1Ra Anumzamo Serana, kema huntenere eri knare hunenteno ko'ma huvempa hu'nea kere, Agra Serana eri knare hunte'ne.
2Sera'a amu'ene huno ne' mofavre ksente'ne, Abrahamu ozafa retegeno ksentegahane huno Anumzamo asmi'nea kna egeno ksente'ne.
3Abrahamu ne'mofavre, Sera'ma ksentea mofavre'a Aisaki'e huno agi'a ante'ne.
4Hanki Abrahamu'a nemofo Aisakina 8ti'a zgegnare, Anumzamo'ma asmi'nere agoza avufga anoma'a tga hunte'ne.
5Abrahamu'a 100ti'a zgegfu mani'tegeno mofavre Aisakina Sera kasentene.
6Sera'a amanage hu'ne, Anumzamo naza hige'na kizaneroe. Vahe'mo'za antahisuza nagrane kiza regahaze.
7Anage huteno Sera'a amanage huno hu'ne, Iza Abrahamuna, Sera'a mofavre'a ante omigahie huno hugahie? Ana hu'neanagi menina agra ozafarefinka mofavre kse amue.
8Ana Mofavremo nena huno ami a'o nehigeno Abrahamu'a ra ne'za kre'ne.
9Mago zupa Sera'a keana Hega, Isipi a'mofo mofavre, Abrahamunteti ante'nea nemo avaharo nehigeno ke'ne.
10Sera'a amanage huno Abrahamu asmi'ne, Erizanti'a e'neria a'ene mofavre'anena zanahenatige'ne vio, eri'za a'mofo mofavremo'a fenonka'a e'origahie, mofavre'nimo Aisaki erigahie.
11Anage nehigeno nentahino, Abrahamu'a mofavre'agu tusi rimpagna hu'ne.
12Hianagi Anumzamo asami'ne, Abrahamuga krimpa haviza osuo, na'ankure mofavrene eri'za a' kagura kagesa ontahio, Sera'ma naneke kasmiaza huo, Aisaki'pinti kagehe'za fore hugahaze.
13Eriza a'mofo mofavrefintira Nagra zamazeri hakare ha'nena rankuma ante'za manigahaze. Na'ankure zamagra kagri kageheze.
14Hanki Abrahamu nanterame otino bretine, zgakfa avufgare tafempi tifino Hega afunte nenteno mofavre'a amino hunte'ne. Hanki Hega atreno Birseba ka'ma kopi vu'no umani'ne.
15Anampi zgagfa avufgare tafempi ti afine vuna'a timo vgaregeno, mofavre'a osi zafa agafare ome ante'ne.
16Hega vuno mago kaziga tvaonte keve ahetregeno vuno umania kna zaza'a umanineno amanage hu'ne, Negesugeno mofavre'nia fri zankura navresra hie nehuno, krafa huno zavi ate'ne.
17Hianagi Anumzamo antahi'ne, ne' mofavremofo zavike'a, Anumzamofo ankeromo monafinti amanage hu'ne, Hegaga kagripina na'a hu'ne? Koro osuo, antufi mani'neno ne'mofavremo zavima neteana Anumzamo antahi'ne.
18Otinenka ne'mofavre azante azeri otinka avro, Nagra azeri ra hanugeno tusi'a vahe fore huno rankuma antegahie.
19Anumzamo ana a'mofo avurga azeri hari higeno keana mago tinkeri me'negeno ke'ne. Keteno vuno zgagfa avufgare tafempi ti afino ana mofavre ome amigeno ne'ne.
20Anumzamo ana ne'mofavrene mani'negeno nena huno, ka'ma mopafi ati ahe'zante harfa ne mani'ne.
21Agra ka'ma mopafi Parani mani'negeno, nerera'a Isipi mopareti a' ome avreno eme ami'ne.
22Ana zupage Abimeleki'ene vugota ha' kva ne'a Fikoli'ene amanage hu'ne Abrahamuna asmina'e, Anumzamo kagrane mani'neno maka'za hanazampina kzeri knare nehie.
23Hanki kagra amafina tmage hunka Anumzamofo avufi huvempa hunka nasmio. Nagri ene, mofavreniane, nagehe'inena reravatga hunka haviza huoranto, knare navunva hugante'noaza hunka nagrira knare kvukva hunanto, amama emani'nana mopafina.
24Abrahamu huno, Nagra huvempa huankina kema hanaza hugantegahue hu'ne.
25Ana hianagi Abrahamu'a tinkeriagu Abimelekina keaga hunte'ne, na'ankure Abimeleki eri'za vahe'mo'za tinkeria hanare'nazagu hu'ne.
26Abimeleki amanage hu'ne, nagra ontahi'noe, iza e'inahu'zana hu'nefi, kagra onasminkena ontahi'noe, hanki meni nentahue.
27Abrahamu'a mago'a eri'za eri kaoma (oksen), sipisipima refko huno Abimelekina eme nemino, anante raru hu'ne tragote'ne manisa'a naneke huvempa (covenant) hu'na'e.
28Abrahamu 7ni'a sipisipi a' anenta avreno arure ante'ne.
29Abimeleki amanage huno Abrahamu antahige'ne, ami 7ni'a a' sipisipi anentara nankna kagukagesare avre ruotge hu'nane?
30Abrahamu amanage hu'ne, kagra ama 7ni'a a' sipisipi anentara nazapinti kamuana erigeno, anazamo hu'ama huranteno ama tinkeri nagra kafinoe hino.
31E'i kumara Bersibe huno agi'a ante'ne, na'ankure anante tarega'moke huvempa ke hu'na'e.
32Hanki zamagra huvempa Bersiba hute'za, Abimeleki ene Fikoli ha' kva ne'ane otine mopa zniarega Filistia vu'na'e.
33Abrahamu tamarisk zafa Bersiba negrino, anante manivava Anumzante Ra Anumzamofo agi hanta vazine.
34Abrahamu'a zaza kna Filistia vahe mopare mani'ne.
