Bumpaida 21

1

2

3

4

6

7

8

9

11

12

13

14

15

16

17

18

19

21

22

24

25

26

28

29

30

32

35

37

39

40

41

42

45

46

47

48

49

50

¹Tauma Iawe God saualena rua Sara mampe euda dewasano oto mona waden.

²Abraam gulauidalene wandio God walama ituna rua osowe Sara bulene ita otopa mona gamosan.

³Ita oto sa muleno Abraam otopa ebowa Aisak wane itun.

⁴Tane me mulene wandio walama 8 dialeno, God Abraam mapo diena rua eueuwa baiwa etepa osowe ete nonowa dewawa dewasan.

⁵Tane Abraam wandio enawa 100 wadeno Aisak mulen.

⁶Tane Sara wanase, “God nuaeu wadene mainawosan ita apana uara umanana etapue wimopuo ne do nuaeuntata.”

⁷Ita me osowe wane wanase, “Mai mida da mapo Abraam diape waponase, e manaina ando oto gamolepi e baia ita tauma me gulauidaleno ne oto wadana.”

⁸Tane oto Aisak mulene ama nanawa ena walamawe Abraam me odawa debama dewasan.

⁹Ita mo waimoie Ismael Aisak nata owantoie sowa ituaisisadio Sara ewamon. Tane Ismael me ipa Abraam otopa Isibt iwa nolau dewalala Eiga gamosana.

¹⁰Ita Sara Abraam diene wanase, “E i ema otopa nata waaubamowo antopu, ne mai menaneipona e boitawo aupaawo dewa da e manawoa me mampelepio wadepi.”

¹¹Abraam aia ema etene nuabolalen. Ipawa Ismael ipa me otopa.

¹²God Abraam diene wanase, “E nolaa dewalala Eiga otopa nata mai nuabolauitaa. E dana umanawa ne sauaena ando Aisak bedewe segalepi. Sa baiwa Sara dima wana ruawaita.

¹³Tane nola dewalala iwa oto wadena ipa e otoa, ando ne me dewasapo damba debamalepi ita do uwa dea segalepi.”

¹⁴Tane imonemba tadinaida Abraam enenwisene nana ita esa dugiwa, pue etepa mampe dewasaiena bedewe esa utene wadene Eiga otopa nata wanamone waaubamono antoiena. Tane Eiga otopa nata antoie into bola Beasiba sala makowa bedewe koantone lakasanton.

¹⁵Ita mo esa naieno dialeno baiwa me oto wadenaisie ia golaupe itune en.

¹⁶Tane me seu aubeio aleidie enediitudedia makawa rua waine insediase, “Ne mai oto ewepino emanawo bolepi.” Ita waine ke wadie.

¹⁷Ita oto itulene ke wadio God eten, sa baiwa me enseliwa Eiga diene wanase, “Eiga dima kadilen? Mai saitaa God otoa kewa eten.

¹⁸E aite oto wadaaposie witape wadee banle aitaa, ne me dewasapo damba debamalepi.”

¹⁹Mape God Eiga emawa wadenaubeno esa ewen ita alene dugiwa mampe esa utene oto waneno nan.

²⁰Tane oto sa muleidio rua God ipa me do ita me e mampe waenlempa apanawa segalen.

²¹Ita me Paran sala makowa bedewe wandio me inawa alene Isibt iwa wadene wisene otopa wanen.