Leviticus 15

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

¹Midsuǥù te Nengazen si Moises wey si Aaron

²he keǥiya zan heini ziyà te menge Israilihanen: Emun duen egawas diyà te sudiyà te maama tenged te zaru zin, heeyan is egawas ed-isipen he meremerik.

³Mebpedayun se kenà is kedtiǥis kayi ed-isipen gihapun sikandin he meremerik.

⁴Is minsan hengkey he egkehizeǥaan din etawa egkepinuuwan din egkehimu he meremerik.

⁵Ne is minsan hentei he ebpekesamsam kandin etawa ebpekesamsam te midhizeǥaan din etawa mibpinuuwan din, kinahanglan he ebpìpian din is bisti zin wey mebpemeziǥù, piru ed-isipen pa ǥihapun sikandin he meremerik taman te egkesakep.

⁸Is minsan hentei he egkeilevan kayi he etew, kinahanglan he ebpìpian din is bisti zin wey mebpemeziǥù, piru ed-isipen pa ǥihapun sikandin he meremerik taman te egkesakep.

⁹Is minsan hengkey he egkepinuuwan wey egkeuntuzan din emun ed-untud sikandin te kudà, egkehimu haazà he meremerik. Is ebpekesamsam wey ebpekevitbit kayi, kinahanglan he ebpìpian din is bisti zin wey mebpemeziǥù, piru ed-isipen pa ǥihapun sikandin he meremerik taman te egkesakep.

¹¹Is minsan hentei he egkesamsam kayi he etew te wazà mekepenlùlù te menge velad din, kinahanglan he ebpìpian din is bisti zin wey mebpemeziǥù, piru ed-isipen pa ǥihapun sikandin he meremerik taman te egkesakep.

¹²Is diniyun he egkesamsam kayi he etew kinahanglan he egevaan, ne is minsan hengkey he kayu he mibeelan he azen he egkesamsam kayi he etew kinahanglan he edlùluan.

¹³Ne emun egkeulian en heini he etew zutun te zaru zin, ipelavey zin dèpa is pitu he andew. Ne pìpii zin is bisti zin wey mebpemeziǥù te wahig he ebpuun diyà te serebseb. Dutun te ikewalu he andew kinahanglan he med-uwit sikandin te zezuwa he merepatik etawa dezuwa he limuken diyà te etuvangan te Nengazen diyà te gemawan te Tulda he Edtelevukaayan. Ne iveǥey zin haazà diyà te memumuhat he iyan ebpemuhat dutun. Is sevaha, ne pemuhat he para idlumpiyu ne is sevaha pa, para pemuhat he edtutungen. Pinaaǥi kayi te ebeelan te memumuhat diyà te etuvangan te Nengazen, egkaawà is keremerik keniyan he etew tenged te migawas diyà te sudiyè din, ne egkehimu en sikandin he lumpiyu.

¹⁶Emun is maama egewasan te similya zin, kinahanglan he mebpemeziǥù sikandin, piru ed-isipen pa ǥihapun sikandin he meremerik taman te egkesakep.

¹⁷Is minsan hengkey he manggad etawa lundis he mibeelan he azen he egketiǥisan te similya zutun, kinahanglan he ebpìpian, piru ed-isipen pa ǥihapun heini he meremerik te taman te egkesakep.

¹⁸Emun ebpehilevetà is maama wey vahi ne egewasan is maama te similya, kinahanglan he mebpemeziǥù sikandan is dezuwa, piru ed-isipen pa ǥihapun sikandan he meremerik taman te mahapun.

¹⁹Emun edlelengesa is bahi, ed-isipen sikandin he meremerik seled te pitu he andew, ne is minsan hentei he edsamsam kandin ed-isipen daan he meremerik taman te mahapun.

²⁰Is minsan hengkey he egkehizeǥaan wey egkepinuuwan dutun te vahi he midlelengesa, egkehimu he meremerik.

²¹Is minsan hentei he ebpekesamsam te midhizeǥaan din etawa mibpinuuwan din kinahanglan he pìpii zin is bisti zin wey mebpemeziǥù, piru ed-isipen pa ǥihapun sikandin he meremerik taman te egkesakep.

²⁴Emun ebpekidhilavet is maama te vahi he midlelengesa, ed-isipen daan haazà is maama he meremerik seled te pitu he andew, ne is minsan hengkey he egkehizeǥaan din egkehimu he meremerik.

²⁵Emun edlengesahan is bahi he edrapas te egkepipira he andew etawa edlengesahan pa sikandin te kenà timpu te kedlelengesa zin, ed-isipen gihapun sikandin he meremerik, iring din ded daan emun ke wazè pa haazà maawà. Ed-isipen sikandin he meremerik emun kemulu pa edlengesahi.

²⁶Is minsan hengkey he egkehizeǥaan din dutun te edlengesahan sikandin etawa egkepinuuwan din egkehimu he meremerik.

²⁷Ne is minsan hentei he ebpekesamsam kayi egkehimu he meremerik. Kinahanglan he pìpii zin is bisti zin wey mebpemeziǥù, piru ed-isipen pa ǥihapun sikandin he meremerik taman te egkesakep.

²⁸Emun ed-engked is lengesa zutun te vahi, ipelavey zin dèpa is pitu he andew. Dutun te ikewalu he andew kinahanglan he med-uwit sikandin te zezuwa he merepatik etawa zezuwa he limuken diyà te memumuhat diyà te gemawan te Tulda he Edtelevukaayan.

³⁰Ne ibpemuhat te memumuhat is sevaha kayi he para idlumpiyu ne is sevaha pa para pemuhat he edtutungen. Pinaaǥi kayi te ebeelan te memumuhat diyà te etuvangan te Nengazen, egkaawà is keremerik dutun te vahi ne egkehimu en sikandin he lumpiyu.

³¹Migkeǥiyan te Nengazen si Moises wey si Aaron he kinahanglan he ebpekeventayan te menge Israilihanen is mehitenged te igkehimuwa kandan he meremerik, su wey zan kenà mebpatey emun edseled sikandan diyà te tulda te Nengazen he ziyà te teliwazà te kampu.

³²Iyan heeyan menge sulunuzen mehitenged te maama he egewasan te similya etawa zuen egawas diyà te sudiyè din tenged te zaru zin, wey mehitenged te vahi he edlengesahan etawa edsubra te egkepipira he andew is kedlengesahi zin etawa edlengesahan te kenè pa timpu zin, wey mehitenged te maama he ebpekidhilavet te vahi he ed-isipen he meremerik.