he menge ebpeneuven ne is ebpengeǥiyen dan ne ziyà ebpuun te Nengazen, ne ipahangyù sikandan diyà te Nengazen he Mekeǥeǥehem, he sikan is nesamà he menge gelemiten diyà te valey te Nengazen, diyà te turuǥan te hadì te Juda, wey turuǥan te hadì te Jerusalem, ne kenè en meuwit diyà te Babilonia.

¹⁹Su migkaǥi is Nengazen he Mekeǥeǥehem te: Sikan is brunsi he menge tukud duen te valey te Nengazen, sikan is teleǥuey te wahig he egngezanan te Daǥat, sikan is menge untuzà, wey is duma pa he menge gelemiten kayi he inged, ne ed-uwiten diyà te Babilonia.

²⁰Heini he menge gelemiten wazà uwita ni Hadì Nebucadnezar ziyà te Babilonia hein mibihag din puun te Jerusalem si Hadì Jehoyakin he hadì te Juda, he anak ni Jehoyakim, duma te menge upisyal ziyà te Juda wey Jerusalem.

²¹Iyan guntaan migkaǥi is Nengazen he Mekeǥeǥehem, he Megbevayà te Israel te, ‘Heini he menge gelemiten ed-uwiten diyà te Babilonia ne ziyè dà heini taman te timpu te kegkuwaa ku kayi su idlikù ku ziyà te Jerusalem.’ ”