Taha Bapare Sâcmutâc 17:7-16

⁷Israe ŋic jaŋe taha bâzire qowi‐jeŋic i nemu sâqocne kiŋaŋ qajareeŋgopieŋ jaŋere biŋe mocwâc mi qâhâmonʒepieŋ. Dâŋ izi ŋic gaŋne gaŋne fuarâ juniŋmu sâc jaŋere dâŋsanaŋ erâ fozejec.

⁸“Erâ ʒiŋuc ʒuhuckerâ jazazemec: Israe kikefuŋ ŋoŋeraonec, me ŋondeŋ‐ŋeŋicko ŋic jaba jueŋgopieŋ jaŋeraonec moczi qowi bâzi rikehuc

⁹tutumaŋ qoruc bozere motâcko bafisirâ Wofuŋ taha mi bacneocmu ine ŋic e âgofâcne jaŋere guruonec bâsirowezo.

¹⁰“Israe kikefuŋ ŋoŋeraonec me ŋondeŋ‐ŋeŋicko ŋic jaba jueŋgopieŋ jaŋeraonec moczi soc nâocmu e ine râsi ecnehuc ŋic âgofâc‐ticne jaŋere guruonec bâsirowepemu.

¹¹Jujure tâpiri i socko fokac hâcne; eme no irec hâcne taha bapazi kiwiric‐ŋeŋic rohuc alatao hoŋkeocte mupo. Jujure tâpiri i socko fokacte taha bapazi iŋuc ehuc kiwiric‐ŋeŋic sâcne roocmu.

¹²No irec hâcne Israe ŋic kecʒiŋuc jazapo: Ŋoŋeraonec me ŋondeŋ‐ŋeŋicko ŋic jaba jueŋgopieŋ jaŋeraonec moczi soc mi nâzejec.

¹³Israe ŋic ŋoŋeraonec me ŋondeŋ‐ŋeŋicko ŋic jaba jueŋgopieŋ jaŋeraonec moczi wosaŋeŋ gie bahuc qowi nânâne moc roocmu e socticne mâreŋko hoŋkerâ rufezi hemackezejec.

¹⁴“Wiac jujune sasawa jaŋere tâpiri i socko fokac; eme no irec hâcne Israe ŋic ʒiŋuc jazapo: Wiac jujune sasawa jaŋere tâpiri i socko fokacte wiac i jaŋere soc moc mi nânʒepieŋ. Moc e sifu nâocmuzi mi juzejec.

¹⁵Â mâreŋ rune me ŋic jabane moczi qowi e jahac hâmoekac me qowi gâcne jaŋe ki sipiric ecnepie hâmoekac i nâocmuzi ŋaqi‐ticne ʒurerâ e jahacne wâc opâ ruarâ wâwânâŋhec jaha juha hae ŋafezejec. Hae ŋafeme ine ɋaɋackezejec.

¹⁶Me ŋaqi wiac‐ticne mi ʒurehuc opâ mi ruaocmu ine kiŋ hureocmu.”