1. King 20:11-32

¹¹Iwe, ewe king Ahap a pälüeni, “Oupwe üreni Penhatat pwe esap inetamas.”

¹²Penhatat a rong ei pworaus, lupwen a sakaufengen me ekewe king lon imwer kewe imw mangaku. Mürin, a üreni nöün kewe sounfiu, “Oupwe atettelikemi pwe oupwe maun ngeni ewe telinimw.” Iwe, ra atetteliir pwe repwe maun ngeni.

¹³Lon ewe fansoun eman soufos a feito ren Ahap ewe kingen Israel o üra, “Iei alon ewe Samol mi Lapalap, ‘Ka küna ei mwicheichen sounfiu mi watte? Üpwe ewinnok pwe kopwe akufuur. Mürin kopwe mefi pwe ngang ewe Samol mi Lapalap.’”

¹⁴Nge Ahap a ais, “Iö epwe mwei ewe maun?” Ewe soufos a pälüeni, “Iei alon ewe Samol mi Lapalap, ‘Ekewe sounfiu alüal nöün kepinan ekewe sop.’” Mürin, Ahap a ais, “Iö epwe popuetä ewe maun?” Ewe soufos a pälüeni, “En.”

¹⁵Iwe, Ahap a körifengeni ekewe sounfiu alüal nöün kepinan ekewe sop ükükür rüepükü ilik me ruoman. Mürin a pwal körifengeni ekewe sounfiun Israel ükükür füngeröü.

¹⁶Iwe, ra feiliwu leoloas pwe repwe maun, lupwen Penhatat me ekewe ilik me ruoman king mi alisi ra sakaufengen lon imwer kewe imw mangaku o puchula.

¹⁷Iwe, ekewe sounfiu alüal nöün kepinan ekewe sop ra feiliwu akom. Nge Penhatat a tinala chon ouwasacha ewe fanü. Iwe, ra liwinto o apworausa ngeni, “Mi wor mwän ra towu seni Samaria.”

¹⁸Penhatat a üra, “Are ra towu fän iten ar kütta kinamwe, oupwe turumanaueer. Nge are ra towu fän iten ar repwe maun, oupwe chök turumanaueer.

¹⁹Iei usun ekewe sounfiu alüal nöün kepinan ekewe sop ra akomw le towu seni ewe telinimw, nge ewe mwichen sounfiun Israel a tapwela müriir.

²⁰Iwe, iteiten eman me eman a chök niela pälüan, pwe ekewe chon Siria ra sü, nge ekewe sounfiun Israel ra tapweriir. Iwe, Penhatat ewe kingen Siria a pwal süla won eman oris, nge ekoch chon wawa oris ra eti.

²¹Mürin, ewe kingen Israel a cherela, a liapeni ekewe oris me ekewe woken o niela ekewe chon Siria ren eu ninni mi fokun watte.

²²Mürin, ewe soufos a feito ren ewe kingen Israel o üreni, “Kopwe amolöchü noum kewe mwichen sounfiu o ekieköchü met kopwe föri. Pun lon eu ier ewe kingen Siria epwe liwinsefälito o maun ngonuk.”

²³Iwe, nöün ewe kingen Siria kewe nöüwis ra üreni, “Nöün chon Israel kewe kot ir anün won chuk, iei mine ra akufukich. Nge are sipwe maun ngeniir lon ewe maasies ellet sipwe akufuur.

²⁴Iei usun mine kopwe föri: Kopwe siwili ekei king meinisin o atolonga meilapen sounfiu lon lenier.

²⁵Kopwe körifengeni eu mwichen sounfiu mi chocho usun ewe mwichen sounfiu a sü senuk, kopwe pwal awora siwilin ekewe oris me woken usun me mwan. Mürin sipwe maun ngeni chon Israel me lon ewe maasies. Ellet sipwe akufuur.” Iwe, Penhatat a tipeeu ngeniir o föri mine ra apasa.

²⁶Iwe, lupwen a tori ewe ier mürin, Penhatat a körifengeni ekewe re Siria o feila Afek pwe epwe maun ngeni chon Israel.

²⁷Nge ekewe aramasen Israel ra pwal mwichefengen, ra angei ar pisekin maun o feila pwe repwe maun ngeni chon Siria. Iwe, ekewe sounfiun Israel ra nom lon lenier sasape ngeni ekewe sounfiun Siria, nge ra usun chök ruu kükün mwichen kuuch. Nge ekewe sounfiun Siria ra amasouala ewe fanü.

²⁸Iwe, eman soufos a feito o üreni ewe king Ahap, “Iei alon ewe Samol mi Lapalap, ‘Pokiten ekewe chon Siria ra apasa pwe ngang ewe Samol mi Lapalap eman anün won chuk, nge sap eman anün lemol, iei mine üpwe ewinnok pwe kopwe akufu ei mwicheichen sounfiu mi fokun watte. Mürin kopwe mefi pwe ngang ewe Samol mi Lapalap.”

²⁹Lon ükükün fisu rän ekewe chon Siria me ekewe chon Israel ra nom lon lenier, nge ra sasapefengen. Iwe, lon ewe afisuen rän ra maunfengen. Nge ekewe sounfiun Israel ra niela ükükün ipüküngeröü sounfiun Siria lon eu chök rän.

³⁰Nge ekewe lusun mi chüen manau ra sülong lon ewe telinimw Afek. Iwe, tittin ewe telinimw a turutiu wor o niela pwal ükükün rüe me fisungeröü. Penhatat a pwal sülong lon ewe telinimw o op lon rumwen eu imw.

³¹Iwe, nöün kewe nöüwis ra feito ren o üreni, “Äm aia rong pwe ekewe kingen Israel ra eäni ümöümöch. Kopwe mwütätä pwe aipwe üföüf üf seni tuk o apweli säl ngeni üem, mürin aipwe feila ren ewe kingen Israel, eli epwe amanauok.”

³²Iei mine ra üföüf üf seni tuk o apweli säl ngeni üer, mürin ra feila ren ewe kingen Israel o üreni, “Noum chon angang Penhatat a tüngor ngonuk pwe kopwe amanaua.” Nge Ahap a üra, “Ifa usun, Penhatat a chüen manau? I usun chök eman pwii me rei.”