Kiŋ 1 17:4-22

⁴Aôm oc ônôm bu Kerit tau ma aê kajatu aoco gebe sêlôm aôm aŋga tônê.”

⁵Amboac tonaŋ Elia gêja ma gêgôm kêtôm Apômtaunê biŋ. Eŋ jagêŋgôŋ bu Kerit, taŋ kêpoac bu Jordan ŋamakeŋ oc kêpiŋa naŋ.

⁶Ma aoco sejoŋ polom to gwada gêdêŋ bêbêc ma kêtula ma eŋ gênôm bu Kerit tau.

⁷Ma gêdêŋ bêc teŋ bu tau kêpa gebe kom gêlac aŋga gamêŋ tau atom.

⁸Go Apômtaunê biŋ gêdêŋ Elia gebe

⁹“Ajôc, ôndi ma ôna Sarepta, taŋ gêc gamêŋ Sidon naŋ, ma ômoa ônê. Aê kajatu awêtuc teŋ aŋga ônê gebe êlôm aôm.”

¹⁰Amboac tonaŋ Elia gêdi gêja Sarepta. Ma gêdêŋ eŋ gêô lasê malac ŋasacgêdô eŋ gêlic awêtuc teŋ kejoŋ ka gêmoa tonaŋ ma Elia gêmôêc gêdêŋ eŋ gebe “Ôkêŋ bu ŋagec êsêp laclu mêŋjanôm.”

¹¹Ma gêdêŋ taŋ awêtuc gêja gebe êkôc bu tau naŋ, Elia gêmôêc gêdêŋ eŋ ma kêsôm gebe “Ôkôc polom ŋapopoc ŋagec êsêp lêmam êwiŋ.”

¹²Ma awêtuc gêjô eŋ awa gebe “Apômtau, nêm Anôtô, gêmoa mata jali, polom teŋ gêc aêŋa atom. Mopolom matac ŋagec to niptêkwi ŋakeneŋ, tec kêpoac laclu. Aê galoc kajoŋ ka luagêc gebe najamansaŋ êtu aêagêc latuc aniŋ su ma amac êndu.”

¹³Tec Elia kêsôm gêdêŋ eŋ gebe “Ôtêc taôm atom, ôna ma ôŋgôm êtôm kôsômgac, mago ôpac mopolom sauŋ teŋ êtu aêŋa êmuŋ acgom, go ôkôc ômôêŋ. Go ôpac êtu amagêc latômŋa êndaŋguc.

¹⁴Gebe Apômtau, Israelnêŋ Anôtô kêsôm amboac tonec gebe ‘Ku mopolomŋa oc sawa atom ma niptêkwi oc êpa aŋga ŋalakôp atom amboac tonaŋgeŋ e êndêŋ bêc, taŋ Apômtau êsakiŋ kom ênac êsêp nom êtiam.’”

¹⁵Ma awêtuc gêja ma gêgôm kêtôm Elia kêsôm. Go Elia ma awêtuc agêc latu seŋ gêŋ bêc taêsam.

¹⁶Ku mopolomŋa sawa atom ma niptêkwi kêpa aŋga ŋalakôp atom kêtôm Apômtaunê biŋ, taŋ kêsôm gêdêŋ Elia naŋ.

¹⁷Tonaŋ su, go andu ŋatauo tau nê latu gêmac kêtap eŋ sa e ênê gêmac kêtu kapôêŋ ma kêsi awa kêtôm atom, tec gêmac êndu.

¹⁸Ma awêtuc kêsôm gêdêŋ Elia gebe “O Apômtaunê ŋac, aêagêc asageŋ ŋagêdô gêdêŋ tauŋ. Aôm gôdêŋ aê gômôêŋ gebe ŋoc sec êôŋ sa êtiam enseŋ aê latuc su.”

¹⁹Ma Elia gêjô eŋ awa gebe “Ôkêŋ nêm latôm êndêŋ aê acgom.” Ma eŋ kêsip eŋ sa aŋga têna labum ma jakêpi balêm ŋaô, taŋ eŋ gêŋgôŋ naŋ, ma ketoc eŋ gêc taunê mê.

²⁰Go eŋ gêmôêc gêdêŋ Apômtau gebe “O Apômtau, ŋoc Anôtô, kêtu asageŋŋa aôm taêm gêjam biŋwapac kêtu awêtuc, taŋ gaŋgôŋ gawiŋ eŋ naŋŋa, tec gôjac eŋ latu.”

²¹Go eŋ kêmêtôc tau ma jagêu tau gêsac ŋapalê kêtu dim têlêac ma gêmôêc gêdêŋ Apômtau gebe “O Apômtau, ŋoc Anôtô, ôkêŋ ŋapalê tonec nê katu êmu êsô eŋ êna êtiam.”

²²Ma Apômtau kêkêŋ taŋa Elia nê awa ma ŋapalênê katu gêmu kêsô eŋ gêja kêtiam ma mata jali kêsa kêtiam.