Text copied!
CopyCompare
Paipel - Lifitikos

Lifitikos 15

Help us?
Click on verse(s) to share them!
1Iwe, ewe Samol mi Lapalap a ngeni Moses me Aaron ekei allük
2fän iten ekewe aramasen Israel: Are och chönü a towu seni ewe kükün inis seni eman mwän, ewe chönü a limengau,
3ese lifilifil ika ewe chönü a chüen pu seni ika a ükütiu, a chök limengau.
4Iteiten kieki ätewe mi pu seni och chönü a kon lon epwe limengau. Pwal mettoch meinisin mine ätewe a mot won repwe limengau.
5Iwe, eman mi atapa kien ätewe epwe sopuni üfan o tütü, nge epwe limengau tori lekuniol.
6Nge iö a mot won och mettoch ätewe mi pu seni och chönü a fen mot won, epwe sopuni üfan o tütü, nge epwe limengau tori lekuniol.
7Nge iö a atapa inisin ätewe mi pu seni och chönü epwe sopuni üfan o tütü, nge epwe limengau tori lekuniol.
8Iwe, are ätewe mi pu seni och chönü a atufätä won eman mi limöch, ätewe mi limöch epwe sopuni üfan o tütü, nge epwe limengau tori lekuniol.
9Nge iteiten sokun lenien mot aramas ra aea le mot won man epwe limengau, are ätewe mi pu seni och chönü a mot won.
10Iö a atapa och mettoch ätewe mi pu seni och chönü a chouni, epwe limengau tori lekuniol. Nge iö a eki ei sokun mettoch epwe sopuni üfan o tütü, nge epwe limengau tori lekuniol.
11Iwe, are ätewe mi pu seni och chönü epwe atapa eman, nge esap mwo rupuri pöün lon koluk, ätewe a atapa epwe sopuni üfan o tütü, nge epwe limengau tori lekuniol.
12Nge are ätewe mi pu seni och chönü epwe atapa eu sepi mi för seni pwül, ewe sepi epwe ömmök. Nge ika ewe sepi a för seni mwüch, epwe chök töttöl lon koluk.
13Lupwen ewe chönü a ükütiu le pu, ewe mwän epwe püsin aawit lon ükükün fisu rän fän iten an limelim. Mürin epwe sopuni üfan o tütü lon koluk mi mürina pwe epwe limöch.
14Iwe, lon awaluen rän epwe angei ruoman lisom ika ruoman apansüsün lisom, epwe feito fän mesen ewe Samol mi Lapalap leasamalapen ewe imw mangaku ia aramas ra churi Kot ie, o ngeni ewe souasor ekewe lisom.
15Nge ewe souasor epwe eäniir asor, eman fän iten asoren tipis, nge ewe eman fän iten asoren kek. Ren ei ewe souasor epwe föri asoren amusamusen tipis fän mesen ewe Samol mi Lapalap fän iten ätewe mi pu seni och chönü.
16Iwe, are ewe chan mwän a towu seni eman mwän, epwe atütü unusen inisin, nge epwe limengau tori lekuniol.
17Nge iteiten üf me iteiten mettoch mi för seni silin man a tup lon ewe chan mwän, repwe sop, repwe pwal limengau tori lekuniol.
18Are eman mwän a kon ren eman fefin o ewe chan mwän a towu, ir me ruoman repwe tütü, nge repwe limengau tori lekuniol.

19Iwe, are eman fefin a samaun fefin, neminewe epwe nom lon an limengau lon ükükün fisu rän. Nge iö a atapa ewe fefin epwe limengau tori lekuniol.
20Mettoch meinisin neminewe a kon lon ika mot won lupwen an samaun fefin repwe limengau.
21Iö a atapa kien neminewe epwe sopuni üfan o tütü, nge epwe limengau tori lekuniol.
22Nge iö a atapa och mettoch neminewe a mot won, epwe sopuni üfan o tütü, epwe pwal limengau tori lekuniol.
23Ese lifilifil are neminewe a mot lon kieki ika och mettoch, lupwen eman a atapa, epwe chök limengau tori lekuniol.
24Are eman mwän a kon ren eman fefin mi samaun fefin, limengauan a nom won ewe mwän. Iwe, ewe mwän epwe limengau lon ükükün fisu rän, nge iteiten kieki ätewe a kon lon epwe pwal limengau.
25Are eman fefin a pu seni cha lon chomong rän, nge sap lon fansoun an samaun fefin, ika lupwen a lula fansoun an samaun fefin, epwe chök limengau lon ükükün fansoun an pu seni cha. Epwe limengau usun chök limengauan lon ränin an samaun fefin.
26Iwe, kieki meinisin neminewe a kon lon lupwen ränin an pu seni cha repwe limengau, usun limengauen ekewe kieki a kon lon lupwen an samaun fefin. Nge mettoch meinisin neminewe a mot won repwe pwal limengau, usun limengauen mine a mot won lupwen an samaun fefin.
27Iö a atapa ekewe mettoch epwe pwal limengau. Iwe, epwe sopuni üfan o tütü, nge epwe limengau tori lekuniol.
28Nge lupwen a ükütiu le pu seni neminewe chan, epwe püsin aawit lon ükükün fisu rän, mürin epwe limöch.
29Iwe, lon awaluen rän epwe angei ruoman lisom are ruoman apansüsün lisom o uweerela ren ewe souasor leasamalapen ewe imw mangaku ia aramas ra churi Kot ie.
30Mürin, ewe souasor epwe eäniir asor eman fän iten asoren tipis, nge ewe eman fän iten asoren kek. Iei usun, ewe souasor epwe föri asoren amusamusen tipis fän mesen ewe Samol mi Lapalap fän iten limengauen neminewe mi pu seni cha.
31Iwe, ewe Samol mi Lapalap a üreni Moses pwe epwe aiti ngeni ekewe aramasen Israel usun ar repwe aimwürela seni ekewe mettoch mi alimengaueer, pwe resap mäla lon ar limengau ren ar apiningaua ewe imwenfel seni mangaku mi nom lefiler.
32Ikkei ekewe allük fän iten eman mwän mi pu seni och chönü ika mi towu seni ewe chan mwän,
33pwal fän iten eman fefin mi samaun fefin, fän iten eman mwän ika eman fefin mi pu seni och, pwal fän iten eman mwän a kon ren eman fefin mi limengau.