1. Kraľengero 20:11-32

¹¹O kraľis o Achab pre oda odphenďa: “Oda, ko mekča lel o zbraňi andro vasta, te na lašarel pes avke sar oda, ko imar thovel tele e šabľa pal o mariben.”

¹²O Ben-Hadad oda šunďa akor, sar pijelas le kraľenca andro stani. Paľis phenďa peskere muršenge, hoj pes te pririchtinen pro mariben pre Samarija. Avke pes on rozačhade pašal o foros.

¹³Jekhvareste avľa ko kraľis Achab varesavo prorokos a phenďa: “Kavke vakerel o RAJ: ‘Dikhes kale but slugaďen? Mek adadžives tuke dava o ňerinďipen (viťaztvo) upral lende, hoj te džanes, hoj me som o RAJ.’ ”

¹⁴“Ko ľidžala o mariben?” phučľa o Achab le prorokostar. O prorokos odphenďa: “O terne slugaďa le guvernerengere, save ľidžan o fori!” “Ko majinel te džal ešebno pro mariben?” mek phučľa o kraľis. “Tu!” odphenďa.

¹⁵Avke o Achab diňa te zvičinel ole terne slugaďen – savore sas 232. Zvičinďa the savore Izraelike slugaďen, save sas 7 000.

¹⁶Pro dilos gele pro mariben, ipen akor, sar o Ben-Hadad sas mato, bo pijelas andro stanos le tranda the duje (32) kraľenca, save leske avle te pomožinel.

¹⁷Ešeb gele o terne slugaďa a avke le Ben-Hadadoskere murša, save anglal merkinenas pro Izraeliti, avle a phende leske, hoj varesave murša aven andral e Samarija.

¹⁸Ov lenge odphenďa: “Zalen len, choc te aven ade andro smirom, abo pro mariben!”

¹⁹Ale o Izraeliti džanas avri andral o foros, ešeb o terne slugaďa, save ľidžanas o mariben, a pal lende caľi armada.

²⁰Dojekh lendar murdarďa ole muršes, savo džalas pre leste. Avke o Aramejčana denašenas het a o Izraeliti džanas pal lende. O kraľis andral o Aram, o Ben-Hadad, denašľa odarik het le muršenca pro graja.

²¹Akor o Achab džalas pal lende, zaiľa leskere grajen the o verdana a zňičinďa le Ben-Hadadoskera armada.

²²Paľis o prorokos geľa ko kraľis Achab a phenďa leske: “Dža, zoraľar a pririchtin tire slugaďen, bo kavke pre aver berš o Ben-Hadad avela pre tu pro mariben.”

²³Le Ben-Hadadoskere služobňika phende leske: “Ňerinde (zviťazinde) upral amende, bo lengero del hino del le verchengero, ale te pes lenca maraha pro rovno than, ňerinaha amen!

²⁴Vašoda akana ker kada, hoj te na ľidžan o maribena o kraľa, ale o veľiťeľa le slugaďengere.

²⁵Paľis arakh aver muršen, ajci keci tuke mule andro mariben, a avke ker the le grajenca the le maribnaskere verdanenca. Avke džaha pes lenca te marel pro rovno than a čačes ňerinaha pre lende.” Ov len šunďa a kerďa avke.

²⁶A ačhiľa pes, hoj pal o berš o Ben-Hadad vičinďa le Aramejčanen a geľa lenca andro foros Afek pro mariben pro Izrael.

²⁷O Izraeliti pes zgele, pririchtinde pes a džanas pro mariben. Kerde peske taboris angle lende sar te duj cikne stadi le kozengere, ale o Aramejčana sas všadzik pal caľi odi phuv.

²⁸Avke o prorokos avľa ko kraľis Achab a phenďa leske: “Kavke phenel o RAJ: ‘O Aramejčana phenen, hoj me som del le verchengero a na del la dolinakero, vašoda dava kala bara armada andre tire vasta a on paľis sprindžarena, hoj me som o RAJ.’ ”

²⁹Efta džives taborinenas jekh angle aver a pro eftato džives pes chudle te marel. O Izraeliti murdarde andre jekh džives 100 000 slugaďen.

³⁰Ole, save ačhile te dživel, denašle andro foros Afek, ale pro 27 000 lendar pele o foroskere muri. O Ben-Hadad denašľa a dochudľa pes andro foros, pro garudo than andro kher.

³¹Paľis leskere služobňika leske phende: “Šunďam, hoj o Izraelike kraľa hine jileskere. Av, thovas pašal o per o gone a the o špargi pašal e meň a džas ko Izraeliko kraľis. Šaj el, hoj tut mukela te dživel.”

³²Avke kerde a gele ko kraľis a phende: “Tiro služobňikos o Ben-Hadad tut mangel, hoj les te mukes te dživel.” O Achab lendar phučľa: “Ov mek dživel? Ov hino miro phral!”