1 Kiŋi 17:4-22

⁴Lapala dee lao, Emba ipwa kuki dokona kamuo nao karare. Dee yaka orapene lenge dupwame emba nenge minyuo epo jinya lao lamaipu, leya.

⁵Leyamo dokopa Ilainja Kamongona pii warombo sepala ipwa kuki epenge Seriti lenge dokona repeta palyuo piso kareya.

⁶Dokopa baa yaka dupwame yangama alemanji lao nenge minyuo epo maiyami dee ipwa kuki dokona ipwa epeyamo kamuo neya.

⁷Dokopa enakana dusale apu epa naya dokome ipwa kuki dokona ipwa epeya doko sokoya.

⁸Dokopa Kamongo dokome Ilainja lamaiyuo lao,

⁹Epapu yuu taone Serepate lenge yuu Saitone repeta singi dokona emba karala pupi. Dokopa enda waiyande doo palenge dokome emba nenge pinya lao lamaipu, leya.

¹⁰Dokona lao Ilainja baa yuu Serepate peya. Pao yuu taone dokona kame kambu dokona peyamo dokopa enda waiya doko isa ponale yapo nyuo kareyamo kandeya. Kandapala baame enda doko kando lao, Ipwa kamuo jinya, leya.

¹¹Dopa leyasa enda doko ipwa nyela peyamo dokopa dee kamba kee lapala nenge borete lapo opetae minyuo epo jinyako leya.

¹²Dokopa enda dokome isingi lao, Embena Kamongo lete karalu karenge Anatu doko kando lalu lao lao, Namba borete mendepe reta napu. Namba retapu dusipa kingi kete pyao dopale palawa kuki lama pere dokona silyamo dee isa olipi ipwange lama pee dokona petamo. Namba dae isa ponale mungyuo nyela ipuŋu minyuo anda papala nenge kuki retapu dolapome nambana wane dokopa nambapa suu pyao nenge wasaro. Dolapo nao ote pyuo narambanopa dee enakana lopo dokome nambwa angi kumaramba lyamo, leya.

¹³Leyamo dokopa Ilainjame enda doko lamaiyuo lao, Mona randa napala mee pao embena seramo dupwana wambo nambana borete kuki mende wasakapala minyakao ipu. Enakana seramo dupwa embapa ikinyipa ingyuo range wasareŋe, leya.

¹⁴Dokona lao Kamongo Isaraele wambunya Anatu dokome dopa lapya. Namba Kamongo dokome apu peyapa narono dokopa pere dokona palawa ota nara dee pee dokona isa olipi ipwange dupwa ota narako lapya, leya.

¹⁵Dokopa enda waiya dokome Ilainja pinya leyamuli pyuo piya dokopa yuu gii malu dupwana nakama nenge kapa siyamo neyami.

¹⁶Doko Kamongo dokome Ilainja keta lalu lao lao lamaiyamuli pyuo pere dokona palawa ota naya dee pee dokona isa olipi ipwange ota nayako.

¹⁷Dokopa enakana mendepa enda waiya dokona ikinyingi doko anga piya doko ama pyao konda nyepala kopetame piyamopa baa kumuo oteya.

¹⁸Dokopa enda dokome Ilainja kando lao, Anatunya akali doko. Embame namba keta akipamo yulu dake pilisi? Anatumi nambana koo dupwana kamba suu pyapala dokona dee nambana wane kumungi dokona pyambwakana lao ipisi? leya.

¹⁹Dokopa Ilainjame enda doko lamaiyuo lao, Wane doko namba jinya, leya. Lapala wane doko endangimi kupyaro kareya doko nyepala soo anda ketae baa paleya dokona papala ratena ketae reteya.

²⁰Retapala baame ateŋa poraiyuo pyao lao, O Kamongo nambana Anatu, enda waiya dake kando yulu koo dopale doko akipamo pilisi? Enda baame namba kapa ingyuo rapu pipapyamopa dee epapu embame banya ikinyingi doko pyakamilyane, leya.

²¹Enakana Ilainja baa yuu remasa wane yongo dokona ketae pangu sepala ateŋa lao, O nambana Kamongo Anatu, wane dake kamba lete pyuo nyepe, leya.

²²Dokopa Kamongome Ilainjana ateŋa dokona isingi yano pyakamiya. Doko wane baa yongo peparae lenge rapala ŋee ŋaepe siya.