Text copied!
CopyCompare
Las Escrituras en Ashéninka Ucayali del Sur del Perú - Isaías

Isaías 54

Help us?
Click on verse(s) to share them!
1Iroka ikantzi Tajorentsi: “Okantawitaka tee powaeyeeya, maaniromanthaki pinawitaka, roori kantzimaetacha antawoete pinkimoshiretee. Tee pikemaatsiwitya powaeyante, pithaamenteeyaani. Osheki tzimaatsini pitomipaeni okantawitaka imaninteetakimi, pawijaero nimaeka tzimatsiri oemi.
2Poemotero pipankonaki eero pithaawakaawo pomaankero pijeekantakari. Pishiryeero oojotantari, pikentakotero kameethaeni,
3Tema osheki poewawahayiteeya. Piyaate pisheninkaki otsipaki nampitsi, inampiteeyaawo ochempiki jempe tee inampiiteetawo.
4Eero ominthaawashiriimi, riroperori pikantya, tekatsi kaweyawaetemini, tekatsi pikaaniwente. Pimaesantero pikantaha paerani pikaaniwenta, eero pikenkithashireteero rowinkatharyeetemi pikinankaritzira,
5Oshiyawo riimi Tajorentsi inanteeyaatyeemimi. Iroka iwaero Tajorentsi shintsiperori, riitaki pinakowenteemiri, Tajorentsi rini Itajorentsite Israel, Itajorentsite jaawijatzi.
6Poshiyakawo ookaarewo ewankawo, ashironkaawaetachari, Roori kantzimaetacha ikaemaemi Pitajorentsite, ikanteemi:
7“Eepichoki nookawentakimi, roori kantzimaetacha antawoete netakotzimi nopiyashiteemi notsipateeyeemini.
8Antawoete nokijapaenta, eepichokiini nookawentakimi, Roori kantacha ojamani okanteeya noneshironkateemi.” Rootaki iñaane Tajorentsi, pinakowenteeri.
9“Noshinetakiniri Noé, nokantakiri: ‘Eero apiiteero oonkaeya kepatsi.’ eenitatsi noshinetakimiri eejatzi eeroka, nokantzimi: ‘Eero napiiteero najariimataami.’
10Ataakawitya tonkaariki, pookawita ochempi, Eero napakaero noneshironkatzimi eerokaete, eero pipakayiro paapatziyawakaa eerokaete.” Ari ikantzi iñaawaetaki Tajorentsi, neshironkaperotzimiri.
11¡Rowashironkahaetani nampitsi, atsipetakawori tampyaa, tekatsi kantemini. Naakataki piriinteeroni potanto nowetsikanteeyaawo porekatsiri mapi. Osheki owanawo okanteeya otantotsi.
12Antawo nowetsikayiteero pankotsi, poreryaari okanteeya mapi nowetsikantyaawori. Oshiyawo oporeryaatzi nijaa opatzimooki.
13Niyotaayiteeri maawoeni notomiite, ijeekayitee kameethaeni.
14Tontashireri pikanteeya pitampatzikashiretee, pijeekashiwaeteeyani eero ishintsineenteeteemi, Eero pithaawashiwaeta, eero okantzimoshirewaeteemi thawankantsi.
15Arika ikoshekaetemi, tee naaka kantakahaeyaawoni, Roori kantacha, aritaki poetsinampaakiri eeroka ikaatzi maemanetemini.
16“Pikeme, naakataki owetsikakiri kotsiroempeki antawaeteerori paamari rowetsikayitzi omanamentotsi. Naakataki owetsikakiri eejatzi thonkantaniri.
17Tekiraata otzimeeta omanamento materoni athonkante, Santziko powaeri kantakowaetemini. Noshineteeniri naaka ikaatzi antawaetanari: roetsinampaante.” Riitaki Tajorentsi ñaawaetzirori iroka.