IKUƆ́ NÌÙBƐ̀ 16:3-13

³Kòò níí tɑti mɛtɑummɛ̀ tou wèe wɑɑ́ ndinɑɑdɑɑ̀ mɛyɛi nhũtímù kpɛ́í, kɛ́wɑɑ́ ndipedɑɑ̀ ò yó n féútɛ́ dì kɛ́tuɔ,

⁴kɛ́dɑ́ɑ́tí dikɔutɛ́yɑɑ̀bòrì dìì dùɔ̀kɛnɛ̀ mupɑɑ̀konkperímù kɛ́inɛ̀ dɛ kó dɛfɛtirɛ kɛ́boú mu kó fɛnɑɑ̀kɔ̃̀nfɛ̀, kɛ́boú o yuu mu kó kuyɑɑ̀bomboúnkù. Ikuɔ́ nɛntì nti, ò níí wuɔ kɛ nɛ́ nɑ kɛ́ tì ɑ̃nnɛ́.

⁵Kɛ̀ Isidɑyɛɛribɛɛ ò duɔ́ nyɛbɔdɑkɛ̀ yɛ̀dɛ́ɛ̀ mɛyɛi nhũtímù kpɛ́í nnɛ̀ dipedɑɑ̀ dìmɑ́ɑ̀ ò yó n féútɛ́ dì kɛ́tuɔ.

⁶Kɛ̀ Anɔɔ ketɛ́ kɛ́ n féútɛ́ dinɑɑdɑɑ̀ o mɔ́mmuɔ nhò kó mɛyɛi nhũtímù kpɛ́í nnɛ̀ o cĩ́ɛ̃̀tɛ̀ kɔbɛ kɔ̃mɛ,

⁷kɛ́deè kɛ́túótɛ́ yɛbɔdɑkɛ̀ yɛ̀dɛ́ɛ̀ kɛ́ yɛ̀ còńnɛ́ mɛtɑummɛ̀ tou bòrìnùù,

⁸kɛ́tɑ̃ũ tɛ́tɛ́ kɛ́yɑ̀ dìì yó ntú n kpɛri nɛ̀ bɛ̀ yóó fĩ́ĩnko dì kɛ̀ dìi tɑ dikpɑ́ɑ̀.

⁹Kɛ̀ Anɔɔ n féútɛ́ n kpɛri mɛyɛi nhũtímù kpɛ́í,

¹⁰kɛ́túótɛ́ bɛ̀ yóó tɑnnɛ́ dì dikpɑ́ɑ̀ kɛ́cónnɛ́ mɛtɑummɛ̀ tou ììkɛ̀, kɛ́dɔɔ̀ mɛyɛi ncĩ́ɛ̃́mmɛ̀ kó ikuɔ́ kɛ́deè kɛ̀ bɛ̀ɛ dì tɑnnɛ́ dikpɑ́ɑ̀ tɛdɔntɛ̀.

¹¹Dɛ kó difɔ̃nkúò kɛ́túótɛ́ní dinɑɑdɑɑ̀ o mɔ́mmuɔ nho yɛi nhũtímù kpɛ́í nnɛ̀ o cĩ́ɛ̃̀tɛ̀ kɔbɛ kɔ̃mɛ kpɛ́í nkɛ́ dì nni mbɛnkɛ kɛ́dɔɔ̀ mɛyɛi nhũtímù kó ikuɔ́ kɛ́ dì nni nféútɛ́.

¹²Kòò dèè wèe túótɛ́ tɛsɔɔsékɛ́buutɛ, kɛ́koutɛ́ yɛhɑ̃ɑ̃kũɔ̃ ndiwũɔ̃tɔ̀nnì dìì bo mɛtɑummɛ̀ tou ììkɛ̀ kɛ́ɑ̃nnɛ́ dɛ miɛkɛ, kɛ́yɛ̃tɛ́ tihúúntì dinɑcɛkutiri mɛ̀dɛ́mɛ̀, kɛ́ dɛ̀ tɑnnɛ́ dɛmɔu mɛtɑummɛ̀ tou kó kufɑ̃́ɑ̃́ nkuyɑ̀ɑ̀kù kpetí kù,

¹³kɛ́tuɔ ntihúúntì mɛtɑummɛ̀ tɔu ikuɔ́ nɛntì ɑ̃ dɛ̀ ììkɛ̀, kɛ̀ kuyukúu dɑ́tínnɛ́ di ĩ́nkɛ̀ nɛ̀ di pòkù, kɛ̀ dɛ̀ɛ yie nkòò bɑ́ɑ́ kú.