1Solepa Dapitipa nakamba pii lao oteyambi. Dokopa enakana Solena ikinyingi Jonatane lenge baa Dapiti kando nyuo rae maipala baame range mona reteya doko suu pyao Dapiti mona reteyako.
2Soleme Dapiti yuu gii dokona piso pao anda paa nana lapala baa role pyao karena leya
3Jonataneme Dapiti mona wakasa reteyamosa puu minyuo karalu kararamba, lalu lao leya.
4Baame banya komau londe doko roko nyepala Dapiti pinya lao maiyuo yanda pingi bange dupwape marapupi yandape wua gelape dupwa peparae maiya.
5Soleme Dapiti yulu pinya leya dupwa kapa piyasa kandapala Soleme Dapiti baa yanda singi dupwana mupwa ingyuo karena leya. Dopa piyamo dokome Solena akali dupwape yanda singi mupwa dupwape peparae rae maiyuo kareyami.
6Dapiti Golayate pyapala epeya dokopa yanda singi dupwa anda epeyami. Epeyaminyi dokopa yuu taone peparae Isaraele dokona range enda dupwa peparae kiŋi Sole kandala epeyami. Epo dokopa kenane keyange lapo pyao nakama lyuo lakuli pyao rambyalu lao rae maiyuo epeyami.
7Enda dupwame kenane piyami dokona pyao dokopa Soleme wambu taosande mendaki (1,000) pyao kumuya lao Dapiti nyuo ketae pyambuo taosande akalisa (10,000) pyao kumuya, leyami.
8Dokopa Sole baa rae mai napala baa wakasa imbumi kumuya. Imbumi kumapala pii dopa leya. Dapitimi taosande akalisa (10,000) pyao kumuya lao taosande mendaki (1,000) iki nambame pyao kumii, letaminyi. Dokona yulu mendaki iki silyamo doko baa kiŋi ingyuo karena larami, leya.
9Dokona lao yuu gii dokopa piso pao Soleme Dapiti yango palyiya.
10Yuu gii dokopa yangama Anatumi imambu koo dokome Sole makande pela pena leya. Dopa leyamo dokopa baa kopyali ingilya ingyana pyuo banya anda kareya. Dopa pyuo kareyamo dokopa Dapiti baa rambyalu yuu peparae lengenyili pyuo lao kareyamo dokopa Sole baa kaku mende minyaro kareya.
11Soleme dopa lao range suu pyao, Nambame Dapiti kakumi pyaronopa apya dokona pararo karenale, leya. Dopa lapala kakumi yuu lamasa lao piyamo doko Dapitimi mee wanjinyi nembeya.
12Dopa piyamopa Kamongo dokome Sole yaki nyepala Dapiti keta kareyamosa Sole baame Dapiti kando pakaya.
13Pakapala Soleme Dapiti pena lao baa akali taosande mendaki dupwa iso mupwa ingyuo karena leya. Dopa leyamo dokopa Dapitimi akali angi dusipa lanyuo yanda pela peya.
14Kamongo baame Dapiti keta kareyamo dokome Dapiti banya yulu peparae kapa pyuo peya.
15Sole Dapitinya yulu keyange piyamo doko kandapala dokopa kamame wakasa pako kareya.
16Dapiti baame yulu keyange pyuo kareyamo dokona Isaraele dee Juta wambu peparaeme baa mona wakasa reteyami.
17Soleme Dapiti lamaiyuo, Dake nambana wanenge mupwa doko Merape lenge. Embame nambana yanda singi ingyuo paka nao yaki nyii nao karapala Kamongona lao yanda pyakamiri ramo dokopa namba wanake doko nyere lao jero, leya. (Sole baa rangeme Dapiti kapa pyuo pyara ingya nayasa Pilisitia wambu dupwame dopa pyuo Dapiti pyarami lao suu piya.)
18Dapitimi isingi lao, Namba koo kandale. Nambana ree palu dupwa pendewa dokona namba api lao kiŋinya imwange ingyarose? leya.
19Merape baa Dapiti mairaminyi yuu gii doko pyaka siya dokopa nakamame Dapiti kaepala baa akali Ariele lenge yuu Meyola range doko maiyami.
20Maiyaminyipape Solena wanenge mende Maekele lenge dokopa Dapitipa ama mona wakasa reteyambinyi dokona Sole soo rae maiya.
21Baa dopa lao suu piya. Namba Maekele Dapiti mairu ramo doko baame Dapiti anjili laramopa Pilisitia wambu dupwame pyao kumarami lao suu piya. Suu pyapala Soleme Dapiti kamba lamaiyuo, Emba nambana imwange ingyare, leya.
22Soleme banya akali mupwa dupwa epena lapala lao, Nakamame Dapiti yalu pyuo lamaiyuo, Dakepa kiŋi dokope dee banya akali mupwa dupwa peparaepe emba kando rae mailyaminyi dokona emba banya wanenge kapa nyere lena, leya.
23Dopa leyamo dokopa nakamame Dapiti pao lamaiyami. Lamaiyaminyi dokopa baa isingi lao, Mendeme kiŋinya wanenge nyeramo doko wambu dupwame kandapala banya kingi ketae pyambwarami. Namba pendewa koo dokome kapa nyero ingya nalyamo, leya.
24Akali mupwa dupwame Dapitimi pii leyamo doko pao Sole lamaiyami.
25Lamaiyaminyi dokopa Soleme nakamame Dapiti dopa lena lamaiya. Enda nyerene dokona kiŋi baame emba keta mende nyipuli yaka lao suu pilyamo. Banya yanda pimwai dupwa yano pyao embame Pilisitia akali andete mendaki (100) dupwa pyao kumasipili lao suu pilyamo. Pyao kumasepala nakamana yongo yanenge pyakepanyi nembapala yanenge dupwa kiŋi karapyamo dokona minyuo epena leyami. (Dopa pyuo Soleme Pilisitia wambu dupwame Dapiti pyao kumarami lao palyiya.)
26Solena akali mupwa dupwame Solena pii leyamo dupwa Dapiti lamaiyami. Dokopa Dapiti baa kiŋinya imwange larolyamo lao rae maiya.
27Wambo nyepa nao karo dokopa Dapitimoo banya akali dupwa pipya papala Pilisitia wambu andete lama (200) pyao kumakayami. Dopa pipala baame pongo kambu dupwa pyakepo nyuo karo minyuo pao kiŋinya lenge kambu dokona yaka lao lasaka piya. Doko baa kiŋinya imwange ingyapuli lao sepala piya. Dokopa Soleme wanenge Maekele doko Dapiti nyinya lao maiya.
28Kamongo baa Dapiti keta kareyamo dokope dee banya wanengeme Dapiti mona reteyamo dokope Soleme soo nyiya.
29Yuu gii dokopa Sole baame Dapiti kando kamame wakasa pakame kumuya. Dee baa palyuo kareyamo yuu gii dusipana banya nyisu petenge ingiya.
30Dokopa Pilisitia yanda singi dupwame pyala epapa piyami. Dopa piyaminyipape Solena yanda singi mupwa dupwa porai ingyuo kareyaminyipape yanda peparaena Dapiti baa kamame porai wakasa ingyuo kareya. Renge dokona lao Dapiti banya kingi ketae peyamo wambu soo oteyami.
