1Habahim Samuwela oliwe uluna gilisina aba husanina ya abi be ya hin Saulo boluboluna yai. Ya falafu na iyen, Guyau ya fasinabom bena ena dodoga wa foyahidi. Logena, egu abiꞌabim doha ite.
2Yena aho wa lau afulegu, haba tatau luwaga Leisulu boꞌusana Selesaha yai, Beniyamin nuꞌuna sigasigana sadaina yai, wa lobahidi. Haba sa falibam tiyen, Donki ami yoꞌoyoꞌoidi haꞌa sa lobahidi be tamam, hige donki i modeꞌedi. In moho, aho te ya libaliba, hola iyen, “Somo haba E ginauli be natugu E lobahi?”
5Samuwela ya libalau Saulo lisina, iyebom, Mulina yai haba wa lau Yaubada ena Uduhuli, Gibeya nuꞌuna yai. Filisitani tau hiyala edi aba miya mate uduhuli ni mulina yai. Taon ni, wa hanahanaui mate peloweta pelena aba fadebasae nuꞌuna yai ni sa lidilidima, haba wa failobahidi. Haba hapi yo ginauli hudoꞌi doha gita yo tambalin sa aiheyaidi yo figo sa yufidi. Haba sa leꞌi yo Yaubada ena liba sa fafatala yogaꞌen.
6Maihalana yai ni, Guyau Yaluwana ma gigibwalina haba ya luhufim be ma afa haidam haba ena liba ami fatala yogayogaꞌen; na Guyau haba nuwam ya fafalifalihu fuyoi.
7Yena fafaꞌilala te sa tubu, mulina yai somo wa ita ya loholoho, mate u ginauli, paꞌana Yaubada maꞌem.
8U bwaꞌi, u lau Giligala taonna, haba ainiya te failobahi be haba antalasam E gabudi yo nuwa esega antalasamdi E ginaulidi Guyau ai lisina. Ainiya u bagibagi lahai faligigi luwaga ee–, E mahanowa. Habahim E falibam somo wa ginauli.
9Saulo ya timuli bui bena haba Samuwela ya lau afulen, na yo fede Yaubada, Saulo nuwana ya fafalifalihu. Lahaina yai, ginauli mahudoꞌina Samuwela, Saulo ena ya liba mate, sa fawananaha.
10Saulo yo ena tau lau fayofayo sa mahano lau Yaubada ena Uduhuli, Gibeya yai mate peloweta pelena sa laoma Saulo sa failobahidi na sa lau gogo sa lau. Feula, Yaubada Yaluwana ma gigibwalina Saulo ya luhufi be hinaga ya fatubu Yaubada ena liba ya lau yogaꞌen.
11Safalumadi Saulo sa sibai mate sa ita ya libaliba peloweta be sa noꞌo tiyen, Kisi natuna ya somo? Wananaha in peloweta?
12Taumoho hudoꞌi amainiya ya miyamiya alinadi ya bui iyebom, Tau foyahidi sai? Somo ya tubu Saulo lebena yai sa ita be sa noꞌo, na ya famala edi libaliba, be haba Saulo fatiꞌona sa fafalau boda tiyebom, Saulo, wananaha peloweta?
13Saulo ya liba peloweta maꞌuda, mate ya hasai aba fadebasae nuꞌuna.
14Muliyai, Saulo madiyana ya fatiꞌo lau Saulo yo ena tau lau fayofayo lisidi iyebom, Somo yai ami laoma? Saulo iyebom, Donki ꞌe laulau yoꞌoidi be ꞌe yoꞌo asaha, yo fede ꞌe lau Samuwela lebena.
15Na madiyana iyebom, Samuwela somo ya falibamiu. Au falibagu.
16Saulo alinana ya bui iye, Ya falibamai mate donki haꞌa sa lobahidi. Samuwela ya libalau Saulo lisina mate in haba ya famala Isalaela edi kin, in moho Saulo, madiyana hige ena i liba.
17Habahim, Samuwela Isalaela dodogadi mahudoꞌidi ya yoga gogondima Guyau matana yai Misipa taonna yai na ya libalau lisidi iyebom,
18Ita Isalaela eda Yaubada yo eda Guyau alinana doha ite, “Isalaela dodogadi, Idipi yai Yau E fofofahidima. Idipi edi gigibwali yai yo nuꞌu mahudoꞌidi sa fafaꞌankamkamnadi, lisidi yai E fofofahidi.”
19Yau emi Yaubada. Pilipili ouꞌouli lisidi yai E fofofahimiu na aho te, ami ꞌwaiyoꞌoꞌegu, na ami anꞌetaigu bena emi kin E felemiu. Haꞌai! Beti, emi sulu yo ami boga hesa - hesa yai au faꞌoigogoma Guyau ai matana.
20Habahim, Samuwela sulu hesa - hesa ya falibadi sa laoma na sulu Beniyamin ya fasinabo.
21Yo fede, Samuwela sulu Beniyamin ya falibadi sa laoma nuwanuwana yai sa obiyo, na boga Matili ya fasinabo. Be boga yai te, Kisi natuna Saulo ya fasinabo. Na fuyanna sa yoꞌoi mate in hige amainiya.
22Be Guyau sa fatiꞌoi, tiyebom, Dogana ya laoma, e higeꞌe? Guyau alinadi ya bui iyebom, Ginauli ganahewadi yai ya alasimo.
23Yo fede, sa lautafo be sa lau sa leyama, be sa faꞌobiyo dodoga matadi yai. Kwaluna ya lofa wananaha, hige doha iti.
24Samuwela dodoga ya falibadi iyebom, Guyau taumoho ya fasinabo, logena ma! Dodoga mahudoꞌidi ganahewadi yai hige sai hesa doha in. Habahim, dodoga mahudoꞌidi sa yoga laꞌilaꞌi tiyen, Kin haba ya miya boliman lofalofa!
