1Rachel ahelirrenh Leah-ek, ampa rantarl atnyenek-they. Rap Jacob renh alharlkwemel ilek, “Ayeng ilweyenh ampeweny-antey.”
2Jacob rarl awek-penh, ra antwerr-anem anenh ilelhemel, “Ayengan arlarl Akngey-wenyarl. Nhenhan Akngey-kenh-angkwarr.”
3Rachel-el anew renh ilek, “Warrkenh atyenh Bilhah ikngwerl-alpa, ngkweng-itwek ayntetyek, ampa ntwa atnyenetyek ikwer-angkwarr.”
4Rachel-el arelh warrkenh Bilhah ilanthek, Jacob-itwel itengirretyek. Kel ratherr itengirrek, Jacob arelh warrkenh ikwer-itwel ayntek.
5Bilhah ra ampa akely atnyenek, awey akely.
6Rachel renh itnewek Dan alakenh angkemel, “Akngeyel ayenh arntarnt-arek, Akngey atyeng awelhek atharl renh ayernek, kel ayenh awey akely anthek.”
7Rachel-kenh warrkenh Bilhah, ra ampa ingwer atnyenek, Jacob-kenh.
8Rachel angkek, “Ayengarl arrkernelhenh, kel angkwerey atyenh atha antengilek.” Rap awey akely renh itnewek Naphtali.
9Leah iterrek kel ampa anyent ilenh ra atnyenek, ingweran ra atnyeney-angenh, arrangkw-anem. Ra arelh warrkenh ikwerenh Zilpah ilanthek, Jacob-itwel itengirretyek.
10Ratherr awey akely atnyenek.
11Leah angkek, “Nhenh mwerr-angkwarr alakenh.” Ranem awey akely renh Gad itnewek, alakenh aynteyel angka ikwerenhel, “Nhenh mwerr-angkwarr alakenh.”
12Zilpah ra awey ingweran atnyenek.
13Leah angkek, “Irrkngerney-anem ayeng aneyel. Arelh ingwer-rnem atyeng angkerreyel, ayengarl irrkngerney-anem aneyelek.” Leah-el renh itnewek Asher.
14Kel rernem ntang weyt akwetyemel warrkirrek, awey Reuben-el amern mandrake-angketyarr arek, amern irrwarlp-apeny. Kel ra amern mandrake akek, amikw ikwerenh-warl akngey-alpek. Rachel-el Leah renh ayernek, “Awey ngwenhel amern mandrake irrpety ayenh anthey.”
15Leah-el renh ilek, “Kel amern mandrake-anemarl ntwa raketyek arrkernelheyel.” Rachel-el Leah renh ilek, “Ntwa amern mandrake ayenh anthem, nga Jacob-itwel iteng ayntey-kety.”
16Atwerrp, Jacob kel apey-alpek, amern weyt-angketyarr-they. Leah ikwer anekirrek, angkemel, “Nga lyert atyeng-itwel ayntetyek. Awey atyenhel Rachel amern mandrake renh kwartewemel anthek-apeny.” Kel, Jacob Leah-itwek ayntek.
17Akngey Leah-ek inkwerelhemel awelhek, rarl renh ayernek, ampa renh anthetyek. Leah-el ampa akely atnyenek, awey anyent. Jacob-kenh awey 5-pel anek, Leah ikwer-angkwarr.
18Leah angkek, “Akngey atyeng inkwerelhek, atharl warrkenh atyenh ilanthek, Jacob ikwer ratherr iteng anetyek.” Ranem renh itnewek Issachar.
19Leah-el ampa ingwer atnyenek, awey akely. Jacob-kenh awey 6-pel-anem anek, amikw anyent-kenh 6 Leah-ek.
20Leah angkek, “Akngeyel ayenh ampa akngerr anthemel kwartewek. Anew atyenh atyeng inkwerelhem, aylernekanthenharl awey 6-pel aneyel.” Ranem renh Zebulun itnewek.
21Ikwer-penh Leah-el kwey akely-anemarl atnyenek, renh Dinah itnewek.
22Akngey Rachel-ek amperrngirrek, irrepernek, rarl renh ayernek, ampa renh anthetyek.
23Rachel ra ampa ingweran atnyenek, awey akely. Ra angkek, “Akngey atyeng amperrngirrek irrepernek, ampa ayenh anthetyek. Ingwerel-anem nthakenh ayenh kwanthey-angenh, ayengan ampewenyarl.”
24Ranem renh itnewek Joseph alakenh angkemel, “Atha Akngey renh ayerney, awey akely ingwer-anemarl ayenh anthetyek.”
25Joseph, Rachel-kenh awey akely ayntek. Jacob Laban-warl angkek, “Ayenh ntwa tyarlewetyek,
26ayeng apmer atyenh-warl-anem alpetyek. Anew atyenh-atherr-then ampernem-then anwernantherr ingkerrenh alpetyek. Ayeng ngkweng warrkirrek.”
27Laban-el renh ilek, “Nga atyeng arlkwententy, atyengel-arleng anarl! Artwa tyakel ayenh ilek, Akngeyelarl ayenh arntarnt-arek, ngkweng-angkwarr.
28Ilek atha ngenh kwartewem, nga inkwerelhetyek?”
29Jacob-el renh ilek, “Ayeng ngkweng mwerr-angkwarr warrkirrenh. Aker ngkwenh akngerr innganem irrek.
30Lyertenyank ayeng apmer nhewarl apetyek yep-yep irrpetyaparl ngkwenh ntwa atnyenek. Anamerl yep-yep ngkwenh akngerrirrek. Akngeyel ngenh arntarnt-arenh, atyeng-angkwarr. Ayeng ipmelheyek warrk nhethey, atyenh-rnem-anemarl atha arntarnt-aretyek.”
31Laban-el renh ayernek, “Ilek atha ngenh antheman, nga nhel atyeng-itwel anetyek? Ilek-angkwarr ngkweng mwerran?” Jacob-el renh ilek, “Kel menty, man-weny. Ngkwelty ntwa ayenh antheyang. Yep-yepel-then nanikwetel-thenant ntwa ayenh kwartewa.
32Atnwenth irrpwerlant ayenh antha lthweyakw, arlkeny-arlkeny. Irrpwerl-rnem-then lthweyakw-lthweyakw-rnem-thenant ayenh antha! Kel ayeng inkwerelhem ilenh-rnemant ntwa ayenh anthentyek.
33Ntwa alhengk-aretyek irrpwerl-then lthweyakw-lthweyakwantarl ntwa ayenh anthek, atha ngkwenh anyelkel yep-yep-rnem inentyek, ntwa alhengk-aretyek, yep-yep ngkwenh-rnem, atharl yep-yep ngkwenh-rnem irrtyertel-inekerr.”
34Laban ikwer angkek, “Mwerrarl ilenh-angkwarran.”
35Arlta anyent ikwerel-antey Laban-el atnwenth lthweyakw-lthweyakw-rnem-then irrpwerl-rnem-then ikweran amentilek, ikwerenh-rnem ament arrpemarl akngakek. Alerikw ikwerenh-rnem ra arrernek, yep-yep ikwerenh-rnem rernem arntarnt-aretyek.
36Laban-el Jacob renh ilek, “Arlta irrpetyel alpa yep-yep ilenh-rnem-akert, nanikwet-rnem-then.”
37Jacob-el arwerl akek walyenp, arwerl akngerr. Arwerl-penh rltimp alerrkw, lthweyakw-lthweyakw ilemel.
38Arwerl renh-rnem rnkernek kwaty trough impalthek, yep-yepel-rnem kwaty-warl apetyentyel arwerl renh-rnem aretyek.
39Akwerrk lthweyakw-lthweyakw-rnem-then akngerr-anem anek.
40Laban-kenh-rnem lthweyakw-lthweyakw-rnem akngerr arrpemarl. Laban-kenh lthweyakw-lthweyakw-rnem pweytilek ikwerenh-rnem-warl. Akwerrk lthweyakw-lthweyakw-rnem akngerr-anem irrek. Jacob-el muster-emileynek anetyek akngakeynek lthweyakw-lthweyakw-rnemant, ikwerenh-rnem-warl pweytiletyek.
41Yep-yep rlterrk-rnem-kety arwerl-rneman alperr-akertan rnkernenh arrpemarl ra. Alakenh-anyem Jacob-el arlwerrek ikwerenh-rnem rlterrk ingkerr. Laban-kenh-rnem rlterrk-weny-antey.
42Yep-yep-rnem nanikwet-rnem-then mwerr ingkerrenh arntety-weny akngerrirrek ikwerenh.
43Jacob man akngerr-akert-anem, yep-yep akngerr-akert, nanikwet akngerr-akert, kamwerl arrpemarl ikwerenh tangkey akngerr arrpemarl ikwerenh, artwa warrkenh-rnem akngerr arrpemarl ikwerenh.
