Iosua 6:4-21

⁴Kohena tataodi haligigi‐labui ake matana eai bogigi haligigi‐labui mamoe taumoana donadi se laedi: asubena hehaligigi‐labuina eai eanua abo au hetaiiri ma haligigi‐labui, kohena va bogigi se iuhidi.

⁵Isi mamoe donadi bogigidi se iuhidi adidiri, arinana au ataiei tatao gamagaridi abo se wowo adidiri: eanua ganana abo i beugorigoriesegai, tatao abo se avasae, esau, esau, matana eai i laududurai.

⁶Iosua, Nuna natuna, kohena i eogaidi i ribalau aridi eai i ene, Ribahesunuma akena au abihai, kohena haligigi‐labui au hetorodi bogigi mamoe donadi haligigilabui Guiau ena ake matana eai se laedi.

⁷Eo i ribalau tatao aridi eai i ene, Au lau eanua au hetaiiri, isi tatao ma alahiadi se lau Guiau ena ake matana eai.

⁸Iosua tatao aridi eai i ribalautom abo kohena haligigi‐labui mamoe donadi bogigidi se abidi va Guiau matana eai se lau, bogigi se iuhidi: Guiau ena ribahesunuma akena i hemuridi.

⁹Tauiala ma alahiadi, kohena bogigi se iuhidi matadi eai se lau, isi se murimurita ake murina eai se laoma, kohena va se baguna bogigi se iuhidi.

¹⁰Iosua tatao i lauhesomdi i ene, Tabu au wowo, tabu arinamiu, tabu avamiu au dabari i lau e, asubena esau ea heribamiu ea ne au wowo, e abo au wowo.

¹¹Guiau ena ake eanua i hetaiiri ma esega: se uioma edi aba miamia eai, arinai se bava.

¹²Mara‐ie‐tom Iosua i toro heuheula, kohena Guiau ena ake se abihai.

¹³Kohena haligigi‐labui mamoe donadi bogigidi se abidi, huia gamagari se lau Guiau ena ake matana eai, bogigi se iuhidi: eo tatao ma alaalahiadi se bagubagunaedi, isi se murimuritama, Guiau ena ake murina eai se laoma, kohena se laulau, eo bogigi se iuhidi.

¹⁴Asubena helabuina eai ma esega eanua se hetaiiri abo se uio edi aba mia eai: hinage se abi doha nei asubena haligigi‐labui.

¹⁵Asubena hehaligigi‐labuina eai, mara‐ie‐tom se toro heuheula, ma haligigi‐esega eanua se hetaiiri, nei asubenana ne ma haligigi‐labui eanua se hetahetaiiri.

¹⁶Se hetaiiri ma haligigi‐labui va kohena bogigi abo se iuhidi, Iosua i ribalau tatao aridi eai i ene, Au wowo: Guiau eanua ta i reava.

¹⁷Eanua ta abo se goraei, eanua, eo ginauri gamagaridi boeana eai Guiau enana: Rahaba, sine baaea va, iabom abo i mauri, ia, eo helena tau mia gamagaridi hinage, paana tatao ta hetamaridi va i toreamuidi.

¹⁸Au nuatui ginauri se goraidio tabu au abidi, ginauri baaea au abidi ata au baaea hinage, Isaraela maudoudoina ata au hebaaeadi hinage.

¹⁹Ario, eo auro, barasi, eo poasi kaputi gamagaridi Guiau arinai se hetabuedi: Guiau ena aba pei eai abo ta toredi.

²⁰Kohena bogigi se iuhidi va, tatao abo se wowo: tatao bogigi arinadi, ea tatao se wowo adidiri arinadi se ataiei, eanua ganana i talopagorigori, arinai tatao eanua se avasae gaibui, esau, esau i lau dudurai matana eai, eanua va abo se girihai.

²¹Ginauri gamagaridi eanua eai se hebaaeadi, tau eo sine, hevahevari, eo tautaubada, bulumakau, eo mamoe, eo asina se lauelepaidi.