1. King 17:4-22

⁴Kopwe ün koluk seni ewe öüwö, nge üa fen allük ngeni ekewe ängä pwe repwe uwala anom ikenan.”

⁵Iei mine Elias a föri usun mine ewe Samol mi Lapalap a apasa. A feila o nom arun ewe öüwö Kirit ötiuen ewe chanpupu Jortan.

⁶Iwe, ekewe ängä ra uwato ren Elias anan pilawa me ochan fituk iteiten lesosor me iteiten lekuniol, a pwal ün koluk seni ewe öüwö.

⁷Nge mürin eu fansoun ewe öüwö a pwasatä, pun esap püng üt lon ewe fanü.

⁸Mürin, ewe Samol mi Lapalap a üreni Elias,

⁹“Iei kopwe feila Sarapat mi nom arun Siton, pwe kopwe nonom ie. Üa allük ngeni eman fefin mi mä pwülüan pwe epwe amongok me ikenan.”

¹⁰Iei mine Elias a feila Sarapat. Nge lupwen a tori asamalapen tittin ewe telinimw, a küna eman fefin mi mä pwülüan a rusi mwüch. Iwe, Elias a kökköla ren neminewe o üreni “Kose mochen kopwe uwato rei ekis koluk lon eu rume pwe üpwe ün.”

¹¹Nge lupwen neminewe a feila pwe epwe uwato ewe koluk, Elias a köla mürin, “Kose mochen kopwe pwal uwato rei ekis pilawa.”

¹²Iwe, neminewe a üreni, “Mwo manauen ewe Samol mi Lapalap om we Kot, esap mwo nge wor rei pilawa mi um. Mi chök wor ekumwuch pilawa mi amas lon eu sepi me ekis apüra lon eu rume. Iei üa rusi ekoch mwüch, pun üpwe feila o amolätä ewe mongö fän itei me fän iten nei we ät, pwe aipwe mongö. Mürin aipwap mäla ren echik.”

¹³Nge Elias a üreni neminewe, “Kosap niuokus. Kopwe feila o föri usun mine ka apasa. Nge kopwe akomwen föri fän itei echö kükün nokop seni ewe pilawa o uwato rei, mürin kopwap föri anom me enen noum we ät.

¹⁴Pun iei alon ewe Samol mi Lapalap ewe Koten Israel, ‘Ewe pilawa lon ewe sepi esap itela, nge ewe apüra lon ewe rume esap pöla tori ewe rän ewe Samol mi Lapalap epwe apüngätiu üt won ei fanü.’”

¹⁵Iwe, ewe fefin mi mä pwülüan a feila o föri usun mine Elias a üreni. Nge Elias me neminewe, pwal chon leimwan meinisin ra momongö lon chomong rän.

¹⁶Ewe pilawa lon ewe sepi esap itela, pwal ewe apüra lon ewe rume esap pöla, usun Elias a apasa fän alon ewe Samol mi Lapalap.

¹⁷Ekoch fansoun mürin, nöün ewe fefin we ät a samau. Nge an samau a chök lapala pwe a mäla.

¹⁸Iwe, neminewe a üreni Elias, “En aramasen Kot, pwota ka föri iei usun ngeniei? Ka feito pwe kopwe achema ngeni Kot ai kewe tipis pwe nei we ät a mäla.”

¹⁹Nge Elias a üreni neminewe, “Kopwe uwato rei noum we ät.” Iwe, Elias a angei ewe ät seni fän mwärin neminewe, a uweetä lon rumwan we mi nom asan o akonala won an peet.

²⁰Mürin, Elias a iotek ngeni ewe Samol mi Lapalap, “Ai Kot Samol mi Lapalap. Pwota ka aworato feiengau won ei fefin mi mä pwülüan? Ei fefin a fen etiwaei, nge iei ka niela nöün we ät.”

²¹Mürin, Elias a chapala won inisin ewe ät fän ülüngat o iotek ngeni ewe Samol mi Lapalap, “Ai Kot Samol mi Lapalap, kose mochen amanauasefäli ei ät.”

²²Iwe, ewe Samol mi Lapalap a aüselinga än Elias iotek o amanaua ewe ät, pwe a manausefäl.