1Ma aram me fekeg fare mo’on ngalan e thal ni wuru’ e yoror nge soregneg nga ba naun ni bay u lel’och ko fare Tempel, ni de palog ko fa binem e naun u taban fare Tempel ko ngal.
2Biney e naun e 168 e fit n’umngin ma meruk i ragag nge aningeg e fit radan.
3U barba’ e guyey nge aningeg e fit ga’ngin radan me tun nga barba’ fare Tempel, ma barba’ riy e ba wunbey nge tun ko thal ni wuru’ e yoror. Ntoy ni dalip thal, ra bathal ma kan yarmiy nib kan nga wuriyalen e thal ni but’.
4U ba’ ni lel’och e re naun ney e bay bang ni yima yan riy ni ragag nge nel’ fit radan ma 168 e fit n’umngin, ni aram e ba’ ni bay langan e mab ko senggil riy.
5Pi senggil ko thal nlang fare naun e ba’chig radan ko pi senggil ko thal ni lukngun nge thal ni but’ ni bochan e kan yarmiy nib kan nga tomur.
6Senggil ko thal ni but’ e be gif e gal thal ni ngalang ngay, ere gubin e pi senggil ney ni dariy e duga’ riy ni bod e tin ba’aram e naun u lan e thal ni langgin e yoror.
7Thal ni nga but’ ko fare naun u ba’ ni wuru’ e rungrung e meruk i ragag nge aningeg e fit n’umngin ni aram baley ko fare Tempel, ma lay nike magay ni ku meruk i ragag nge aningeg e fit e bay e pi senggil riy ma thal nlang e go’ kan senggilnag.
9U tan e pi senggil ney u lay ni ngek fare naun, ko gin ni tabab e rungrung ko fare yoror riy, e bay e gin yima yan riy ngalan e bin wuru’ e yoror. Ma ba’ ni yimuch ko fare Tempel e ku bay reb e naun riy nib ta’reb ya’an ko fa binem e naun ni de palog ko ngal u taban fare Tempel.
11Mu mit fapi senggil e bay e gin yima yan riy ni bod fa binem ni bay ko ba’ ni lel’och. Ri ta’ab folen, mab ta’reb ya’an, nge rogon e yungin yima yan riy nga naun.
12Bay ba mab u lan e pi senggil ney ko ba’ ni yimuch ko fare naun, aram ko ngek ko gin ni tabab e rungrung riy.
13Me ga’ar fare mo’on ngog, “L’agruw e gal naun ney nib tabgul. Mu langgin e gal naun ney e fapi prist ni yad ma yib nga p’eowchen SOMOL e yad ra kay fapi maligach nib tabgul riy. Ni bochan e ba tabgul fapi senggil, fapi prist e yad ra tay e tin th’abi tabgul e maligach u rom: maligach ni grain, nge maligach ni fan ko denen nge maligach ni mathang malfith.
14Fa’anra ki immoy e prist u lan fare Tempel ma yad ba’adag ni ngranod ko thal ni wuru’ e yoror, ma thingar ra ted u lan e pi senggil ney fapi mad nib tabgul ni immoy u dakenrad ko ngiyal’ ni ur pigpiggad ngak SOMOL. Thingar ron’ed yug boch e mad u m’on ni ngranod nga wuru’ e re gin’em ko gin ma mu’ulung e girdi’ ngay.”
15Nap’an ni mu’ fare mo’on i foleg langgin fare Tempel, me fekeg nga wean ko bin ngek e garog nge foleg wuru’ e gin’em.
16I fek fare ley i fol nge foleg e ba’ ni ngek, ma 840 e fit.
17Ma aram miki foleg e ba’ ni lel’och, nge ba’ ni yimuch, nge ba’ ni ngal; gubin raba’ ni ta’reb n’umngin 840 e fit,
20ma gi rungrung nem e ba liyeg bang i ban’en ni 840 e fit u gubin raba’. Ma rungrung nib liyeg e gin’ey e ke ki’eg e tin nib tabgul ko tin ni de tabgul.
