Genesis 21

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Midtentenuzan te Nengazen is migkaǥi zin he edhimuwen din diyà te ki Sara sumalà is insaad din.

²Mibmeǥingey si Sara ne in-anak din is maama minsan pa te meǥurang en si Abraham. Is timpu te ked-enaka zuen te vatà, ne iyan en kes timpu he midtelaan he zaan te Megbevayà.

³Ne haazà is batà, migngezanan ni Abraham ki Isaac.

⁴Ne hein ikewalu he andew puun dutun te ked-enaka ki Isaac, midsirkunsidar sikandin ni Abraham sumalà is insuǥù kandin te Nengazen.

⁵Ne 100 en is penuiǥen ni Abraham dutun te ked-enaka te anak din he si Isaac.

⁶Ne migkaǥi si Sara te, “Midhimu human te Megbevayà he mekeengit a te kegkelipey ne ebpekeengit daan te kegkelipey is minsan hentei he egketudtulan mehitenged kayi.

⁷Hentei vuwa is ebpekekaǥi ki Abraham he ebpekepesusu e pa te vatà? Piru nekaanak e pa minsan meǥurang en sikandin.”

⁸Ne hein malù en dekelà si Isaac, wey hein nelutas en sikandin, midtukud si Abraham te zekelà he keemuran.

⁹Ne sevaha he andew, naahà ni Sara si Ishmael (haazà is anak ni Abraham diyà te ki Hagar te Ehiptohanen) is edsudì te anak din he si Isaac.

¹⁰Umbe migkaǥi si Sara ziyà te ki Abraham te, “Segseǥa nu heeyan is uripen he vahi wey is anak din, su kenà egkehimu he ebpekaambit is anak te uripen te egkepenunud te anak ku he si Isaac.”

¹¹Utew heini ingkeseeng ni Abraham tenged te anak din man daan si Ishmael.

¹²Piru migkaǥi is Megbevayà diyà te ki Abraham te, “Kenè nu ikeseeng si Ishmael wey si Hagar. Tumana nu is egkeǥiyen ni Sara, su pinaaǥi ki Isaac is ebpuunan te menge kevuwazan nu he insaad ku.

¹³Piru edhimuwen ku zaan he utew zekelà he nasyun is menge kevuwazan ni Ishmael, su anak nu man daan sikandin.”

¹⁴Meselem pa utew zutun te sunud he andew, migkuwa si Abraham te egkeenen wey lundis he teleǥuey te wahig, ne imbeǥey zin ki Hagar. Ne impevava zin haazà ne impeǥenat din haazà is bahi wey is batà. Ne migenat en dutun si Hagar ne midriǥuriǥu ziyà te sibsivayan te Beersheba.

¹⁵Hein naamin en is wahig dutun te teleǥuey, intaǥak ni Hagar is anak din diyà te sihung te dezeisey he kayu.

¹⁶Ne mid-awà sikandin, he menge 100 he mitrus is keziyù puun dutun te vatà. Dutun sikandin mebpinuu he edsineǥew, ne egkeisip din is, “Kenè ku egkaantus te ed-ahà is anak ku he ebpatey.”

¹⁷Piru nezineg te Megbevayà is ked-erang te vatà. Umbe migkaǥi is belinsuǥuen te Megbevayà diyà te langit te, “Hagar, hengkey is idsineǥew nu? Kenè ka mahandek! Nezineg te Megbevayà is ked-erang keniyan te anak nu.

¹⁸Hitindeg ka ne enawa nu heeyan is batà, su edhimuwen ku he utew zekelà he nasyun is menge kevuwazan din.”

¹⁹Ne zutun impeturedu te Megbevayà si Hagar te kalut, ne midhendiyà sikandin ne midsekezu ne impeinum din is anak din.

²⁰Ne midtuvazan te Megbevayà haazà is batà ne midekelà, ne ziyà med-ubpà te sibsivayan te Paran. Nehimu sikandin he mememanà. Ne zutun impeesawa sikandin te iney zin te vahi he Ehiptohanen.

²²Ne zutun he timpu, midhendiyà si Abimelec te ki Abraham wey is pengulu te menge sundaru zin he si Ficol. Migkeǥiyan ni Abimelec si Abraham te, “Netuenan dey iyan he edtevangan ka te Megbevayà te langun he ed-ul-ulahan nu.

²³Umbe penangdù ka kayi te etuvangan te Megbevayà he kenà a kenikew ed-ekalan ragkes is menge kevuwazan ku. Ipeehè nu kediey is gaǥew nu wey te menge meǥinged kayi te tanà he ed ubpaan nu te lumelengyawà, iring te impeehè ku kenikew is gaǥew ku kenikew.”

²⁴Ne midtavak si Abraham te, “Ebpenangdù a kenikew.”

²⁵Piru zuen riklamu ni Abraham diyà te ki Abimelec mehitenged te kalut he mid-aǥew te menge sakup din.

²⁶Ne migkaǥi si Abimelec te, “Wazè ku metueni ke hentei ki vaal heini. Wazè nu keǥiya kediey ne sikan ku pa mezineg.”

²⁷Ne zutun mid-uwit ni Abraham is menge kerehidu wey vaka ne imbeǥey zin ki Abimelec ne midhimu sikandan is dezuwa te kesebutan.

²⁸Ne zutun migkuwa ni Abraham is pitu he vehiyan he nati he kerehidu zutun te menge kerehidu ne insivey zin heini.

²⁹Mid-insaan sikandin ni Abimelec te, “Ebmenuwen heini is pitu he vehiyan he nati he kerehidu he insivey nu?”

³⁰Ne midtavak si Abraham te, “Kuwaa nu heini is pitu he vehiyan he nati he kerehidu he tuus te neketistiǥus ka he iyan a mibangbang kayi te kalut.”

³¹Tenged dutun te midhimu zan he kesebutan, migngezanan haazà is kalut te Beersheba su zutun dan himuwa is kesebutan dan.

³²Hein nepasad dan haazà is kesebutan dan diyà te Beersheba, migenat en si Abimelec duma ki Ficol, is pengulu te menge sundaru zin, ne mid-ulì dan diyà te tanè dan te menge Filistihanen.

³³Mibpemula si Abraham te sengepuun he kayu he tamarisko ziyà te Beersheba ne mid-azap din dutun is Nengazen, he iyan kes wazà pidtemanan he Megbevayà.

³⁴Neuǥet pa zutun is ked-ubpà ni Abraham diyà te tanà te menge Filistihanen.