1U lan e bin ni ragag e rran ko bin ni ragag e pul ko bin ni mereb e duw ni gamad ba kalbus, me non SOMOL ngog,
2ni ga’ar, “Fak e girdi’, mu yoloy e rofen ney nga but’, ni bochan e irera’ e re rran ni pilung nu Babylon e tabab nag e m’ag mael nga Jerusalem.
3Mog ko girdi’ rog nib tatogopluw e re fanathin ni ba’aray, ni Gag SOMOL ni Th’abi Tolang, e gog ni fan ngorad: Mu tay e th’ib’ nga daken e nifiy ma ga suguy ko ran.
4Mon’ yungin nth’abi fel’ e ufin nga langgin — ni lik’ipon nge ay — mu kum suguy ko yungin ni bfel’ e yil nge ufin.
5Mu fanay e ufin ko bin th’abi fel’ e saf; mu ubung e l’ud nga tan fare th’ib’. Ma ga lith nge ligil; mu lith fapi yil nge ufin.”
6Ba’aray e n’en ni be yog SOMOL ni Th’abi Tolang: “Fare binaw ko pi’in nib tathang e pogofan e ke aw e gafgow ngay! Ri bod rogon ba th’ib’ nike mak’ t’ay ni danir luk nag. Ngan firik e ufin riy nga but’ ni ta’ta’bang ni dabi magach bang.
7U ni thang e fan u lan fare binaw, machane racha’ e de map nga daken e but’ ko gin nra upnguy e fiyath; ya map nga daken ba malang.
8Gu pag e racha’ u rom, ni gin ni dabiyag i mithag riy, ni aram e gin ni tolul riy ngog ngalang ni nggu falbiyen.”
9Irera’ e n’en ni be yog SOMOL ni Th’abi Tolang: “Fare binaw ko pi’in tathang pogofan e ke aw e gafgow ngay! I gag rog e bay gu ufing e l’ud.
10Mu kunuy boch e l’ud! Ma ga rupoy nge daromram! Mu lith e ufin nge m’ay ranggin! Ma ga k’ad nad e chogow e yil riy!
11Ma aram ma ga tay e th’ib’ ni dakriy gathon nga daken e achaffin mag pag nge gawel nge row e wasey riy. Ya alit nge t’ay u dow e nge yik’ nge chuw. Ma aram e kura be’ech fare th’ib bayay,
12machane gathi urngin e t’ay nge alit riy ni ram’ay ko daramram.
13Jerusalem, ngonglem nib kireb e ke alit nigem ni yug aram rogon ni gu be guy rogon ni nggu machalbog nigem, maka ga be par ni gab alit. Dab kum machalbog bayay nge mda’ ko ngiyal ni kam thamiy ga’ngin gelngin e damumuw rog.
14I Gag, SOMOL, e gu be non. Ke taw ko ngiyal’ ni nggu mithmith. Dab gu fek owcheg ko pi denen rom fa gu dag e runguy ara wurnganug. Bay ni gechig nigem ni fan ko tin kam ngongliy.” Fare SOMOL ni Th’abi Tolang e be non.
15Me non SOMOL ngog,
16ni ga’ar, “Fak e girdi’, bay gu fek rom nib tomgin e cha’ ni th’abi t’uf rom. Dariy ban’en ni ngamog riy ara mu yor ara map ba gaf i lu’ u owchem.
17Mu yor u lanin’um ma dab mu dag nike kireban’um. Dab mu chuweg e mad u lolgem ara mu luf e sus u em; dab mu upnguy owchem ni nge m’ug nike gafgow lanin’um, ara mu koy ba ggan ni makay e pi’in nma mowaw.”
18Kakadbul mu’ug nonad e girdi’. Me blayal’ riy me yim’ le’engig, me rebo rran riy mu gu rin’ e tin ni yog ngog.
19Me fitheg e girdi’, “Mangfan ni ga be ngongol ni arogon?”
20Mu gu ga’ar ngorad, “I SOMOL e ke non ngog ma keyog ngog
21ni nggu pi’ e re thin ney ngomed yu Israel: Kam ufanthin gad nga feni gel fare Tempel. Gimed ba’adag ni ngu’um yaliyed ma gimed be sul ngay, machane SOMOL e bayi m’aynag fan. Ma pi a romed nib bitir ko tabnaw, ni pi’in ni kar magach gad u Jerusalem e bay ni thang e fan rorad u tan e mael.
22Ma aram e bay um rin’ed e n’en ni kug rin’, dab kum upnguyed lolugmed fa mu ked e ggan nma kay e pi’in nma mowaw.
23Dab um marod ni dariy e upong u lolugmed fa sus romed fa mu mowaw ara um yorgad. Bay mmaygad nga bang ni bochan e denen romed, bay um gel’gel’gad ngomed.
24Ma aram e bay gu mang ba pow ngomed; bay um rin’ed gubin e tin kug rin’. I SOMOL e be yog ni nap’an nra buch e ran’ey, migimed nang ni ir fare SOMOL ni Th’abi Tolang.”
25Ke ga’ar SOMOL, “Fak e girdi’ chiney e, bay gu fek rorad fare Tempel nib gel nike mang ufanthin rorad nge felfelan’, ni ri yad ba’adag ni ngu’ur yaliyed ma yad be sul ngay. Ma bay gu fek rorad pifakrad ni pumo’on nge ppin.
26Rofen nra gu rin’ e biney, ma bay be’ nra thay ko riya’ nge yib i yog murung’agen ngom.
27Ma ka chirofenem me sul lungum ngom ni m’ay ngabang, ma aram e bay um nonad. Irera’ kanawo’en ni ga ra mang ba pow ngak e girdi’, ma aram e bay ra nanged ni Gag fare SOMOL.”
