Isikiel 2

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

¹Iwe, Kot a üreniei, “Nöün aramas, kopwe ütä pwe üpwe fos ngonuk.”

²Nge lupwen a fos ngeniei, Ngünün Kot a feitiu woi o aütäei. Iwe, üa rongorong an fos ngeniei.

³A apasa ngeniei, “Nöün aramas, üpwe tinukela ren ekewe aramasen Israel, ren chon ewe mwü mi lükümach o ü ngeniei. Ir me ar kewe lewo ra tipis ngeniei tori ikenai,

⁴ra pwal lamalamtekia me tipepöchökül. Iwe, üpwe tinukela rer pwe kopwe asile ngeniir, pwe mine kopwe üreniir iei alon Kot ewe Samol mi Lapalap.

⁵Inamwo ika repwe rongorong ika resap rongorong, pun ir eu täppin aramas mi lükümach o ü ngeniei, nge repwe chök fokun mefi pwe mi wor eman soufos lefiler.

⁶Nge en nöün aramas, kosap niueitiir, kosap pwal niuokusiti ar kapas, kosap niuokus, inamwo ika om nonom lefiler a usun chök om nom lefilen iräfölüföl, ika om nom lein chöükö. Kosap fokun niuokusiti ar kapas ika niueitiir, inamwo ika ir eu täppin aramas mi lükümach o ü ngeniei.

⁷Iwe, en kopwe chök asile ngeniir ai kewe kapas, inamwo ika repwe rongorong ika resap rongorong, pun ir eu täppin aramas mi lükümach o ü ngeniei.

⁸Nge en nöün aramas, kopwe rongorong mine üpwe ürenuk, nge kosap lükümach o ü ngeniei usun ei täppin aramas. Kopwe amasala awom o mongö mine üpwe ngonuk.”

⁹Iwe, lupwen üa nenela, üa küna efoch pau a itito rei, nge a amwöchü echö toropwe mi mak lon.

¹⁰Mürin, Kot a ameresala ewe toropwe fän mesei. A wor mesen mak lon me lükün, nge mine a mak won pworausen ngüngüres me kechü me feiengau.