Óosana 21

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Karaambáiqa narí qímaqoondee ínoo Saráqa námmarina ámiqi ámiqimma ámaqanau.

²Miqímmasoofanóo Abaraqaammáfa náuraiqi márufanoo Saráqa námmarifa ámuaqu qáikinoo Abaraqaammána faiqì Ánutufa qímaqooqoo máqanau.

³Maqasoofanóo Abaraqaammáfa miná áuqu Isakeeneé qinau.

⁴Áuqu rámaséenoo qísauku dínni taikásee dínni ani qaaramoó maraséenoo 8 faasaana áiqaramá fufanóo Abaraqaammáfa Ánutufa qímamúndee ínoo Isakeena afaaqa áti ateeká áqinau.

⁵Abaraqaammáfa uan handeeréeta 100 áukuana faqáafa márufanoo Isakeena máqanau.

⁶Saráqa námmarifa Isakeena maqaséenoo maaqí qinau. Ánutufa asasírana faqa naanaidara qírana faqa qíminoo. Aiqámausa minára írinausa qiní faqa naanaidara qífáranoo.

⁷Miqí qímaseenoo Saráqa námmarifa maaqí qinau. Yáfee moó fánnoo Abaraqaammána qímaminoo Saráqa námmarifa narí faiqì maqasée amana náamma ámiannoo fee qíannoo fée, sía amana moó fánnoo miqí qíannoo. Miqí qímariafaqa qinee asooqá námuki Abaraqaammána faiqì akoonaiqí máqeeqa.

⁸Isakeefa áaqoo írinoo náamma minnísoo fáasaana Abaraqaammáfa qoomáqa firaaqóo suqánanau.

⁹Miqímmasee máriufanoo moó kári Isipa máqannaa ánaasee Akaara námmarina ámaaku fannoo Saráqa námmarina ámaaku Isaakeena faqa sararí márinau.

¹⁰Sararímarufanoo Saráqa námmarifa miná qáfamaseenoo Abaraqaammána qímaminoo qinau. Maa ainainira manaaqána fáqa narí faiqì fáqa niiqáinaqa fuaqa. Maa anaaseená faiqì fannóo sía aní qumíasana qiní faiqì máraree qínnana máraannoo.

¹¹Isamaeeráfa faqa Abaraqaammána faiqì márunara Abaraqaammáfa mi ufána írufanoo aundurá ummaara ranau.

¹²Miqúfanoo Ánutufa Abaraqaammána qímaminoo qinau. Sía faiqì ánaaqi qísanoosára ámuqusiani. Anée Saráqa námmarifa qímamindee ía. Isakeena sáaqari kai qinee qíma afeekaikíafannandée ínoo moómoo asumu kambíqeefaránoo.

¹³Aní aináinira ánaasee faiqì fáqa qinée dadaaqíananoo moómoo faiqì maqasáinaqa moó máqannaasara foorá marifaranoo. Mifá faqa aní faiqì kái máridanoo.

¹⁴Abaraqaammáfa mi ufána iriséenoo moó kánanaana fíndifinoo féemu áafaqa faqa aandáù apata táquki nammári sakaséenoo Akaara námmarina uqáruma amiséenoo faiqì áakuamaqáseenoo aiqanau. Akaara námmarifa narí ámaaku áfiqeenoo Beeraseeba máqa máaqaki aadána máqa máaqaki óoqu máridanoo óonuree anirée ída márinau.

¹⁵Aandáu apata táqukinaa námmari aiqáma taikáfufanóo Akaara námmarifa narí faiqì káqikaa sáqari atukakí áisanau.

¹⁶Aisáseenoo káqikaaqóo kísaaqasaa óonu óoqufaqee ídanoo narí kaí qímirinau. Qinée sía amana qeeqá faiqì kúqirana qáfaanauranoo. Miqí qímaseenoo miqóo óoqufaaqée máridanoo ikí ráqee márinau.

¹⁷Miqí márufanoo Ánutufa mi faiqína ikí ráqarana írufanoo innaarúnaindari Ánutuna angiroo moó fánnoo Akaara námmarina qímaminoo qinau. Akaara námmari anée nánaree ummaara máraidanee. Sía rufíaa. Aní ámaaku ikí ráqarana Ánutufa dóo írinoo.

¹⁸Dóo fíndi fínana óonu faiqì rafúsusee ámiqi ámiqia. Qinée miná sáaqari kambíqainausa firaa maqannaasaiká mánnisaanaura.

¹⁹Miqí qímaseenoo Ánutufa Akaara námmarina áfu maqa ámufanoo nammári mádika qáfanau. Qáfamaseenoo aandáù apata táqu mara máreenoo óoqu saka narí faiqì ámufanoo nanau.

²⁰Ánutufa Isamaeerána rakísi ámaqee márufanoo innooqánau. Innooqáfufanóo mifa Paraana aadána máqa maaqáki máridanoo uaqárana akoofása márinau.

²¹Paraana aadána máqa máaqaki márufanóo miná ánoofa Isipa máqusaindaraa mánaaqa mara áminau.

²²Mi karí Abimeereekáfa Pikoorana narí rákira fásiqauqa uriqararana áfiqeenoo Abaraqaammáfa máruqoo óonu réeqa maaqí qímasee qímamiqa qiqau. Anée aiqáma áinaina áuqaannánaki Ánutufa dadaaqídanoo.

²³Doo maqee Ánutuna áfusaa qíma afeekaikámmásee qiní faqa qiní faiqi námu faqa qiní sáaqari náaru kambíqainausa faqa sía mandáikamma nímaqaa. Qinée aní ámiqimma ámaqáqiafana anée faqa miqí kai ínana qíma afeekaikámmásee qiní faqa maa maqa maaqána anee márianna maqa maaqána fáqa ámiqimma qímaqaa.

²⁴Abaraqaammáfa minára iriséenoo qímaminau. Qinée miqímmianauree qímasee qíma afeekaíkinau.

²⁵Miqí qímaseenoo Abaraqaammáfa Abimeereekána óori kándara úfakiqari qímaminau. Aní aináinira fáiqiuqa qiní nammári mádika rákirara máseeqa máreeà.

²⁶Abimeereekáfa iriséenoo qímaminau, Qóo qinée sía miná íridaqa, yáfee miqínoo fee. Anée minára sía qíma qímunaqa sía íriqiafana. Maqee káì íridaqa.

²⁷Abaraqaammáfa minára iriséenoo burimakáuqa faqa sipsípauqa faqa maréeqee Abimeereekána áminau. Amisée miqandá moodáanaki kiqáu.

²⁸Abaraqaammáfa sipsípa ánaaqiuqa dínni taikásee dínni ani qaara marasée 7 náadumasaa rainá quqánau.

²⁹Abimeereekáfa miná qáfamáseenoo Abaraqaammána irámirinau. Anee nánaree miqídanee.

³⁰Miqí qímasee iroofanóo Abaraqaammáfa qinau. Anée maanáuqa máraà. Anée márainnanannóo qiníara maa nammari dikaandána indu fínaufoo qinnáranoo.

³¹Misá miqóo qíma afeekaiká máseeqa mi maqusána áuqureeqa Beeraseeba fée qiqau.

³²Miqanda Beeraseeba máqa máaqaki moodáanaki kíra úfa qímasoofanoo Abimeereekáfa narí rákira fásiqauqa úriqararana Pikoorasandíri nárì maqúsai Firistia máqa máaqai fiqau.

³³Miqandá fufanóo Abaraqaammáfa tamarisika sáqari Beeraseeba máqusai úmmaquseenoo náaru náaru márira Káraambaiqa Ánutunara innaaru qímarinau.

³⁴Mi kamúqoo Abaraqaammáfa kísaaqasaa Firistia máqa máaqakina márinau.