LEVITIKO 16:13-33

¹³Bena hari muramura mai bonana na gida ai baine bubua, Iehova vairanai; ela bona hari muramura mai bonana kwalahuna ese maua helaḡana ikaruhina, taravatu nadidia e karuhidia ḡauna, baine ḡovaia, ia basine mase helaoreana.

¹⁴Bena boromakau rarana taina baine abia, imana kwakikwakina amo baine nevaria, maua helaḡana ikaruhina latanai bona vairanai, mairiveina kahana amo baine nevaria, nega hitu.

¹⁵Una murinai ia ese kara rea boubouna nanina baine alaia mase, taunimanima edia; ia rarana danu baine vareailaia, seseahu lalonai, boromakau rarana e karaia heḡereḡerena ma baine karaia, maua helaḡana ikaruhina latanai bona vairanai baine nevari.

¹⁶Unu amo ia ese gabu helaḡana dainai herohemaino karana baine karaia, Israel taudia edia miro bona edia kara dika bona edia kara rea daidiai; kara heḡereḡerena ma baine karaia hebou kalagana dainai, badina be ia na miro besena bogaraginai e miamu.

¹⁷Una negana ai tau ta ese hebou kalagana lalonai basine raka vareai, Aaron ese gabu helaḡana ihaḡoevana totona baine raka vareai negana amo ela bona ia sibona dainai bona ena ruma taudia daidiai bona Israel taudia iboudiai daidiai herohemaino karadia baine kara, ma baine raka lasi.

¹⁸Bena gabu helaḡana amo baine raka lasi negana ai, ia ese ihaboulaina patana dainai herohemaino karana baine karaia: boromakau rarana taina bona nani rarana taina baine abi, ihaboulaina patana doana baine dahulai,

¹⁹bona imana kwakikwakina amo baine nevarilaia nega hitu. Unuhetomana ia ese ihaboulaina patana na Israel taudia edia miro amo baine haḡoevaia bona baine hahelaḡaia.

²⁰Gabu helaḡana bona hebou kalagana bona ihaboulana patana daidiai herohemaino karadia baine kara murinai, ia ese nani maruanena maurina baine hakaua mai Iehova vairanai.

²¹Bena Aaron ese imana ruaosi na nani maruanena kwarana ai baine ato kau; bena ia ese Israel taudia edia kara dika bona edia kara havara bona edia kara rea iboudiai baine gwaurai hedinarai; iboudiai na nani maruanena kwarana ai baine ato kau. Bena tano ḡaḡaena baine siaia lao; tau ta, e abia hidi heḡaeḡae tauna, ese baine hakaua lao.

²²Hari nani maruanena ese edia dika iboudiai baine huahai dauhai; bena tano ḡaḡaena ai baine ruhaia nege.

²³Bena Aaron na hebou kalagana lalonai ma baine raka vareai, dabua aukadia, gabu helaḡana ai e raka vareai negana ai e kara ḡaudia, ma baine dokidia oho, baine atodia.

²⁴Bena baine digu, gabu helaḡana ta ai; una murinai ena dabua ma baine kara, baine raka lasi, ena ḡole-oho boubouna bona Israel taudia edia ḡole-oho ḡauna baine aladia mase, baine haḡole oho, ia dainai bona idia daidiai herohemaino karana baine karaia.

²⁵Kara rea boubouna digarana danu ihaboulaina patana latanai baine haḡolea oho.

²⁶A hari Asasele ena nani e hakaua lao tauna ese ena dabua baine huri bona baine digu; una mirunai ia na taruha lalonai ma baine raka vareai lou diba.

²⁷Bena kara rea boromakauna bona kara rea nanina, raradia na herohemaino totona gabu helaḡana ai e vareailai ḡaudia, na taruha murimurinai bae laohaidia, kopidia bona hidiodia bona taḡedia na bae gabudia, lahi ese baine ḡoledia oho.

²⁸Baine haḡoledia oho tauna ese ena dabua baine huri bona baine digu; bena taruha lalonai ma baine raka vareai.

²⁹Baine mia hanaihanai haheḡanina binai, Israel taumui emui bona bogaragimui ai e noho hedoamu taudia edia: hua ihahituna ena dina ihagwautana ai umui na bavani vaga bona ḡaukara ta basio karaia,

³⁰badina be una dina ai ba herohemaino bona ba ḡoeva; emui dika iboudiai amo ba ḡoeva, Iehova vairanai.

³¹Una dina na helaḡa herea emui ai, taunabunai bavani vaga. Baine mia hanaihanai haheḡanina bunai.

³²Una dina ai hahelaḡa tauna, tamana gabuna ai bae horoa bona bae hahelaḡaia tauna, ese herohemaino karana baine karaia; ia ese dabua aukadia helaḡadia baine kara,

³³gabu helaḡana bona hebou kalagana bona ihaboulaina patana daidiai herohemaino karadia baine kara; bona hahelaḡa taudia bona orea taudia iboudiai daidiai herohemaino karana baine karaia.