IKUƆ́ NÌÙBƐ̀ 16:13-33

¹³kɛ́tuɔ ntihúúntì mɛtɑummɛ̀ tɔu ikuɔ́ nɛntì ɑ̃ dɛ̀ ììkɛ̀, kɛ̀ kuyukúu dɑ́tínnɛ́ di ĩ́nkɛ̀ nɛ̀ di pòkù, kɛ̀ dɛ̀ɛ yie nkòò bɑ́ɑ́ kú.

¹⁴Dɛ kó difɔ̃nkúò kɛ́pɔɔ̀tɛ̀ dinɑɑdɑɑ̀ kó mɛyĩ̀ĩ̀ nkɛ́miɛtɛ́ mɛtɑummɛ̀ tɔu kó kupòkù diyiè yiɛ̀ní kɛ̀ɛ̀ bíɛ́kɛ̀ mɛ̀mɑ́ɑ̀, di ììkɛ̀ mɛ̀yiekɛ̀.

¹⁵Dɛ kó difɔ̃nkúò kɛ́ n féútɛ́ kubotí kó mɛyɛi nhũtímù kó dibɔdɑɑ̀, kɛ́tɑnnɛ́ di yĩ̀ĩ̀ nkuyɑ̀ɑ̀kù kpetí kùù fɑ̃́ɑ̃́ nkɛ́dɔɔ̀nɛ̀ di yĩ̀ĩ̀ nhò do dɔ̀ɔ̀mɛ̀ dinɑɑdɑɑ̀ kɔ̃mɛ kɛ́míɛ́tɛ́ mɛtɑummɛ̀ tɔu pòkù fɔ̃nkúò nɛ̀ di ììkɛ̀,

¹⁶kɛ́dɔɔ̀ mɛyɛi nhũtímù kó ikuɔ́ kufɑ̃́ɑ̃́ mmiɛkɛ. Isidɑyɛɛribɛ cɑɑ̀rìmɛ̀ kpɛ́í nnɛ̀ bɛ yetírímɛ̀ n kpɛti nɛ̀ bɛ cɑɑ̀rìmɛ̀, kɛ múnkɛɛ mɛ ndɔɔ̀ mɛtɑummɛ̀ tou dimɔu kɛ yɛ̃́ di bomɛ̀ bɛnìtìbɛ̀ bɛ̀ɛ̀ sĩ̀ mbɛ cuokɛ̀.

¹⁷Òmɔù bɑ́ mbo mɛtɑummɛ̀ tou miɛkɛ ò tɑti dìì mɔ̀nnì kɛ bo dɔɔ̀ mɛyɛi nhũtímù kó ikuɔ́, nɛ̀ ò bo tɑmɛ̀ kɛ́yɛ̀nnɛ̀nní, kòò dɔ̀ɔ̀ o mɔ́mmuɔ nho kó mɛyɛi nhũtímù kó ikuɔ́ nɛ̀ o cĩ́ɛ̃̀tɛ̀ kɔbɛ kɔ̃mɛ nɛ̀ kubotí kɔ̃mɛ kpɛ́í nkɛ dèè.

¹⁸Wèe yɛ̀nní kɛ́kɔtɛ diwũɔ̃tɔ̀nnì dìì bo mɛtɑummɛ̀ tou ììkɛ̀ kɛ́ dì dɔ̀ɔ̀ mɛyɛi nhũtímù kó ikuɔ́, kɛ́wɑɑ́ ndinɑɑdɑɑ̀ nɛ̀ dibɔdɑɑ̀ kó mɛyĩ̀ĩ̀ nkɛ́míɛ́tɛ́ diwũɔ̃tɔ̀nnì bɑ̀kɛ̀ kɛ́fitɛ́,

¹⁹kɛ́pɔɔ̀tɛ̀ o nɔ́mbii dɛ kó mɛyĩ̀ĩ̀ nkɛ́míɛ́tɛ́ diwũɔ̃tɔ̀nnì kucɛ mɛ̀yiekɛ̀ kɛ́ dì wénkùnnɛ Isidɑyɛɛribɛ kó mɛyɛi mmɛ̀ɛ̀ do di sĩ̀nkùnnɛ.

²⁰Kòò wèńkùnnɛ dìì mɔ̀nnì mɛtɑummɛ̀ tou kufɑ̃́ɑ̃́ nnɛ̀ ditou dimɔu nɛ̀ diwũɔ̃tɔ̀nnì kɛ dèè, bɛ̀ɛ túótɛ́ní dibɔdɑɑ̀ dìì kpɑɑ́ kɛ fòù.

²¹Kɛ̀ Anɔɔ nɔ́ɔ́ nho nɔu di yuu ĩ́nkɛ̀ nɛ̀ Isidɑyɛɛribɛ bɛmɔu kó diyètìrì, kɛ́yie mbɛ cɑɑ̀rìmɛ̀ nɛ̀ bɛ̀ yetírímɛ̀ n kpɛti, kɛ́ dì toú ndɛ kó mɛyɛi nkɛ́deè kɛ́ dì duɔ́ nhonìtì bɛ̀ tɑ̃ɑ̃tɛ́ wè kòò dì tɑnnɛ́ dikpɑ́ɑ̀.

²²Kɛ̀ dibɔdɑɑ̀ tɔ bɛ yɛi mɛmɔu kɛ́tɑnnɛ́ dikpɑ́ɑ̀ tɛdɔntɛ̀ kɛ dèè.

²³Kɛ̀ Anɔɔ kɔtɛ mɛtɑummɛ̀ tou kɛ́dɛitɛ mupɑ̀ɑ̀konkperímù kó tiyɑ̀ɑ̀tì, ò do ɑ̃nnɛ́ tì kɛ́tɑnnɛ́ mɛtɑummɛ̀ tou kó kufɑ̃́ɑ̃́, kɛ́ tì dɔú ndɛborɛ̀,

²⁴kɛ́cómmú dibòrì bɛ̀ tɑ̃ɑ̃tɛ́ dì kɛ́wuɔ kɛ́wɛ̃tɛ kɛ́dɑ́ɑ́tí o yɑ̀ɑ̀tì tɛtì kɛ́yɛ̀nní kɛ́kɔtɛ kɛ́ n féútɛ́ fɛɔ̃̀fɛ̀ kɛ́tuɔ nkɛ́ n féútɛ́ kubotí kɔfɛ kɛ́tuɔ, kɛ́dɔɔ̀ mɛyɛi nhũtímù kó ikuɔ́, o mɔ́mmuɔ nho kpɛ́í nnɛ̀ kubotí kpɛ́í,

²⁵kɛ́tuɔ nyiwũɔ̃ bɛ̀ n kùɔ ì mɛyɛi nhũtímù kpɛ́í nyi kó mɛkùɔ̀ ndiwũɔ̃tɔ̀nnì ĩ́nkɛ̀.

²⁶Wèè do tɑnnɛ́ dibɔdɑɑ̀ dikpɑ́ɑ̀ tɛdɔntɛ̀ kòò ɔ́ú o yɑ̀ɑ̀tì kɛ́wuɔ kɛ nɛ́ nɑ kɛ́tɑ Isidɑyɛɛribɛ kɑrì.

²⁷Dinɑɑdɑɑ̀ nɛ̀ dibɔdɑɑ̀ bɛ̀ do n féútɛ́ dɛ̀ mɛyɛi nhũtímù kpɛ́í, nkɛ́tɑnnɛ̀ mɛyĩ̀ĩ̀ mmɛtɑummɛ̀ tou kɛ́dɔɔ̀ mɛyɛi nhũtímù kó ikuɔ́, bɛ̀ɛ dɛ̀ dènnɛ Isidɑyɛɛribɛ kɑrì kɛ́tuɔ ndɛ kɔ̃̀ntì nɛ̀ dɛ mɑɑ nnɛ̀ dɛ piti.

²⁸Wèè dɛ̀ tùɔ nwèe ɔ́ú o yɑ̀ɑ̀tì kɛ́wuɔ, kɛ nɛ́ nɑ kɛ́tɑ Isidɑyɛɛribɛ kɑrì.

²⁹Dɛ yó ntú ikuɔ́ nyi di kpɛ́í nsɑ̃́ɑ̃̀, dibenni tɑ̃̀nkù oyiénwè kó diyiè píínnì, di níí boú dinùù di bɑ́ɑ́ pĩ́ mmutɔ̃mmú mɑmù, dihɛì yɛmbɛ̀ nɛ̀ bɛpɔ̀ɔ̀bɛ̀ dimɔu.

³⁰Dɛ yiè ndi bɛ̀ yóó di dɔɔ̀mɛ̀ mɛyɛi nhũtímù kó ikuɔ́ kɛ́ di wénkùnnɛ di yɛi mɛmɔu.

³¹Dɛ yiè yó ndònnɛ̀ tɛom̀pùtɛ̀ kpɛri ndi di kpɛ́í, kɛ̀ di níí boú dinùù. Dɛ kó ikuɔ́ yó mbomu sɑ̃́ɑ̃̀.

³²Ikuɔ́ nìùtì bɛ̀ cɑ̃̀ńnɛ́ wè koò còú mmɛkùɔ̀ nkòò cɔutɛ́ o cicɛ kó difɔ̃̀tìrì, weè níí yóó dɑ́ɑ́tí ikuɔ́ yɑ̀ɑ̀tì mupɑɑ̀konkperímù kpɛti kɛ́dɔɔ̀ mɛyɛi nhũtímù kó ikuɔ́.

³³Weè níí yóó dɔɔ̀ ikuɔ́ kɛ́wénkùnnɛ mɛtɑummɛ̀ tou kó kufɑ̃́ɑ̃́ nnɛ̀ di mɔ́mɔnni nɛ̀ diwũɔ̃tɔ̀nnì weè níí yóó dɔɔ̀ ikuɔ́ kɛ́wénkùnnɛ ikuɔ́ nìùbɛ̀ nɛ̀ kubotí kumɔu.