IKUƆ́ NÌÙBƐ̀ 15

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

¹Kɛ̀ ti Yiɛ̀ nKuyie mbɑɑ nsɔkɛ́ kɛ nɑ́ɑ́nnɛ̀ Mɔyiisi nɛ̀ Anɔɔ kɛ́bɛ́i nkɛ dɔ̀:

²Nɑ́kɛ́nɛ̀ Isidɑyɛɛribɛ kɛ tú: Kòo nitidɔ̀ù mɔù tùɔ̀ti yɛfɔtɛ̀ kɛ̀ mɛniɛ nyiɛ̀, dɛ kó mɛniɛ nhò sĩ̀nkùnnɛmu.

³Ntɛ dɛ̀ yó nhò dòmmɛ̀ ò mɔ nyɛ̀ɛ̀ we miɛkɛ: Kɛ̀ mɛniɛ nyiɛ̀ yoo mɛ í yiɛ̀ ò sĩ̀mmu.

⁴Kòò duɔ́ dìì dɔ́ù ĩ́nkɛ̀ dì sĩ̀ntɛmu, kòò kɑ̀ri dìì kɑ̀rì ĩ́nkɛ̀ dì sĩ̀ntɛmu.

⁵Kɛ̀ wèè kɑ̀ɑ́kɛ́ dɛ yiɛ̀ ndɔ́ù wèe ɔ́ú o yɑ̀ɑ̀tì kɛ́wuɔ, ò sĩ̀ntɛmu dɛ yiè kɛ́ntɔ kɛ́tuɔkɛnɛ̀ kuyuoku.

⁶Kɛ̀ wèè kɑ̀rì dikɑ̀rì ò kɑ̀rì dìì ĩ́nkɛ̀ wèe ɔ́ú o yɑ̀ɑ̀tì kɛ́wuɔ, ò sĩ̀ntɛmu dɛ yiè kɛ́ntɔ kɛ́tuɔkɛnɛ̀ kuyuoku.

⁷Wèè kɑ̀ɑ́kɛ́ dɛ yiɛ̀ nwèe ɔ́ú o yɑ̀ɑ̀tì kɛ́wuɔ, ò sĩ̀ntɛmu dɛ yiè kɛ́ntɔ kɛ́tuɔkɛnɛ̀ kuyuoku.

⁸Kɛ̀ dɛ yiɛ̀ ntĩ̀ṹtɛ́ òmɔù, ò mɛ ntĩ̀ṹtɛ́ wèe ɔ́ú o yɑ̀ɑ̀tì kɛ́wuɔ, ò sĩ̀ntɛmu dɛ yiè kɛ́ntɔ kɛ́tuɔkɛnɛ̀ kuyuoku.

⁹Kòò kɔ̀ri mucèmmu kɛ kɑri dìì sɑ̃nkɑ̀rì dì sĩ̀ntɛmu.

¹⁰Kɛ̀ wèè kɑ̀ɑ́kɛ́ kunɛnkù mɑkù ò yɑ̃̀kɛ kùù ĩ́nkɛ̀, ò sĩ̀ntɛmu dɛ yiè kɛ́ntɔ kɛ́tuɔkɛnɛ̀ kuyuoku. Kɛ̀ wèè tùótɛ́ dɛ kó kunɛnkù wèe ɔ́ú o yɑ̀ɑ̀tì kɛ́wuɔ, ò sĩ̀ntɛmu dɛ yiè kɛ́ntɔ kɛ́tuɔkɛnɛ̀ kuyuoku.

¹¹Kɛ̀ dɛ kóo nìtì kɑ̀ɑ́kɛ́ òmɔù kɛ í nìtɛ, ò kɑ̀ɑ́kɛ́ wèe ɔ́ú o yɑ̀ɑ̀tì, ò sĩ̀ntɛmu dɛ yiè kɛ́ntɔ kɛ́tuɔkɛnɛ̀ kuyuoku.

¹²Kɛ̀ dɛ kóo nìtì kɑ̀ɑ́kɛ́ kunɛnkù tiyɑɑtì kɔku bɛ̀ɛ kù pɔ̀ntɛ, kɛ̀ kudɔú kɔku mɛ nní nku bɛ̀ɛ kù ɛitɛ́.

¹³Kɛ̀ dɛ̀ yiɛ̀ mmiɛtɛ́ ò mbɑɑ̀ yɛwe yɛ̀yiekɛ̀ kɛ nɛ́ nɑ kɛ́wenkɛ. Wèe ɔ́ú o yɑ̀ɑ̀tì nɛ̀ mɛniɛ mmɛ̀ɛ̀ pũɔ̃̀ nkɛ nɛ́ wenkɛ.

¹⁴Diyiè niínnì yiè kɛ́wɑɑ́ nsinɔ́nkpeé sìdɛ́sì yoo yɛkpɛtinɔ́nkperípɑ̀ɑ̀ nyɛ̀dɛ́ɛ̀, kɛ́ dɛ̀ tɔní kɛ́duɔ́ nyikuɔ́ nìùtì mɛtɑummɛ̀ tou bòrìnùù.

¹⁵Kòo túótɛ́ tɛ̀mɑ́ɑ̀ kɛ́kuɔ mɛyɛi nhũtímù kpɛ́í, kɛ́túótɛ́ tɛtɛtɛ̀ kɛ́kuɔ kɛ́tuɔ nkóò dɔ̀ɔ̀ mɛwénkùmɛ̀ kó ikuɔ́ kòo wenkɛ.

¹⁶Kòo nitidɔ̀ù duɔ́ kɛ yɛ̃nkɛ omɑ́ɑ̀ wèe ɔ́ú o yɑ̀ɑ̀tì kɛ́wuɔ ò sĩ̀ntɛmu dɛ yiè kɛ́ntɔ kɛ́tuɔkɛnɛ̀ kuyuoku.

¹⁷Kɛ̀ tiyɑ̀ɑ̀tì nti yoo kɛ̀ kukɔ̃̀nkù nku o tɑniɛ ndɑ̀rimɛ̀ wèe dɛ̀ ɔ́ú, dɛ̀ sĩ̀ntɛmu dɛ yiè kɛ́ntɔ kɛ́tuɔkɛnɛ̀ kuyuoku.

¹⁸Kòo nitidɔ̀ù duɔ́nɛ̀ onitipòkù bɛ̀ɛ wuɔ. Bɛ̀ sĩ̀ntɛmu dɛ yiè kɛ́ntɔ kɛ́tuɔkɛnɛ̀ kuyuoku.

¹⁹Kòo nitipòkù yúɔ́ nhò sĩ̀ntɛmu kɛ dɔ̀ yɛwe yɛ̀yiekɛ̀, kɛ̀ wèè ò kɑ̀ɑ́kɛ́ ò sĩ̀ntɛmu dɛ yiè, kɛ́ntɔ kɛ́tuɔkɛnɛ̀ kuyuoku.

²⁰Kòò duɔ́ dìì dɔ́ù dì sĩ̀ntɛmu, kòò kɑ̀ri dìì kɑ̀rì dì sĩ̀ntɛmu.

²¹Kɛ̀ wèè kɑ̀ɑ́kɛ́ o dɔ́ù wèe ɔ́ú o yɑ̀ɑ̀tì kɛ́wuɔ. Ò sĩ̀ntɛmu dɛ yiè kɛ́ntɔ kɛ́tuɔkɛnɛ̀ kuyuoku.

²²Kɛ̀ wèe kɑ̀ɑ́kɛ́ kunɛnkù mɑkù ò kɑ̀ri kùù ĩ́nkɛ̀ wèe ɔ́ú o yɑ̀ɑ̀tì kɛ́wuɔ, ò sĩ̀ntɛmu dɛ yiè kɛ́ntɔ kɛ́tuɔkɛnɛ̀ kuyuoku.

²³Kɛ̀ kunɛnkù mɑkù bo o dɔ́ù ĩ́nkɛ̀ yoo ò kɑ̀ri dɛ̀ɛ̀ ĩ́nkɛ̀, kòò mɔù dɛ̀ kɑ̀ɑ́kɛ́ ò sĩ̀ntɛmu dɛ yiè kɛ́ntɔ kɛ́tuɔkɛnɛ̀ kuyuoku.

²⁴Kòo nitidɔ̀ù duɔ́nɛ̀ onitipòkù ò yùɔ́ ndìì mɔ̀nnì ò sĩ̀ntɛmu kɛ dɔ̀ yɛwe yɛ̀yiekɛ̀ kòò duɔ́ dìì dɔ́ù ĩ́nkɛ̀ dì sĩ̀ntɛmu.

²⁵Kòo nitipòkù yùɔ́ nkɛ̀ dɛ̀ pɛ̃ɛ̃tɛ́ dɛ we kɛ̀ tì mu nyí dèè, yɛwe yɛ̀ɛ̀ sɔɔtɛ́ yɛ miɛkɛ ò bɑɑ yó nsĩ̀ nhò ɔ̃ nyúɔ́ nkɛ̀ dɛ̀ dòmmɛ mmɛ.

²⁶Dɛ kó yɛwe yɛ̀ɛ̀ sɔɔtɛ́ yɛ miɛkɛ kòò duɔ́ dìì dɔ́ù yoo ò kɑ̀ri dìì kɑ̀rì ĩ́nkɛ̀, dì sĩ̀ntɛmu kɛ́ndònnɛ̀ o yɔ́ntì kó yɛwe ɔ̃ ndòmmɛ̀.

²⁷Kɛ̀ wèè kɑ̀ɑ́kɛ́ o dɔ́ù yoo o kɑ̀rì, wèe ɔ́ú o yɑ̀ɑ̀tì kɛ́wuɔ, ò sĩ̀ntɛmu dɛ yiè kɛ́ntɔ kɛ́tuɔkɛnɛ̀ kuyuoku.

²⁸Kòo yɔ́ntì còḿmú ò mmɔkɛ yɛwe yɛ̀yiekɛ̀ kɛ nɛ́ nɑ kɛ́wenkɛ.

²⁹Diyiè niínnì yiè kòo wɑɑ́ nsinɔ́nkpeé sìdɛ́sì yoo yɛkpɛtinɔ́nkperípɑ̀ɑ̀ nkɛ́ dɛ̀ tɔní kɛ́duɔ́ nyikuɔ́ nìùtì mɛtɑummɛ̀ tou bòrìnùù.

³⁰Kòo kuɔ tɛ̀mɑ́ɑ̀ mɛyɛi nhũtímù kpɛ́í nkɛ́kuɔ tɛtɛtɛ̀ kɛ́tuɔ mmɛtɑummɛ̀ tou ììkɛ̀, kóò dɔ̀ɔ̀ mɛwénkùmɛ̀ kó ikuɔ́ kòo wenkɛ.

³¹Dí nɑ́kɛ́ Isidɑyɛɛribɛ kɛ̀ bɛ̀ níí nciɛ́ mbɛ̀ sĩ̀ nyɛ̀ɛ̀ we, bɛ̀ bɑ́ɑ́ tɑ n tɑummɛ̀ tou bɛ̀ yɑ̀ɑ̀ bo dì sĩ̀nkùnnɛ kɛ́kú.

³²Dɛ kó ikuɔ́ tukúnɛ̀ onitidɔ̀ù wèè bo tuɔti wènwe yɛfɔtɛ̀ kɛ̀ mɛniɛ nní nyiɛ̀ nɛ̀ wèè bo duɔ́ kɛ́yɛ̃nkɛ omɑ́ɑ̀,

³³nɛ̀ onitipòkù wèè yúɔ́, nɛ̀ onitidɔ̀ù yoo onitipòkù wèè bo tuɔti yɛfɔtɛ̀ kɛ̀ mɛniɛ nní nyiɛ̀, nɛ̀ onitidɔ̀ù wèè bo duɔ́nɛ̀ onitipòkù ò yùɔ́ ndìì mɔ̀nnì.