Ese 2

1

2

3

18

33

34

36

37

¹Ma eŋ kêsôm gêdêŋ aê gebe “Ŋamalac latu, ôndi sa. Aê gabe jasôm biŋ êndêŋ aôm.”

²Gêdêŋ taŋ awa kêsôm biŋ gêmoa naŋ, Apômtau nê ŋalau kêsêp aêŋoc ŋalêlôm gêja ma gêôc aê sa jakakô ma aê gaŋô awa tau kêsôm biŋ gebe

³“O ŋamalac latu, aê gabe jasakiŋ aôm ôndêŋ lau Israel. Êsêac to nêŋ mimi sêli tauŋ sa to sêbuc dêmôêŋ aê e mêŋgêdêŋ galoc.

⁴Êsêac gêsuŋtêkwa ŋatoŋ to tetoc aê sa atom. Aê jasakiŋ aôm ôndêŋ êsêac ôna gebe ôsôm êndêŋ êsêac gebe Apômtaunê biŋ tau tonec.

⁵Êsêac lau toŋ teŋ, taŋ sêli tauŋ sa ŋasec, tec êsêac sêkêŋ taŋeŋ me sêkêŋ taŋeŋ atom, mago êsêac sêjala gebe propete teŋ gêmoa êsêac ŋalêlôm.

⁶“Ŋamalac latu, aôm ôtêc êsêac to nêŋ biŋ atom. Gêŋ ŋatêkwa to locgôm oc sêkôm aôm auc ma ôŋgôŋ alidêbu ŋaô, mago ôtêc êsêacnêŋ biŋ to nêŋ laŋôŋsiboa atom gebe êsêac lau toŋ teŋ, taŋ sêli tauŋ sa ŋasec naŋ.

⁷Aôm ôsôm ŋoc biŋ êndêŋ lau toŋ teŋ, taŋ sêli tauŋ sa ŋasec naŋ, êsêac sêkêŋ taŋeŋ me sêkêŋ taŋeŋ atom.

⁸“Ŋamalac latu, aôm ôkêŋ taŋam biŋ, taŋ aê gabe jasôm êndêŋ aôm naŋ. Ôli taôm sa êtôm êsêac atom. Ôŋa awamsuŋ ma ôniŋ gêŋ, taŋ aê gabe jakêŋ êndêŋ aôm naŋ.”

⁹Go aê galic lêma teŋ, taŋ kêmêgôm papia toluŋ teŋ naŋ, kêmêtôc tau gêdêŋ aê.

¹⁰Ma lêma tau kêlaiŋ papia tau ma galic teto biŋ taŋiboaŋa to biŋ ijoc ma biŋ ojaeŋa kêsêp makeŋ-makeŋ.