1 Baṉara 20:11-32

¹¹Olaṉa sa baṉara pa Izireli, “La mamu tozi nia, ‘Sa tie sapu va namanama varipera si lopu hoke vahesi pule nia ba pa mudina tu sa vinaripera.’ ”

¹²Avosia e Beni Hadadi sa inolaṉa hie sipu korapa naponapo turaṉi sa sari na baṉara pa dia ipi poko, meke garuni sa sari nana tie: “Va namanama pude rapata.” Ke va nama si arini pude rapatia sa vasileana lavata.

¹³Koasa totoso tugo asa si mae si keke poropita koe Ehabi meke zama vura, “Guahe si zama nia e Zihova: ‘Dogoria goi sa qeto minate varipera hie? Kote vatu nia Rau pa limamu ṉinoroi, meke kaqu gilana Au goi sapu Arau se Zihova,’ gua.”

¹⁴Nanasa se Ehabi, “Ba esei kote turaṉia sa rinapata?” Olaṉa sa poropita, “Guahe si zama nia e Zihova: ‘Ari na tie varipera vaquradi tadi na koimata varipera pa hopeke pinaqaha popoa, arini kote tavetia si hie.’ ” “Meke esei kote podalae nia sa vinaripera?” nanasa gua se Ehabi. Olaṉa sa poropita, “Agoi mo.”

¹⁵Ke tioki sa baṉara sari na tie varipera vaquradi tadi koimata varipera pa hopeke pinaqaha popoa, ka karua gogoto toloṉavulu rua tie. Meke varigara ni sa sari doduru tie koasa qeto minate varipera pa Izireli, si ka zuapa tina vinarigaraedi.

¹⁶Pa korapa rane si topue vura si arini sipu korapa naponapo va viviri se Beni Hadadi meke sari ka toloṉavulu rua baṉara koari na dia ipi.

¹⁷Sari na tie varipera vaquradi tadi na koimata pa hopeke pinaqaha popoa si vura kekenu la. Ba e Beni Hadadi si ele veko tie piko, ke arini la tozia koasa sapu, “Sari na tie si korapa vura mae guadi pa Sameria.”

¹⁸Ke zama si asa, “Be vura mae si arini pa binule, si tuqe vagi, lopu va matei; be vura mae si arini pude varipera, si tuqe vagi, lopu va matei.”

¹⁹Sari na tie varipera vaquradi tadi na koimata pa hopeke pinaqaha popoa si topue vura koasa vasileana lavata turaṉae la sa qeto minate pa mudi dia,

²⁰meke hopeke seke gore ni rini sarini pu raza la. Tana tu guni ni rini, ke govete taloa sari pa Siria, meke hadu luli sari tie Izireli. Ba va kakalopuhia rini se Beni Hadadi meke govete koasa nana hose turaṉae koari kaiqa nana tie koi hose.

²¹Zukuru nono la sa baṉara pa Izireli meke tuqe vagi sari na hose meke sari na totopili varipera, meke noma hola sa vina kilasa si ta tavete la koari na tie pa Siria.

²²Mudina asa, mae sa poropita koasa baṉara pa Izireli meke zama, “Va ṉiṉira ia sa mua qeto minate varipera meke mamu dogoria sa si kaqu ta tavete, ura pa totoso sipu lopu ele mae sa ibu si kote mae rapata pule igo sa baṉara pa Siria,” gua.

²³Sipu hola sa vinaripera kekenu, sari na koimata varipera tanisa baṉara pa Siria si ponia binalabala se Beni Hadadi, “Dia tamasa si na tamasa pa toqere. Gua asa ke, ṉiṉira holani gita rini. Ba be guana razai gita si arini koari na pezara si hinokara kote gita ṉiṉira hola ni si arini.

²⁴Ego, mu tavetia si gua he: Va rizui sari doduru baṉara koari na dia tuturuana meke hobe ni koari kaiqa koimata tadi na tie varipera.

²⁵Meke mamu varigara mae nia agoi si keke qeto minate varipera sapu noma kekeṉoṉo gua sapu turaṉia agoi visoroihe, hose pa hose meke na totopili varipera pa totopili varipera, pude boka raza i gita sari pa Izireli koari na pezara. Meke hinokara gita kote ṉiṉira hola ni si arini.” Va ego i sa meke tavete luli tugo sa.

²⁶Sipu lopu ele kamo sa totoso maṉini si varigara ni e Beni Hadadi sari na tie pa Siria meke sage la pa Apeka pude la razai sari pa Izireli gua.

²⁷Meke sipu ele varigara sari pa Izireli meke tava nama si arini pa likakalae varipera, si topue vura la si arini pude tutuvi sari pa Siria. Va turu ipi sari pa Izireli pa kalikarovo mo koari pa Siria gua na karua puku qoti hite ba sari pa Siria si araha betoa mo arini sa doduruna sa kali popoa.

²⁸Meke sage mae sa tie te Tamasa meke tozi nia sa sa baṉara pa Izireli, “Gua he si zama nia e Zihova: ‘Sina balabala ia ari na tie pa Siria sapu se Zihova si na Tamasa pa toqere meke lopu na Tamasa pa pezara, ke kote va luara vatu nia Arau pa limamu agoi sa qeto minate varipera lavata hie, pude mu gilania agoi sapu Arau tugo se Zihova.’ ”

²⁹Ka zuapa rane si koa vari tia i mo si arini, meke koasa rane vina zuapa si podalae vari kamoi si arini pa vinaripera. La ari pa Izireli meke va matei pa keke rane keke gogoto tina tie koari pa Siria, sari tie varipera sapu hoke ene.

³⁰Saripu koa hola koa rini si govete la koasa vasileana lavata pa Apeka, vasina hoqai na gobagoba sari ka hiokona zuapa tina. Se Beni Hadadi si govete la koasa vasileana lavata sana meke la tome koa keke lose sapu pa korapana keke vetu.

³¹Sari nana palabatu si zama koasa, “Do, gami ele avoso nia sapu na tie tataru sari na baṉara pa Izireli. Aria mada la koasa baṉara pa Izireli, mada dikuru ni sari na poko baika meke ilupu ni iku sari ruada. Gina lopu kaqu va mate igo sa.”

³²Ke va sagei rini sari na poko baika meke ilupu ni iku rini ruadia meke la gedi koasa baṉara pa Izireli meke zama, “Sa mua nabulu se Beni Hadadi si zama: ‘Tepa si arau pude lopu va mate au,’ gua.” Olaṉa sa baṉara, “Vea korapa toa nana sia? Na tasiqu si asa.”