Te Israel me Juda Hani Sigo Tuni Bidigo Po Elalubo Buku Deli 17:4-22

⁴“Nago te wę tuyu bidao. Tama eno te ba tadibolo olama, tama augwaligo tigidali sogo nagebolo nai magasu yaibao,” wali.

⁵Tama tialima, te profet Elaija agai te Genuai Bidigo te wali podu wali pai, tama aga pelama, te wę Kerit pąde bidali, te Jordan wę u badu, te giliga pedalobo badu dao.

⁶Tama te tigidali sogo te kigamu me, tama te pio me, te ba tadi dabe augwaligo te nai bret me, me te tuabo mi dabe me, te ba dabego agabolo magasuduali, tama agai te nai dabe tuyu, tama aga te dwasianu wę tuyu, tama bidali.

⁷Tiali goli, te Israel bulude te tulubage munu me tulube, tama teyu, te me badu sogo nosali, te dwasianu wę Kerit me sula siyu yai.

⁸Te wę Kerit te sula sai, tama tialima, Genuai Bidigo te Elaijabolo e tama po ola mani,

⁹“Tama nage hogodama, nage te Saidon bulude te Sarefat hanu taunba bidigi pao,” wali. “Te taunde te Israel hani isąwai we me deli te bidibao, te we aga bidi isai dao,” wali. “Eno te we dąį ilibao, te wego agai nage tubo nai tau siyu, tama agai nage bugagia tonalumainao,” wali.

¹⁰Tama tibaso, Elaija aga hodaloama, Sarefat buluba pai. Tama aga pelama, te oboba sabaligi pai, tama agai suali, ma we me deligo isi selama, sisinibo suali. Elaija agai sulama, agai koneani, te we wilawe we da homu yali. Tama agai te we i weyu, e tama wali, “Ena wę tuabo homu ebuo,” wali. “Nago te wę tubo mouwa dage genagi wę tulama, tama nago enabolo magasobo usu yaibawe?” te po wali.

¹¹Te wego te Elaijago wali po odama, tama aga wę sigi peyu pali. Tama Elaijago te we ma i weyu, e tama wali, “Eno homugo nago te dwasianu tubo nai bret pedainu me magasao,” wali.

¹²Tama te wego agabolo te po wali, “Godigo nogide, naga Genuai Bidi, te God tigidali sogo bidada peyu, bidada pabo God dao, eno mu po tama obao, eno te bret nai menio,” wali. “Eno te dwasianu o gagawai nai plaua deli digi te tǫgo nigali mouwa dage genagi sospende munalubo,” wali. “Tama me te dwasianu oliv wel te gasa mouwa dage genagi sospende munalubao,” wali. “Eno megi te e dwasianu isi sesa bilibo da, teda eno te plauanu ulugi painu ebao,” wali. “Eno ogwa dali dadi sigo te megi tama silibo nai tama dadi sigo ula tulama, tama nosali dago tuabo nai mu menio,” wali, “tama teyu, da mu isaibao,” te wilawe we agai tama po wali.

¹³Tialima, te Elaijago agabolo e tama po wali, “Nago homugo naga te dwasianu nai da olama, moni homu egio,” wali. “Nage pelama, te nago munalubo wali bret tama ulao,” wali. “Tiali goli, hasia bolo nago te plauago dwasianu peda siyu, tama me te nago wel me dwasianu siyu, tama te nago te bret dali ulama, tama nago enabolo magasao,” wali. “Tama nosali naga wai dali duga sigo tuabo bret nai ula tuao,” wali.

¹⁴“Magi baso meni, God, Israel hanigo Genuai Bidi, agai e tama po wai, ‘Naga te mouwa dage genagi munalubo plaua munu me sia sogobeo, tama me te nago te wel me, te nago mouwa dage genagi sospende munalubo wel me munu me sia sogobeo,’ po wali, ‘tama munalua pobadi, te Genuai Bidigo te kulubage e tǫba tulubo bodoluba usu nigi paibao,’ po wali,” Elaijago te po te webolo wai.

¹⁵Tama tialima, te wego aga beba pelama, te Elaijago wali po gilama yali. Tama nosali Elaija dali te we aga hani dali sigo augwali tuabo nai te umabo sogo tuabo nai usu mu elaluali.

¹⁶Tama agai te mouwa dage genagide moni plaua umabo mu me munaluali, munu me sia sabe. Tama agai te wel mubo mouwa dage genagi me, te wel munu me sia sabe, tialima Genuai Bidigo agai te Elaijago pedauwalidu wali gilama yali.

¹⁷Tialima, nosali te wego te wai gasi sali. Tama te wai gasi genuai mu elama, tama te wai isali.

¹⁸Tama tialima, te wego te Elaijabolo te po wai, “Nage te Godigo sę ebo bidi dao, magi baso nago te tiwai kolesaga ena dali yaliwe? Tama nage aselama, tama Godigo homugo eno sęgę koneama, tama teyu, te eno wai isalio,” te wego te po wai.

¹⁹Tama te Elaija agai te po wei ponoyu, e tama wali, “Nago te wai enabolo mao,” wali. Tama tialima, te Elaijago agai te isali wai digi aga idago nogode agai selama, tama agai aga pibo be ugwa badu habuba selasa holali, tama agai te betba pilali.

²⁰Tama agai e tama gedu haluasa po bomai mu wali, “God, eno Genuai Bidi, te e wilawe wego ena agai bugagia tonalubo da. Magi baso nago genuai sęgę e we tigide pedelaliwe? Tama magi baso agai e wai isilaliwe?”

²¹Tama Elaija aga te wai bau badu aga sela sogo pigiluama, tama agai e tama gedu haluasa po wai, “God, eno Genuai Bidi, nago te e waigo hoboludu ogwa wai mobo ma mao,” wali.

²²Tama tialima, te Genuai Bidigo te Elaijago te gedu haluasa po wabo odama, tama agai te waigo hoboludu ogwa wai mobo ma mawai. Tama tibaso, te isali wai ma hoda holali.