Josua 6:4-21

⁴Te nogo a naga me si wabo sogo te pris bidi te dąų wali po muani halobage tolali bage polasa pabo badu te augwali poligi pelama, tama augwaligo te bu wabo nai biugel tolomainu yao, augwaligo te omai kibu sipsip gąų pedelaligo nigai. Tama te nogo a naga me badu si wabo side, nage dali te ami bidi dabe badi tama te hanu bagula nogo a naga olama, me badu si te tama sogo biliyu yao,” wai. “Tama dage te hanu obo sesege badu bagula bilibo sogo, te pris dabego te bu wabo nai biugel te bu ola biliduao.

⁵Te augwaligo te biugel bu wabo te bobobage mu kegasa pabo sogo da, teda dage tigidaligo te i olama, po daga genuai mu wao, tama te po obadi, te hanu bagulali moni masigigo nigali obo masigi te pepeda paibao. Tama tigidali bidi te hanu tomoba dolo pomainao,” wali.

⁶Tialima, Josuago te pris dabe i olama, asobode tama augwalibolo te po wai, “Dagego te dąų wali po muani halobage tolao,” wai. “Tama te pris a naga me badu sigo te biugel tolama, tama te dąų wali po muani halobage tolali bidi dabe asobadi, te augwali poligi pao,” wai dao.

⁷Nosali Josuago te we bidibolo te po wai, “Dage piąo! Dagego te hanu bagulali masigi obo bagula biliyu, tama te ami bidi dabe te Genuai Bidigo dąų wali po muani halobage tolali bidi dabe asobadi te polasa pao.” Te po wai.

⁸Tialima, augwaligo te Josuago wali po tiwai gilama yai. Te pris bidi dabe a naga olama, me badu si te Genuai Bidigo te dąų wali po muani halobage tolali bidi dabe nosali asobadi, te augwali te Genuai Bidigo gedude polasa peyu, te biugel bu ola pai.

⁹Tama ami bidi dabe meba te pris dabe pabo badu polasa peyu, tama meba te dąų wali po muani halobage tolali bidi dabe pabodu nosali pai. Tama augwali pali sogo, te a naga olama me badu si te pris dabego te nai biugel bu olalua pai.

¹⁰Tiali goli, Josuago te we bidi augwalibolo te po wai, “Te dagego te i me te kilikili me deli munu me wasiąbadi, te eno po dagebolo waboba te usu nigi pao,” wali.

¹¹Te agai te pris dabe dali, te Genuai Bidigo bomai po dąų wali po muani halobage tolali bage dali tagala palama, te hanu deli sogo bagulama bilimainogo yai. Te augwali ma geasa aselama, te sogo hulide augwali bidali pesageba ma bidagasai.

¹²Tama Josua te kigamu digi mu hodaluama, tama te pris dabego te dąų wali po muani halobage ma selama, tama tolasa palio.

¹³Tama te a naga olama, me badu si te pris dabego te bu wabo nai biugel te a naga olama, me badu si selama, tama polasa peyu, te bu wabo nai biugel bu ola pai. Tama ami bidi dabe meba te pris pabo badu polasa peyu, te meba nosali asiyu yai.

¹⁴Augwaligo te tiwai naga te si sogo elama, tama augwa bidali pesageba ma geasa asai. Augwaligo te tama tiwai sę te nogo a naga me deli sogo te tiwai sę yai dao.

¹⁵Te 7 wabo sogode, te be posobaso, tama augwali hogodaluama, te augwaligo polobadu yali tiwai gilama, augwaligo te hanu bagula bilai. Tiali goli, te bubugade augwaligo te hanu bagula bilali te nogo a naga sogo olama, me badu si, te tama sogo bilai.

¹⁶Te tama sogo bilali silama, teda te pris dabego te bu wabo nai biugel te bu wabo mu bobobage sesabia pabode tama Josuago te we bidi augwalibolo te po wai, “Te i bomo elama, waiąo! Genuai Bidigo te hanu dagebolo mawai dao!

¹⁷Dago te hanude elalubo tigidali nai dabe dali dolinao, dago te ofa me deli te Genuai Bidibolo te tigidali mabo tiwai gilama yao. Te penani we Rahap naga, te aga aya ida, aga hani dali, augwali te me ela munamuo, magi baso meni, agai te hanu sa asela suagasomainu tagala palali bidi si geme dualai dao.

¹⁸Tiali goli, dagego te hanude nai me deli sidali weyu habu sai. Te dagego sali da, teda te dolabo te moni dwai sę te dage Israel dabe bidibo pesagede mu pedelaibao.” Te po wai.

¹⁹“Te tigidali nai augwaligo te silvago me gol me bras me ain, tego nigali nai dabe, te Genuai Bidigo nai dabe naga dao. Dagego te Genuai Bidigo mone mubo beba naga sela asao,” Josuago te po wai.

²⁰Tialima, te pris dabego te bu wabo nai biugel bu wai. Tama te we bidi augwaligo odobo sogo, deli sogo mu tigidaligo te genuai i wabo sogode tama te hanu bagulali obo dabe te gisigasa dulali. Tama tiai digi, nosali te we bidi tigidali te tomoba pelama, tama augwaligo te hanu sai dao.

²¹Augwaligo te tigidali we bidi me, te gesi we bidi me, te monu dabe, mosi dabe me, te bulmakau dabe me, sipsip, donki me, te nai dabe dali augwaligo te moni hwą bainatgo ela silai.