1 KING TAUDIA 20:11-32

¹¹King Ahaba ia haere, ia gwau, “King Benehadada do umui hamaoroa, tuari tauna korikori be ia do tuari lasi neganai do ia hekokoroku lasi, to tuari murinai sibona.”

¹²Benehadada bona iena durua king taudia be edia palai ruma lalonai uaina idia inua noho neganai unai hereva gwauraia taudia be Ahaba dekena amo idia mai. Vadaeni Benehadada ese iena tuari taudia ia oda henia, edia tuari gabudia dekenai do idia gini, Samaria do idia tuari henia totona.

¹³Unai neganai, peroveta tauna ta ese Ahaba, Israela ena king, dekenai ia lao, ia hamaoroa, “Lohiabada ia gwau, ‘Unai tuari taudia momo herea dekenai do oi gari lasi. Oi kamonai, hari dina lau ese idia dekena amo oi dekenai kwalimu do lau henia, bona do oi diba, lau sibona be Lohiabada.’ ”

¹⁴Ahaba ese peroveta tauna ia nanadaia, ia gwau, “Daika ese tuari do idia gunalaia?” Peroveta tauna ia haere, ia gwau, “Lohiabada ia gwau, provins edia tuari biagudia mai edia tuari taudia, uhau taudia, ese do idia karaia.” Ahaba ese ma ia nanadaia, ia gwau, “Daika ese tuari do ia hamatamaia?” Peroveta tauna ia haere, ia gwau, “Oi ese.”

¹⁵Vadaeni Ahaba ese provins edia tuari biagudia edia tuari taudia, uhau taudia ia haboua, idia be ibounai 232. Unai murinai Israela tuari taudia ibounai ia haboua, idia be 7000.

¹⁶Dina tubua neganai, Ahaba ena tuari taudia idia toreisi, tuari dekenai idia raka lao. Unai neganai Benehadada bona iena durua lohia taudia 32 be edia palai ruma dekenai uaina idia inua noho, idia kekero lao noho.

¹⁷Provins edia uhau tuari taudia idia raka guna. Benehadada ena hasinadoa taudia ese Benehadada idia hamaoroa, “Taunimanima be Samaria dekena amo idia mai noho.”

¹⁸Benehadada ia gwau, “Bema maino totona idia mai, do umui abidia mauri, o bema tuari totona idia mai danu do umui abidia mauri.”

¹⁹Uhau tuari taudia ese tuari orea idia gunalaia, Israela tuari taudia be idia edia murinai idia raka.

²⁰Vadaeni Israela taudia ta ta ibounai ese Suria tauna ta ia alaia mase. Suria taudia idia heau, bona Israela taudia ese idia lulua lao. To Benehadada, Suria ena king, be hosi dekenai ia heau, hosi guia tuari taudia haida danu.

²¹King Ahaba be tuari gabuna dekenai ia lao, hosi bona kariota ia abia. Ia ese Suria taudia ia alaia mase, ala-ala be bada herea.

²²Vadaeni peroveta tauna ese king Ahaba dekenai ia lao, ia hamaoroa, ia gwau, “Oiemu tuari orea do oi hagoadaia, bona palani namodia do oi karaia, badina be keru negana do ia ore neganai, Suria ena king ese oi dekenai do ia tuari henia lou.”

²³King Benehadada ena hesiai taudia ese king idia hamaoroa, idia gwau, “Israela taudia edia dirava be ororo dekenai noho diravadia, bona unai dainai idia ese ita idia halusia. To bema tano palaka dekenai ita tuari henidia neganai, ita ese idia do ita halusia momokani.

²⁴Inai bamona do oi karaia: Unai king 32 edia dagi do oi kokia, ta ta ena orea, ena orea dekena amo, bona edia gabudia dekenai tuari biagudia do oi atoa.

²⁵Unai neganai tuari orea ta ma do oi haboua, ia boio vadaeni orea ena bada hegeregerena, hosi bona kariota danu edia momo gunana hegeregerena do oi haboua. Ita ese tano palaka dekenai Israela taudia do ita tuari henia, bona idia do ita halusia momokani.” King Benehadada ese edia hereva ia kamonai henia, bona unai bamona ia karaia.

²⁶Keru negana ia ore neganai, Benehadada ese Suria taudia ia haboua, bona idia be Apeka dekenai idia lao, Israela taudia do idia tuari henia totona.

²⁷Israela taudia danu be edia tuari biagudia ese idia haboua, aniani bona tuari gaudia idia abia, vadaeni idia raka lao, bona orea rua dekenai Suria taudia edia vairana dekenai idia kamepa. Suria taudia be momo herea, idia ese tano idia hahonua. To Israela taudia be momo lasi, edia toana be nanigosi orea maragidia rua bamona.

²⁸Peroveta tauna ta be king Ahaba dekenai ia lao, ia gwau, “Lohiabada ese inai bamona ia hereva: Suria taudia idia gwau, ‘Lohiabada be ororo ena dirava, to ia be tano palaka ena dirava lasi,’ unai hereva dainai lau ese inai Suria tuari orea dekena amo oi dekenai kwalimu do lau henia, vadaeni do umui diba lau be Lohiabada.”

²⁹Dina 7 lalonai Suria taudia bona Israela taudia be edia kamepa dekenai idia noho, bona idia ta ta dekenai idia itaia noho. Vadaeni dina namba 7 dekenai tuari idia hamatamaia. Israela taudia ese unai dina tamona lalonai Suria taudia 100,000 idia alaia mase.

³⁰Suria taudia, do mauri taudia, be Apeka hanua dekenai idia heau vareai, to unuseni hanua ena magu be idia ibounai 27,000 edia latanai ia moru. Benehadada ese danu Apeka hanua dekenai ia heau vareai, bona ruma ta ena lalona momokani daiutuna ta lalonai ia hunia.

³¹Iena hesiai taudia ese Benehadada idia hamaoroa, idia gwau, “Ai kamonai vadaeni, Israela ena king taudia be mai edia bogahisihisi. Mani emu kara ai ese puse dabua do ai karaia, bona aiemai kwarana dekenai varo do ai atoa, do ai raka lao, Israela ena king dekenai do ai lao, bona sedira Ahaba ese oi do ia hamauria.”

³²Vadaeni, idia ese puse dabua idia atoa, bona edia kwarana dekenai varo badadia idia atoa, Israela ena king dekenai idia lao, idia gwau, “Oiemu hesiai tauna Benehadada ia gwau, ‘Mani emu kara lau do oi hamauria.’ ” Ahaba ese idia ia haere henia, ia gwau, “Benehadada be do mauri noho, a? Namo! Ia be egu tadina!”