1. Kraľengero 17:4-22

⁴Odarik pijeha o paňi the chaha o chaben, bo prikazinďom le vranenge, hoj tuke te anen.”

⁵Avke o Eliaš odgeľa a kerďa oda, so leske phenďa o RAJ a bešelas pro vichodos le Jordanostar paš o paňi Kerit.

⁶Odarik pijelas o paňi a o vrani leske anenas tosara the rači o maro the o mas.

⁷Ale pal varesavo časos o paňi odarik našľiľa, bo na delas andre odi phuv o brišind.

⁸O RAJ phenďa le Eliašoske:

⁹“Ušťi a dža andro foros Sarepta paš o Sidon a ode ačh te bešel, bo me ode phenďom jekha vdovake, hoj pes pal tu te starinel le chabeneha.”

¹⁰Avke o Eliaš geľa andre Sarepta. Sar doavľa paš le foroskeri brana, ipen akor ode varesavi vdova kidelas o kašta. Ov pre late zvičinďa: “Mangav tut, an mange te pijel sikra paňi.”

¹¹Sar leske džalas te anel o paňi, ov mek lake phenďa: “Mangav tut, an mange the sikra maro.”

¹²Oj leske phenďa: “Avke sar dživel o RAJ, tiro Del, nane man ňisavo maro! Hin man ča sikra aro andro čaro the olejos andro džbanos. Ipen akana kidav o kašta, hoj te džav te tavel chaben mange the mire čhaske. Kada ela amaro posledno chaben a paľis bokhatar meraha.”

¹³“Ma dara tut!” odphenďa lake o Eliaš. “Dža a ker avke, sar phenďal, ale ešeb (peršo) ker cikno maro prekal ma a an mange. Paľis ker tuke the tire čhaske.

¹⁴Bo kavke phenel o RAJ, o Del le Izraeloskero: ‘O aro andral tiro čaro aňi o olejos andral o džbanos na našľola, medik o RAJ na dela pale o brišind pre phuv.’ ”

¹⁵Avke oj geľa a kerďa avke, sar phenďa o Eliaš. A sas len but dživesa so te chal.

¹⁶O aro andral o čaro aňi o olejos andral o džbanos na našľolas, avke sar phenďa o RAJ prekal o Eliaš.

¹⁷Pal varesavo časos lake o čhavo nasvaľiľa. Oda nasvaľiben sas furt goreder, medik na muľa.

¹⁸Avke oj leske phenďa: “Ó, Devleskero manuš, so tut kerďom? Avľal mange te leperel mire bini anglo Del a te kerel, hoj miro čhavo te merel?”

¹⁹“De mange tire čhas!” odphenďa lake. Paľis iľa les andral lakere vasta a geľa leha andro upruno kher, kaj sovelas. Ode les thoďa pre peskero haďos

²⁰a zorales pes mangelas: “RAJEJA, Devla miro, soske oda kerďal kala vdovake, ke savi avľom te bešel? Soske la dukhaďal aleha, hoj lakero čhavo muľa?”

²¹Paľis o Eliaš pašľiľa upral o mulo čhavo trival a mangelas le RAJES: “RAJEJA miro, Devla! Mangav tut, visar pale o dživipen kale čhaske!”

²²O RAJ šunďa leskero mangipen avri a o čhavoro obdžiďiľa.