Amos 4

1

2

3

4

5

6

7

8

9

¹Sikiyu is dungganen he menge vahi ziyà te Samaria, iring kew te menge vaka ziyà te Bashan he mibpurungan elimahi. Edèdaaǥen niw wey mibpesipelahan is menge pubri, ne edsuǥuen niw pa is menge esawa niw he uwiti kew zan te inumen. Umbe pemineǥa niw heini is

²migkaǥi te Nengazen he Megbevayà: “Tenged te kegkewaǥas ku ebpenangdù a he egkeuma is andew he ebihaǥen kew te menge kuntada niw ne egkeiring kew te pait he ebunuwiten.

³Ibpeǥawas kew zan diyà te inged niw he ziyà ibpevayà te menge vudsi te verengbeng he nevengkag, ne edumahan kew zan diyà te lugar he Harmon. Iyan a, is Nengazen, is migkaǥi kayi.

⁴“Sikiyu is menge Israilihanen, hendiyè kew te ed-ezapen niw ziyà te Betel wey Gilgal ne sigudu kew en baal te salà. Uwit kew te pemuhat niw kada meselem wey uwit kew te ikepulù niw kada tetelu he andew.

⁵Tutung kew te supas he midtepayan he pemuhat niw te kebpeselamat kayi te kedì. Sigi, ipahambug niw heeyan ragkes is menge pemuhat niw he keugelingen he suat is kebpemuhata zuen, su iyan man heeyan egkesuatan niw. Iyan a, is Nengazen he MEGBEVAYÀ, migkaǥi kayi.

⁶“Iyan a mibpaaǥi te vitil ziyà te langun he menge inged niw, piru wazè kew ǥihapun medlikù kayi te kedì. Iyan a, is Nengazen, is migkaǥi kayi.

⁷“Iyan a mid-eǥen te uzan te tetelu he vulan human is tiraǥun. Mibpeuzanan ku is duma he menge inged piru is duma wazè ku peuzani. Mibpeuzanan ku is duma he menge pemuleey piru is duma mibmemaza.

⁸Tenged te keluya egkesemsempirey kew en is ebpen-ahà te wahig puun te sevaha he inged pehendiyà te sevaha pa he inged, piru kenà ereg is egkekuwa niw piru wazè kew ǥihapun medlikù kayi te kedì. Iyan a, is Nengazen, is migkaǥi kayi.

⁹“Kemahabet ku en dezeeti is menge pemuleey niw pinaaǥi te meinit he keramag wey menge erat. Mid-etaki te terapan is menge kayu niw he higus wey ulibu. Piru wazè kew ǥihapun medlikù kayi te kedì. Iyan a, is Nengazen, is migkaǥi kayi.

¹⁰“Impaaǥi ku ziyà te keniyu is limas iring te impaaǥi ku zengan diyà te Ehipto. Mibpenhimetayan ku is menge vetan-en he menge maama niw pinaaǥi te tebek wey impaaǥew ku is menge kudè niw. Wey impaantus ku sikiyu te kemahù te nemematey ziyà te kampu niw. Piru wazè kew ǥihapun medlikù kayi te kedì. Iyan a, is Nengazen, is migkaǥi kayi.

¹¹“Midezeetan ku is duma keniyu iring te mibeelan ku ziyà te Sodom wey Gomora. Ne is duma keniyu he nekelingkawas neiring te kayu he midsekelew puun te hapuy. Piru wazè kew ǥihapun medlikù kayi te kedì. Iyan a, is Nengazen, is migkaǥi kayi.

¹²“Umbe ed-umanan ku pa ebeeli heini he menge silut diyà te keniyu te menge tig-Israel. Ne ǥeina te ebeelan ku heini, pengandam kew te ked-etuvang kediey te Megbevayè niw.”

¹³Is Megbevayà, iyan mibaal te menge vuvungan wey midlimbag te keramag, ne iyan daan sikandin edliwan te meselem te mezukilem. Impahayag din diyà te etew is menge pelanu zin, ne iyan sikandin ebayàbayà te tivuuk he kelibutan. Is ngazan din iyan is Nengazen he Megbevayà he Mekeǥeǥehem.