1 BƐKPÀÀTÌBƐ̀ 2:12-41

¹²Mɛm̀mɛ kɛ̀ Sɑdomɔɔ sɔɔtɛ́ o cicɛ Dɑfiti kó tikpɑ̀tì, kòo kpɑ̀tìì dɛukɛ mɛdiɛ̀.

¹³Dɛ mɔ̀nnì kɛ̀ Adonniyɑɑ, Dɑfiti pokù Akiti do ò pɛitɛ́nɛ̀ wèe kɔtɛ kɛ́yɑ̀ Bɑtisebɑɑ Sɑdomɔɔ yɔ̃, kòo ò bekɛ kɛ dɔ̀: A kɔ̀tɛnní kusɑ̀ɑ̀kù nku bɑkɑɑ̀? Kòo ò tɛ̃̀ńnɛ́ kɛ dɔ̀: Ɛ̃ɛ̃,

¹⁴kɛ́deè kɛ dɔ̀: M mɔkɛ tìmɑtì nti kɛ bo dɑ nɑ́kɛ́. Kòò dɔ̀: Bɛ́i!

¹⁵Kɛ̀ Adonniyɑ dɔ̀: A yɛ̃́mu ɑ mɔ́mmuɔ, mmíì do dòmmɛ̀ kɛ́di tikpɑ̀tì. Isidɑyɛɛribɛ bɛmɔu do bɑɑ míì bo nɑɑ́mmɛ̀ okpɑ̀ɑ̀tì. Dɛ̀ mɛ nyí yie nkɛ mɛ̀ dɔ̀ɔ̀. Kɛ̀ n tebitɛ Sɑdomɔɔ weè tì di, ti Yiɛ̀ nKuyie nkuù mɛ nyɛ̃.

¹⁶N dɔ́ ɑ n dɔɔ̀ tìmɑtì nti, ɑ bɑ́ɑ́ yetɛ! Kɛ̀ Bɑtisebɑɑ dɔ̀: Bɛ́i!

¹⁷Kɛ̀ Adonniyɑ dɔ̀: N dɑ bɑ́ɑ́mmu, mɔɔ okpɑ̀ɑ̀tì Sɑdomɔɔ kòo n duɔ́ nhAbisɑki Sunɛmmu ɛì kou kɛ̀ m puokɛ, n yɛ̀mmɛ̀ dò nhò bɑ́ɑ́ wè ndɑ yetɛnɛ̀.

¹⁸Kɛ̀ Bɑtisebɑɑ dɔ̀: Dɛ̀ wenni, m bo kɔtɛ kɛ́yɑ̀ okpɑ̀ɑ̀tì, kóò bɛ́innɛ̀ ɑ kpɛ́í.

¹⁹Mɛm̀mɛ kòo kɔtɛ kɛ́yɑ̀ Sɑdomɔɔ kɛ bo ò bɛ́innɛ̀ Adonniyɑ kpɛ́í. Kòo kpɑ̀ɑ̀tìi Sɑdomɔɔ ítɛ́ o kɑ̀rì ĩ́nkɛ̀ kɛ́kétɛ́ní o bíɛ́kɛ̀ kɛ́nínkú kɛ́sĩ́nnɔ́ɔ kɛ́wɛ̃tɛ kɛ́kɑri, kɛ́duɔ́ nkɛ̀ bɛ̀ɛ dɔú ndikpɑ̀ɑ̀tìkɑ̀rì tɛrì o bɑkù yoú, kòo yɔ̃ɔ̃ kɑri kóò pɛ̀ɛ́nnɛ̀,

²⁰kóò nɑ̀kɛ́ kɛ dɔ̀: N dɔ́ kɛ dɑ mɔɔ tìmɑtì nti sɑ́m̀pɔ́rɛ̀ ɑ bɑ́ɑ́ yetɛ dò! Kòo kpɑ̀ɑ̀tìi ò tɛ̃̀ńnɛ́ kɛ dɔ̀: N yɔ̃ mɔɔ ɑ dɔ́ dɛ̀ n yí yóó dɛ̀ ndɑ yetɛnɛ̀.

²¹Kòo yɔ̃ dɔ̀: Ti bɑ́ɑ́ duɔ́ nhAbisɑki Sunɛmmu kou Adonniyɑ kòo puokɑɑ̀?

²²Kɛ̀ Sɑdomɔɔ ò tɛ̃̀ńnɛ́ kɛ dɔ̀: Dɛ̀ yĩ́mɛ kɑ̀ɑ tu n duɔ́ nhAbisɑki Sunɛmmu kou Adonniyɑ kòo puokɛ? A pɑ̃̀nkɛ nɑ nyĩ nh ò duɔ́ ntikpɑ̀tì, weè mɛ ntúmɛ̀ Mpo. Duɔ́ nkɛ̀ nh ò duɔ́ ntikpɑ̀tì wenwe nɛ̀ o kɔbɛ nɛ̀ ikuɔ́ nìùtì Abiɑtɑɑ nɛ̀ bɛhɑ̃ɑ̃pɔ̀mbɛ̀ kóo kótì Soɑbu.

²³Kɛ̀ Sɑdomɔɔ pɑrìkɛ̀ nɛ̀ ti Yiɛ̀ nKuyie nyètìrì kɛ dɔ̀: Adonniyɑ mɛ ndɑ̀ɑ́tí kɛ bekɛ tì, kɛ̀ n yí ò kùɔ ti Yiɛ̀ nKuyie nni mpotɛ́!

²⁴Nɛ̀ ti Yiɛ̀ nKuyie nkùù n kɑ̀nnɛ n cicɛ Dɑfiti kó dikpɑ̀ɑ̀tìkɑ̀rì, kɛ fìí n kpɑ̀tì, kɛ bɛ́i nkɛ yĩ́: Tikpɑ̀tì bo mbo n cĩ́ɛ̃̀tɛ̀ sɑ̃́ɑ̃̀. M pɑ̀rìkɛ̀mu nɛ̀ ku yètìrì kɛ tú Adonniyɑ bo kú yíe,

²⁵kɛ́tɔ̃ nYeoyɑdɑ birɛ Bennɑyɑ kòo ò kùɔ. Mɛm̀mɛ Adonniyɑ kumɛ̀.

²⁶Kòo kpɑ̀ɑ̀tì Sɑdomɔɔ nɑ́kɛ́ ikuɔ́ nìùtì Abiɑtɑɑ kɛ dɔ̀: Ítɛ́ diɛ nkɛ́kò nhAnɑtɔti ɑ ciɛ. A dò nkɛ́kuɔmu. M mɛ nyí dɔ́ kɛ dɑ kuɔ kɛ yɛ̃́ fɔ̃́ɔ̃̀ do tɔumɛ̀ ti Yiɛ̀ nKuyie ntɑummɛ̀ tɔu n cicɛ Dɑfiti kó dimɔ̀nnì, kɛ̀ di wɛ̃nnɛ́ kɛ tɑ mɛhɑ́ɑ́rìmɛ̀ miɛkɛ.

²⁷Mɛm̀mɛ Sɑdomɔɔ ò bɛ̀timɛ̀ bɑ́ ò tɛ̃́nkɛ í ntú ikuɔ́ nìùtì. Dɛ mɔ̀nnì kɛ̀ dɛ̀ɛ dɔɔ̀ ti Yiɛ̀ nKuyie ndo nɑ̀kɛ́ tì Sidoo ɛì kɛ dɔ̀ tì yóó tuɔkɛní Edii cĩ́ɛ̃̀tɛ̀.

²⁸Kɛ̀ Soɑbuu keè tìì tùɔ̀kɛní Adonniyɑ nɛ̀ Abiɑtɑɑ kɛ́cokɛ́ kɛ́tɑ ti Yiɛ̀ nKuyie ntɑummɛ̀ tou kɛ́ncómmú kɛ́pĩ́ ndiwũɔ̃tɔ̀nnì bɑ̀kɛ̀. Soɑbu do kómmúmu Adonniyɑ nɛ̀ dimɔ̀nnì, ò mɛ ndo í kómmú Abusɑdɔmmu.

²⁹Kɛ̀ bɛ̀ɛ nɑ́kɛ́ okpɑ̀ɑ̀tì Sɑdomɔɔ kɛ dɔ̀: Soɑbu cokɛ́ kɛ kɔ̀tɛ ti Yiɛ̀ nKuyie ntɑummɛ̀ tou kɛ cómmú kɛ́pĩ́ ndiwũɔ̃tɔ̀nnì bɑ̀kɛ̀. Kɛ̀ Sɑdomɔɔ tɔ̃ nYeoyɑdɑ birɛ Bennɑyɑ kɛ dɔ̀: Kɔtɛ kóò kùɔ.

³⁰Kɛ̀ Bennɑyɑ kɔtɛ kɛ́nɑ́kɛ́ Soɑbu kɛ dɔ̀: Okpɑ̀ɑ̀tì tu ɑ yɛ̀nní dɛndɛ, kòo yetɛ kɛ dɔ̀: N yí yɛtì! N dɔ́ kɛ́kú diɛ ndɛ. Kɛ̀ Bennɑyɑ wɛ̃tɛ kɛ́nɑ́kɛ́ okpɑ̀ɑ̀tì Soɑbu nɑ̀kɛ́ tì.

³¹Kòo kpɑ̀ɑ̀tì dɔ̀: Dɛ̀ wenni, kuɔ we dɛborɛ̀ kɛ́ndònnɛ̀ ò bɛ́i ntì, kóò kũnnɛ́. Kòò kùɔ bɛ̀ɛ̀ nitisɑ̀ɑ̀bɛ̀ bɑ́ɑ́ ti bɔntɛ́ kukúsĩ̀nkù, mí nnɛ̀ n cicɛ cĩ́ɛ̃̀tɛ̀.

³²Nɛɛ birɛ Abunɛɛ Isidɑyɛɛribɛ ɑ̃ɑ̃pɔ̀mbɛ̀ kóo kótì nɛ̀ Amɑsɑ Sudɑɑ ɑ̃ɑ̃pɔ̀mbɛ̀ kóo kótì. Bɛ̀ do tú bɛnitisɑ̀ɑ̀bɛ̀ mbɛ koò pɛ̃ɛ̃tɛ́, kòo bɛ̀ kùɔ disɔ̀rì bɑ́ n cicɛ í yɛ̃́. Dɛ kó mɛyɛi mbo do o yuu ĩ́nkɛ̀.

³³Bɛ̀ɛ ò bɔntɛ́ kusĩ̀nkù wenwe nɛ̀ o cĩ́ɛ̃̀tɛ̀ kɔboo sɑ̃́ɑ̃̀. Kɛ̀ ti Yiɛ̀ nKuyie nkó mɛsɑ̀ɑ̀ nní mbonɛ̀ Dɑfiti nɛ̀ o yɑɑ̀bío ìì yó nsɔkɛ́ o kpɑ̀tì sɑ̃́ɑ̃̀.

³⁴Mɛm̀mɛ kɛ̀ Yeoyɑdɑ birɛ Bennɑyɑ kɔtɛ kóò kùɔ kɛ̀ bɛ̀ɛ o kũnnɛ́ o cĩ́ɛ̃̀tɛ̀. O cĩ́ɛ̃̀tɛ̀ do bo dikpɑ́ɑ̀ ndi.

³⁵Dɛ mɔ̀nnì kòo kpɑ̀ɑ̀tìi túótɛ́ Bennɑyɑ kɛ́cónnɛ́ Soɑbu fɔ̃̀tìrì kòò mbɑkɛ́ bɛhɑ̃ɑ̃pɔ̀mbɛ̀, kɛ́túótɛ́ Sɑdɔki kɛ́cónnɛ́ Abiɑtɑɑ fɔ̃̀tìrì kòo ntú ikuɔ́ nìùtì.

³⁶Kɛ̀ Sɑdomɔɔ duɔ́ nkɛ̀ bɛ̀ɛ yúní Simɛii, kòo ò nɑ̀kɛ́ kɛ dɔ̀: Mɑɑ́ ɑ cĩ́ɛ̃̀tɛ̀ Sedisɑdɛmmu kɛ́mbo, ɑ bɑ́ɑ́ yɛ̀ kɛ́ntú ɑ bo kɔtɛ dɛ̀mɑrɛ̀.

³⁷Kɑ̀ɑ yɛ̀ diyiè mɑrì kɛ sèńtɛ́ kukó nSetinɔɔ ɑ nyɛ̃́ kɛ dò nhɑ kumu, dɛ̀ mɛ mbɑ́ ntú n kpɛti, nɛ̀ ɑ yuu ndi.

³⁸Kɛ̀ Simɛii dɔ̀: Dɛ̀ wenni okpɑ̀ɑ̀tì, n yóó dɔɔ̀mu ɑ bɛ́i ntì. Mɛm̀mɛ kɛ̀ Simɛii mbo Sedisɑdɛmmu kɛ́mɔntɛ.

³⁹Yɛbie nyɛ̀tɑ̃ɑ̃ti kó difɔ̃nkúò kòo kó tidɑɑtì mɑtì tidɛ́tìi cokɛ́, kɛ́kɔtɛ Mɑɑkɑ birɛ Akiisi Kɑti kóo kpɑ̀ɑ̀tì borɛ̀. Kɛ̀ bɛ̀ɛ nɑ́kɛ́ Simɛii kɛ dɔ̀: A dɑɑtì bo Kɑti nwe.

⁴⁰Kòo dekɛ o sɑ̃mmɑrímú kɛ́kɔtɛ Kɑti, kɛ́cɔutɛ́ o dɑɑtì Akiisi borɛ̀, kɛ́wɛ̃tɛ kɛ́kònnɛ̀ Sedisɑdɛmmu.

⁴¹Kɛ̀ bɛ̀ɛ nɑ́kɛ́ okpɑ̀ɑ̀tì Sɑdomɔɔ kɛ dɔ̀: Simɛii kɔ̀tɛ Kɑti kɛ wɛ̃̀tɛ kɛ kò nSedisɑdɛmmu.