IKUƆ́ NÌÙBƐ̀ 17:7-16

⁷Di bɑ́ m bútínnɛ́ kɛ́nfeu iwũɔ̃ sibɔɔtenkɑɑnìi sìì dò nyɛbɔdɑkɛ̀. Dɛ kó ikuɔ́ yó mbomu sɑ̃́ɑ̃̀ di kpɛ́í nnɛ̀ di yɑɑ̀bío.

⁸Á tì mbɛ̀ nɑ̀kɛ́ kɛ̀ bɛ kóò mɔù yoo bɛpɔ̀ɔ̀bɛ̀ bɛ̀ɛ̀ bɛ̀ bonɛ̀, kòò mɔù n fèútɛ́ fɛɔ̃̀fɛ̀ kɛ tùɔ nyoo ò bɑɑ fɛ̀ nni nfèútɛ́mu,

⁹kɛ í fɛ̀ kɔ̀tɛnɛ̀ní mɛtɑummɛ̀ tou borìnùù, kɛ fɛ̀ nni nfèútɛ́ bɛ̀ɛ ò dènnɛ Isidɑyɛɛribɛ miɛkɛ.

¹⁰Di miɛkɛ kɛ̀ di kóò mɔù di mɛyĩ̀ĩ̀ nyoo bɛpɔ̀ɔ̀bɛ̀ bɛ̀ɛ̀ di bonɛ̀ kɛ̀ bɛɛ̀ kóò mɔù mɛ̀ di, bɑ́ mùù botí kó mɛyĩ̀ĩ̀, m miɛkɛ bo ò yɛ̀, kɛ̀ nh ò dènnɛ Isidɑyɛɛribɛ miɛkɛ.

¹¹Kɛ yɛ̃́ mufòmmu bomɛ̀ mɛyĩ̀ĩ̀ mmiɛkɛ nkɛ. Dɛɛ̀ te kɛ̀ n yɛ̃ ndí mmɛ ndɔɔrinɛ̀ ikuɔ́ diwũɔ̃tɔ̀nnì ĩ́nkɛ̀ di yɛi nhũtímù kpɛ́í, kɛ́nfòù, mɛyĩ̀ĩ̀ mmɛɛ̀ ɔ̃ nte kòo nìtìi wenkɛ.

¹²Dɛɛ̀ te kɛ̀ n tu díndi Isidɑyɛɛribɛ nɛ̀ bɛpɔ̀ɔ̀bɛ̀ bɛ̀ɛ̀ di bonɛ̀, di bɑ́ nyo mɛyĩ̀ĩ̀.

¹³Kɛ̀ Isidɑyɛɛri yoo opɔ̀ɔ̀ wèè di bonɛ̀, kòò kɔ̀tɛ kupɑɑwɑɑ́ nkɛ kùɔ tɛhontɛ̀ yoo tɛnɔ̀tɛ̀ di yo ndɛ̀, wèe yóu kɛ̀ dɛ yĩ̀ĩ̀ nyɛ̀ kòò mɛ̀ dɑ̀tínnɛ́ mutɑ̃́ɑ̃́.

¹⁴Kɛ yɛ̃́ bɑ́ dɛ̀ dɛ fòmmu bomɛ̀ dɛ yĩ̀ĩ̀ mmiɛkɛ nkɛ. Dɛɛ̀ te kɛ̀ n tu díndi Isidɑyɛɛribɛ di bɑ́ɑ́ di fɛɔ̃̀fɛ̀ mɑfɛ̀ kó mɛyĩ̀ĩ̀, bɑ́ dɛ̀ dɛ fòmmu bo dɛ yĩ̀ĩ̀ mmiɛkɛ nkɛ, kɛ̀ wèè di mɛyĩ̀ĩ̀ mbɛ̀ɛ ò dɛitɛ Isidɑyɛɛribɛ miɛkɛ.

¹⁵Bɑ́ wè dihɛì yiɛ̀ nyoo opɔ̀ɔ̀ kòò di dɛ̀ɛ̀ ku, yoo musĩ̀mmù pĩ ndɛ̀ wèe ɔ́ú o yɑ̀ɑ̀tì kɛ́wuɔ, ò sĩ̀ntɛmu dɛ yiè kɛ́ntɔ kɛ́tuɔkɛnɛ̀ kuyuoku. Dɛ kó difɔ̃nkúò ò tɛ̃́nkɛ í sĩ̀.

¹⁶Kòò mɛ nyí ɔ̀ú o yɑ̀ɑ̀tì ò mɛ nyí wùɔ dɛ kó mɛyɛi mbo o yuu ĩ́nkɛ̀ nkɛ.