1 Reye 17:4-22

⁴Maʌ̃ do zaque baidoda bʌa do b̶aya. Idjab̶a mʌ̃a jarasia ĩbanaba djicoda bʌ itea eded̶amãrẽã.–

⁵Ara maʌ̃da Ãcõrẽba jarad̶a quĩrãca Elíaba osia. Jordaʌ̃ dod̶eba ʌ̃mãdau odjabariare b̶ʌ Querit do zaqued̶e b̶ad̶e wãsia.

⁶Maʌ̃ne diaped̶aza, quewaraza bid̶a ĩbanaba paʌ̃da, nedjara sid̶a idji itea edebadjid̶aa. Do zaque baidora do b̶abadjia.

⁷Baribʌrʌ maʌ̃ druad̶e cue zeẽ́ b̶ʌ bẽrã do zaquera poasia.

⁸Maʌ̃be Ãcõrẽba Elíaa nãwã jarasia:

⁹–Namaʌba Sidoʌ̃ druad̶aa wãped̶a Sarepta purud̶e b̶edua. Mʌ̃a jãmabema pẽdra wẽrãa jarasia bʌra ne cobimãrẽã.–

¹⁰Ara maʌ̃da Elíara Sarepta purud̶aa wãsia. Maʌ̃ purud̶e ed̶a wãbadama jũẽbʌrʌd̶e unusia pẽdra wẽrãba tʌbʌda jʌrʌ pe b̶ʌda. Maʌ̃ pẽdra wẽrãra trʌ̃ped̶a nãwã jarasia: –Mʌ̃ quĩrã djuburia mʌ̃ itea baidoda enedua doi carea.–

¹¹Maʌ̃ pẽdra wẽrã baido jued̶e wãbʌrʌd̶e Elíaba wayacusa trʌ̃ped̶a jarasia: –Idjab̶a mʌ̃ quĩrã djuburia paʌ̃da maãrĩ mʌ̃ itea enedua.–

¹²Pẽdra wẽrãba panusia: –Bʌ Ãcõrẽ zocai b̶ʌ quĩrãpita wãrãneba jaraya: mʌ̃ra paʌ̃ neẽ́ b̶ʌa. Ab̶abe cugurud̶e harinada jʌwa baratʌma ab̶a erob̶ʌa idjab̶a zocod̶e nedragada maãrĩ erob̶ʌa. Maʌ̃ carea mʌ̃a tʌbʌda maãrĩ jʌrʌ pe b̶ʌa diguid̶a edeped̶a maʌ̃ harinara mʌ̃ itea idjab̶a mʌ̃ warra itea bid̶a ãbui carea. Maʌ̃da cod̶aped̶a daira jarrababa beud̶ia.–

¹³Elíaba panusia: –Ne wayarãdua. Bʌa jarad̶a quĩrãca od̶e wãdua. Baribʌrʌ naãrã bʌa erob̶ʌ harinaba mʌ̃ itea paʌ̃ zaqueda ab̶a ãbu enedua. Maʌ̃be bʌ itea idjab̶a bʌ warra itea bid̶a ãbudua.

¹⁴Mãwã odua israelerã Ãcõrẽba nãwã jara b̶ʌ bẽrã: “Bʌa harina cugurud̶e erob̶ʌra, nedraga zocod̶e erob̶ʌ sid̶a jõẽ́a ab̶a Ãcõrẽba wayacusa naʌ̃ druad̶e cue zebibʌrʌd̶aa.”–

¹⁵Ara maʌ̃da Elíaba jarad̶a quĩrãca pẽdra wẽrãba od̶e wãsia. Coped̶ad̶acarea wad̶ibid̶a harinara b̶esia Elíaba, pẽdra wẽrãba, dji warra bid̶a ewariza cod̶amãrẽã.

¹⁶Ãcõrẽba Elíad̶eba jarad̶a quĩrãca harina cugurud̶e b̶ʌra, nedraga zocod̶e b̶ʌ sid̶a jõẽ́ basía.

¹⁷Ewari ab̶a pẽdra wẽrã warrara cacua biẽ́ b̶esia. Ara maʌ̃ba jũãcãyã nũmeped̶a jaid̶asia.

¹⁸Maʌ̃ carea pẽdra wẽrãba Elíaa jarasia: –Ãcõrẽneba bed̶eabari, ¿cãrẽ cãrẽã mʌ̃ra mĩã sẽne zesi? ¿Mʌ̃ warra beumãrẽã mʌ̃a cadjirua od̶ara Ãcõrẽa quĩrãnebabid̶e zesica?–

¹⁹Elíaba panusia: –Bʌ warrara mʌ̃́a diadua.– Ara maʌ̃da warrara pẽdra wẽrã b̶acarad̶e b̶ʌda Elíaba bara edaped̶a ʌ̃taarebema dejãne idji cãĩ b̶abarimaa edesia. Mama idji cʌd̶ad̶e b̶ʌsia.

²⁰Maʌ̃be Elíaba Ãcõrẽa nãwã bed̶ea djuburiasia: –Mʌ̃ Boro Ãcõrẽ, naʌ̃ pẽdra wẽrãba mʌ̃ra idji diguid̶a bia erob̶ʌa. ¿Bʌa cãrẽ cãrẽã idjira sopua unubi b̶ʌ? ¿Cãrẽ cãrẽã idji warrara jaid̶abisi?–

²¹Ara maʌ̃da Elíara b̶arima ũbea warra jaid̶ad̶a ʌ̃rʌ̃ b̶arrub̶ari cob̶esia. Mãwã o b̶ʌd̶e Ãcõrẽa nãwã bed̶ea djuburiasia: –Mʌ̃ Boro Ãcõrẽ, mʌ̃ quĩrã djuburia, naʌ̃ warrara ʌ̃rẽbabidua.–

²²Elíaba bed̶ea djuburiad̶ada Ãcõrẽba bia ũrĩna bẽrã warrara ʌ̃rẽbabisia.