Genesis 21

1

2

3

4

6

7

8

9

11

12

13

14

15

16

17

18

19

21

22

23

24

25

26

27

28

29

30

31

32

33

35

37

39

40

41

42

43

44

45

46

49

50

¹INGKARTel Sarah renh arntarnt-arek, rarl Sarah renh ilek-angkwarr.

²Abraham ampwanem irrek. Sarah-el awey akely atnyenek.

³Abraham-el renh itnewek Isaac.

⁴Arlta 8 ikwerel-antey renh artwilek, INGKARTelarl renh ilek-angkwarr.

⁵Abraham aherrety 100 anenh.

⁶Sarah angkek, “Akngeyel ayenh irrkngerney anthek. Ingkerrenhel awem, atharl awey akely atnyeneyel, rernem inkwerelhem arrpemarl.”

⁷Rap angkek, “Ingwer-rnemel Abraham ilek, ‘Sarah-el awey aylpaty anthem,’ ra ikwer-rnem irrpelthirrenh. Lyert, ra ampwan aneyel, awey ikwerenh atnyeneyel.”

⁸Isaac kel ilkwerrek. Ra kel amernant arlkwenh, aylpaty menty ipmek. Abraham-el tyenkerr ilkwa ikwer atnyenek.

⁹Sarah-el awey Ishmael renh arek. Sarah-el alharlkwemel Abraham-ek angkek, “Ntwa warrkenh yanh Egypt-areny irrenta! Ampikw ikwerenh-then. Ayeng ilkelhey-angenh ampa Hagar ikwerenh-kety ngkweng-they ampwal-rnem inayntetyek. Ampa atyenhelant ampwal ngkwenh-rnem atnyenerl-ayntetyek, arntarnt-arayntetyek ngarl ilwem-kety.”

¹¹Abraham ahelirrek, Sarah-elarl renh irrentetyek-anem arrkernelhek.

¹²Akngeyel Abraham renh ilek, “Menty arelh yanh-then ampa akely-then menty alpetyek tyarlewa, Sarah-elarl renh ilek-angkwarr. Isaac impen ngkwenhan. Ikwer-they akngerram-akngerrirreyenh arrpemarl.

¹³Arelh warrkenh-kenh ampikw yanh menty-anem. Yanhan alerengkw ngkwenh arrpemarl. Ikwer-they akngerram-akngerrirreyenh arrpemarl.”

¹⁴Abraham-el Hagar renh arranty kwaty-akert anthek amern-then, anpethel akngeynetyek. Hagar-then Ishmael-then irrentek-anem. Ratherr alpek, apmer Beersheba-angkwarr, arlpaw-angkwarr.

¹⁵Kwaty kel ywerrek-anem. Hagar-el awey renh iwerl-alhek, lywenty-itwek.

¹⁶Ra arleng-warl alhek, arrernelhemel, awey renh arekerr, ra ilwekarl-kety.

¹⁷Akngeyel awey renh awek, rarl artnek. Akngey-kenh angel-el irrwerl-they arlkek, “Hagar, ilekek nga artneyel? Aterirrey-angenh. Akngeyel awek, awey rarl artnek.

¹⁸Awey ngkwenh inerl-alha, renh arternpiletyek. Atha ngkwenh-rnem akngerram-akngerrileyenh.”

¹⁹Akngey kwaty Hagar ikwer anayntelhilek. Ra kwaty ngenty arek. Hagar-el kwaty inpek arranty-warl, awey renh anthek, antywetyek.

²⁰Akngeyel awey renh arntarnt-arek. Ra ilkwerrek-anem. Ra apmer arlpawel anenh. Ra akaltyirrek pewenarrek.

²¹Ra arlpawel anenh, rernem apmer renh itnewek Paran. Ingwer-ingeran amikw ikwerenhel anew inek ikwer, aleyak Egypt-areny. ...