Josue 6:4-21

⁴Ipehuna nu is ebivinting duen te Kavan te Kebpekid-uyun ku keniyu he pitu he menge memumuhat he ed-uwit te tigselimbaha he vudyung. Ne emun ikepitu en he andew, ne kepipitu niw liǥuya haazà is inged, duma te menge memumuhat he ebpezaǥing te vudyung.

⁵Ne emun egkezineg niw en is mezaǥing wey egkeuǥet ebpengkusa he zaǥing te vudyung dan, ne kulahì kew is langun te utew mezaǥing. Ne zutun he timpu egkeregdas is berengbeng keniyan he inged. Ne zutun wazè en ebpekaalang keniyu te kedseled niw.”

⁶Umbe, mid-umew ni Josue is menge memumuhat ne migkeǥiyan din te, “Uwita niw is Kavan te Kebpekid-uyun. Ne medhuna is pitu keniyu he ed-uwit te tigselimbaha he vudyung.”

⁷Ne migkeǥiyan din is duma he menge etew te, “Genat kew en. Liǥuya niw heeyan is inged. Is duma he menge sundaru medhuna zuen te ebpemen-uwit te vudyung he pitu he menge memumuhat.”

⁸Ne midtuman dan is mandù ni Josue. Midhuna is pitu he memumuhat duen te ebinting te Kavan te Kebpekid-uyun te Nengazen ne impezaǥing dan is menge vudyung dan.

⁹Ne midhuna zuen te menge memumuhat he ebpezaǥing te menge vudyung dan is duma he menge sundaru, ne is duma pa edtinundug duen te Kavan te Kebpekid-uyun. Ne kena egkeengked is kedaǥing te menge vudyung.

¹⁰Piru mibmenduan ni Josue is menge etew he kenè dan megkulahi etawa megurub taman te kenè pa sikandin ebmandar te kegkulahì.

¹¹Ne midtuman dan is insuǥù ni Josue, inliǥuy zan dutun te inged te kesevaha sikan is Kavan te Kebpekid-uyun te Nengazen. Ne kegkepasad midlikù dan diyà te kampu zan ne te kegkezukilem midlipezeng dan.

¹²Ne kegkemeselem, utew midsayu med-enew si Josue. Ne mid-uwit en maan duen te menge memumuhat sikan is Kavan te Kebpekid-uyun te Nengazen,

¹³ne midhuna ǥihapun sikan is pitu he menge memumuhat he ebpezaǥing te menge vudyung. Ne iyan ded mibeelan duen te menge sundaru is: edhuna is duma ne is duma pa, edtinundug duen te Kavan te Kebpekid-uyun te Nengazen, ne idtulung dan en ibpezaǥing is menge vudyung.

¹⁴Ne iyan heini ikezuwa he andew te kedliǥuy zan te kesevaha zutun te inged, ne kegkepasad dutun midlikù dan en maan diyà te kampu zan. Ne iyan heeyan mid-ulaula zan seled te heenem he andew.

¹⁵Ne hein ikepitu en he andew, ne egkeriwaswas pa ne mid-enew en sikandan ne midliǥuy sikandan dutun te inged iring te mibeelan dan te midlavey he heenem he andew. Piru kayi he andew kepipitu zan medliǥuy zutun te inged.

¹⁶Ne hein ikepitu en te kedliǥuy zan, impezaǥing te menge memumuhat is menge vudyung dan ne mibmendaran ni Josue is menge etew te, “Kulahì kew su imbeǥey en keniyu te Nengazen heini is inged!

¹⁷Heini is tivuuk he inged wey is langun he netaǥù kayi ibpemuhat diyà te Nengazen pinaaǥi te kedezeeti zuen. Si Rahab dà he ebelegyà te zengeg din wey is tivuuk he pemilya zin is edlibriyen su in-eles din sikan is menge meniniid tew.

¹⁸Kenè kew megkuwa te minsan hengkey he vutang he para edezeetan. Su emun ebeelan niw heini egkezeetan kew, ne iyan kew egkehimu he hinungdan emun duen kezeetan he egkehitavù te Israel.

¹⁹Piru is langun he menge azen he pelata, bulawan, brunsi, etawa putew, ne para heini te Nengazen, ne kinahanglan he idtaǥù diyà te teleǥuey te ketiǥeyunan te Nengazen.”

²⁰Impezaǥing te menge memumuhat is menge vudyung dan, ne nemengulahì is menge Israilihanen hein nezineg dan heini. Ne neregdas is berengbeng dutun te inged ne utew zà melemu is kedseled dan ne mid-aǥew zan haazà is inged.

²¹Impurung dan ipemuhat diyà te Nengazen haazà is inged pinaaǥi te kegeraa zan te menge maama wey menge vahi, meǥurang wey vatà, ragkes en is menge vaka, menge kerehidu, wey menge asnu.