Genesis 42

1

2

3

4

6

7

8

9

11

12

13

14

15

16

17

18

19

21

22

23

24

25

26

27

28

29

30

31

32

33

35

37

39

40

41

42

43

44

45

46

49

50

¹Jacob-el awek ntang weyt-angketyarr apmer Egypt-itwek, angkemel, “Ilek arringkerr apatemel aneyel?

²Atha awek Egypt-an ntang weyt-angketyarr. Arringkerr ingkerrenh alhenherr-arey Egypt ikwer-warl ntang weyt inerl-alpetyek, angayakwirrekerr.”

³Joseph-kenh awayikw 10-pel alhek apmer Egypt-warl.

⁴Jacob-el alerikw akelyan thweney-angenh. Anterrkwek apmer-itwek-antey. Ra aterirrek atwekerr apek renh.

⁵Jacob-kenh-rnem anyentirrenhek angayakw ingwer-rnem-angkwarr, Egypt-warl rernem alhek.

⁶Joseph ra Atyetyart anenh apmer-rnem arntarnt-arayntetyek, ntang weyt-rnem arlperrtyilemel anthayntetyek. Awayikw ikwerenh-rnem apetyek ikwer-warl, kwenirrey-alhemel ikwer-itwek.

⁷Rernem Joseph renh alhengk-arey-angenh, rant renh-rnem alhengk-arek, ra ingwer-arrpantey anenh. Ra renh-rnem iltek, “Nthenh-they arringkerr apetyek?” “Anwingkerr apmer Canaan-they apetyek, ntang weyt inerl-alpetyek, amern-weny-kety,” rernem renh ilek.

⁹Joseph ra iylpangkek, rarl altyerr awank arek, “Arringkerr arlwarrernerl-ayntetyek, ahelengkw-rnem apek.”

¹⁰Rernem angkek, “Arrangkw anwingkerran arwarl apetyek, amern ntang weyt-angketyarr-warl, amern-weny-kety.

¹¹Anwingkerr ingkerrenh artwamp anyent-kenh-antey. Anwingkerr arraty ileyel, irrtywerremel iley-angenh. Anwingkerr iylpareth inngarl, irrtywerremel iley-angenh.”

¹²Joseph-el renh-rnem ilek, “Arringkerr apmer renh arlwarrernerl-alpetyek, arringkerr irlkenty-akert apey-alpey-alenty, apmer nhenh-itwek atwetyek-anem.”

¹³Rernem Joseph renh ilek, “12-an anwingkerr anekan, artwamp anyent-kenh-antey. Akelyan artwamp anwekingkerrenh-itwek anerl-anem Canaan-itwek. Anyent ingweran ilwekarl.”

¹⁴Joseph-el renh-rnem itwengetilekan, “Arringkerr artwa ahelengkw-rnem apekan.

¹⁵Alerl atha arrenhingkerr iterl-arey-tangkwel, artwa ahelengkw-rneman. Atyetyart Pharaoh iteth aneyel-apeny, arringkerr apmer nhel anetyek, aytey arrekingkerrenh ra apetyeyek-awaty.

¹⁶Anyent apmer-warl alpey ayteyikw inerl-alpetyek atyeng-warl akngetyemel. Awayikw ingwer-rnemarl tyayl-itwek anenherr-arey.”

¹⁷Ra renh-rnem tyayl-ek ingkerrenh akwernek, rernem arlta irrpety tyaylel anek.

¹⁸Joseph-el renh-rnem ilek, “Ayeng Akngeyekant iterreyel. Alerl-apeny atha arrenhingkerr ipmem. Anyent ingweran tyayl-itwek anayntem.

¹⁹Arringkerr ilelhek, arringkerr artwa mwerr akwel. Arringkerr atyeng mwerr-angkwarr awelhenty, atha arrenhingkerr ipmek atwey-angenh. Arringkerr aytey arrekingkerrenh ikngwerl-alpa atyeng-warl akngetyemel, atha renh aretyek. Atha renh arenty, athap arrenhingkerr iterl-arem, arratyarl ileyel atyeng.”

²¹Ikwer-penhan rernem angkerrenh, “Akngeyel anwenhingkerr atwem, anwingkerrarl Joseph renh awank irrkewarl iwek-penh.”

²²Reuben angkek, “Atha arrenhingkerr ilek, awey atwey-angenhek. Arringkerr atyeng awelhey-angenharl, Akngeyel anwenhingkerr atwemant-anem.”

²³Rernem iterl-arenh Joseph-el-arl angka ikwer-rnem-kenh awey-angenh-arrpantey. Joseph angkenh angka Egypt-areny-kenhel, artwa ingwerelarl angka anayntilek ikwer-rnem. Rernem ikwer iterrenh iylpa arwengkek-arrpantey, angka ikwer-rnem-kenh awey-angenh.

²⁴Joseph intwemelirrek, artnemel-anem. Ikwer-penhan ra angkek arrpemarl ikwer-rnem-warl. Ikwer-penhan ra warrkenh ikwerenh ilanthek, ra Simeon rwepel arertnetyek.

²⁵Ikwer-penhan Joseph-el warrkenh ikwerenh thwenek, ayteyikw ikwerenh-warl alhetyek, yakweth-warl man angkep irrtyert akwernetyek ikwerenh, angkep antheynetyek ikwer, rarl amern payemelek. Ra ntang-rnem yakweth arrpanenh arrerneynek, ntang-rnem-then man-rnem-then.

²⁶Rernem ntang tangkey-warl tywenek, alpek-anem rernem.

²⁷Ingwel rernem ayntey-alpek ampepel. Artwa anyentel yakweth altywerilek, man-akert tangkey wantetyek, rap man amern-akert kwen.

²⁸Ra ilek, “Angwenhel man angkep antheynek, yakweth-itwek aynteyel?” Rernem ater-anem irrek, “Nthakenh Akngeyel anwenhingkerr angwenhileyel?”

²⁹Apmer Canaan-warl rernem alpek, rernem aynikw ikwer-rnem-kenh angka ilek-ilek iley-alpek ikwer-warl.

³⁰“Egypt-areny Atyetyartel anwenhingkerr artwa ahelengkw-arrpantey arey-ayntek, apmer arlwarrernerl-anenty-arrpantey.

³¹Anwingkerr renh ilek, ‘Anwingkerr artwa mwerr-rneman ahelengkw-wenyarl.

³²12-an anwingkerr anekan, artwamp anyent-kenh-antey. Akelyan artwamp anwekingkerrenh-itwek anerl-anem Canaan-itwek. Anyent ingweran ilwekarl.’

³³Atyetyartel anwenhingkerr itwengetilekan, ‘Alerl atha arrenhingkerr iterl-arey-tangkwel, artwa ahelengkw-rneman. Atyetyart Pharaoh iteth aneyel-apeny, arringkerr apmer nhel anetyek, aytey arrekingkerrenh ra apetyeyek-awaty.

³⁴Arringkerr aytey arrekingkerrenh-akert apey-alpetyek, atha arrenhingkerr iterl-aretyek, arringkerrarl artwa mwerr-rnem, ahelengkw-weny.’”

³⁵Rernem yakweth-rnem altywerilek. Rernem arek man ingkerrenh ayntenty. Rernem aterirrek, aynikw aterirrek arrpemarl.

³⁶Jacob-el alerikw-rnem ilek, “Arringkerr awey atyenh atyeng-they rakek. Joseph-an arrangkw, Simeon arrangkw arrpemarl. Arringkerr ilkelheyel Benjamin raketyek arrpemarl, alakenh irrwernek?”

³⁷Reuben-el aynikw ikwerenh ilek, “Ayeng Benjamin-weny arrangkw apey-alpenty, ntwa aler atyenh-atherr ipmek atwem. Atha renh arntarnt-aretyek, akngey-alpem innga.”

³⁸Jacob angkek, “Benjamin, alerey akely atyenhan atha nthakenh Egypt-warl thweney-angenh, alerey atyenh arrwekel ilwek-ketyarl. Alerey anyent-anem atyenh impen-antey, nthakenh tyarlewey-angenh ra alhetyek. Ayeng ikwer amperrngirrerl-anekerr, arringkerr renh akngentyan.”