Joshua 6:4-21

⁴Me ono na manesukaghi kara sakutua idevia na Bokisi ni Vetena ni Baubahu Tabu, ma kara sopa hola tango sakai na kala ni sheep mane. Mi tana vituni na dani e vitu tughuru ni sakutua talighutiana na komu sule mana lei manesukaghi kara lovui na lei kala kiri.

⁵Mi tana bona kau rongovira na lei manesukaghi sakai tughuru ni lolovu daro me ke laga na lei kala ke, na vure udolu kara nia hevei sakai na ghuu te laga. Keri vaho geke dudura horu na peona na komu, mana vure tara sama haghe haliu tana komu.”

⁶Keri ke, Joshua te holo kolura na lei manesukaghi me bosa vanira te vagha eni, “Kau ghate datoa na Bokisi ni Vetena ni Baubahu Tabu, makau vilira ra vitu kara idevia, maka sopa tango sakai kala ni sheep mane.

⁷Keri ge nia hevei na bosa vanira na vure, “Kau sakusakutua minamina talighutia na komu sule, mana balu mane tara holai na le totobo ni kisumate kara idevia na halautu inaghona nina Bokisi ni Vetena ni Baubahu Tabu Yahweh.”

⁸Mi murina Joshua te kokoe soko vanira na vure, ra vitu na manesukaghi kolui nia didira na kala ni sheep mane tara vuivuni ni sakutua tana matana Yahweh, gara lovui na kala tana bona tara tona. Na lei manesukaghi tara holaa na Bokisi ni Vetena ni Baubahu Tabu nina Yahweh tara taonira mai muri.

⁹Sakai na ovu ni malaghai ni gehemate kara sakusakutua inaghodia na lei manesukaghi tara tona haliu na lavuani na kala ni sheep mane, mi murina raini na lei manesukaghi tara holaa/ghatea na Bokisi ni Vetena ni Baubahu Tabu, mana eruani na ovu ni malaghai ni gehemate tara sakusakutua imurina gaira.

¹⁰Hauva, Joshua te arevaghi vanira me ghaghua, “Kau bei ghuu, ma sughua kau bei kokokoe. Sughua siki pile ngengo itatana hei, koekobe ku bosaa, ‘Kau ghuu.’ Keri ge kau ghuu!”

¹¹Mana Bokisi ni Vetena ni Baubahu Tabu nina Yahweh sakai tughuru ni hola talighutia nia na komu sule tana dani keri, vaho gara ghoi oli ni maturu tana bona tara kisui ga na vale tapoledira.

¹²Tana labotana na dani vauolu keri, Joshua te mina me rarai kolura na lei manesukaghi mara ghoi hola so na Bokisi ni Vetena ni Baubahu Tabu nina Lord.

¹³Ra vitu na manesukaghi kolui na didira na kala ni sheep mane tara sakutua inaghona na Bokisi ni Vetena ni Baubahu Tabu nina Yahweh, mara lovui didira na kala. Na lei malaghai ni kisumate tara idevira na lei manesukaghi kolui didira na kala, ge tumurira mai na Bokisi ni Vetena ni Baubahu Tabu nina Lord. Vaho gara lovu lagai dira na kala rana manesukaghi.

¹⁴Mi tana ruani na dani, sakai tughuru ni sakutua talighutiana na komu sule, mara ghoi oli so tana maladira tara maturu iga. Mara gonighi te vagha so e ono na bongi/dani.

¹⁵Tana vituni na dani rana vure ni Israel tara rarai labota mara ghoi sakutua talighutiana na komu sule tara nea haia mai. Mi tana dani vaghana ghua so eni, e vitu tughuru ni sakutua talighutiana na komu sule.

¹⁶Me vituni na talighu mua ka, rana manesukaghi tara lovu lagai didira na kala, ma Joshua te arevaghi vanira na vure, me ghaghua, “Kau nia ghaeghahe dato na manga sule, na pukuna Yahweh te nia hevei vanighau na komu sule eni taeni!

¹⁷Na komu sule eni mana lei totobo soko ilokana haurake ma kara pisu, na vatei hevei oli vania Yahweh. Ma Rahab na rebi, maia rahei tana valena vamua kara vola, na pukuna te vavolara rua na tinoni toro mai polo ni vaevane.

¹⁸Kau bei hola gea siki totobo tara taludilai ge kau haurakei, ma kau diua so ke, mi ghau kau hola ghana mate Israel, mi ghau ghua kau mate.

¹⁹Na hava tua tara gonia nia na silver, gold pana bronze mane halo, ke kabu oli vania Yahweh, me ke tana vania nina kei ni baobaore.”

²⁰Keri ke na lei manesukaghi tara lovui na lei kola ni sheep. Na vure tara rongovia mua tara lovu lagai na kola ni sheep ka, na vure udolu tara ghuu. Me hau vaso na pile ka, na peovatuna na komu sule Jericho te kakovo me dudura horu tana pari, mana vure udolu ni Israel tara sopa sama maemane haghe tana sopa piuna mara dikalaa na komu sule eni.

²¹Taho siki totobo ke kabu oli kara mua haurakea, - na mane, vaivine, vure vaolu mana haulaghi didira buluka, sheep, mana donkey, - na lei totobo soko tua.