1Laa naa rso diidz lo to: Goḻguieṉ none gnab to lo Dios por grëse miech ne ndxie lo guidzliu, goḻnab lo me guṉlay me zho, gacnieṉ me zho; ni goḻdeed xquizh lo me por grëtaa ncuaaṉe ruṉ me.
2None gnab to lo me gacnieṉ me grëse zha ne nac wxtis, grëse zha ne rnabey, gdeed me guieḻbiini lo zho zaacse guṉ zho guieḻwxtis, zaacse gnabey zho; zeeṉa tibliladz cue miech, iṉe gban ne zigne racladz me, sin choot peet glisquid lo ne.
3Sca nagoṉ nonguieḻ dziuuṉ ne, ni scagaa rdziladz Dios, meṉ ne pxeeḻ Jesús biaadsilaa grëse miech lo doḻ;
4meṉ ne racladz grëse miech sëëb xnëz Jesús, gacnaṉ zho miṉe nac diidzli.
5Guieṉ zho gaṉle ne tibaque Dios no, ni tibaque meṉ ne zac gdziṉnie grëse miech lo me: lëë meṉ co nac Jesús, meṉ ne goc miech biaad lo guidzliu;
6sac goṉ Jesús nac meṉ ne bdeed xquieḻmban, beet zho me, bdiizh me xtoḻ miech. Miṉ rii nagoṉ racladz Dios gacnaṉ miech leṉ dze rii.
7Ni laa me pxeeḻ naa none naaw lo grëse zha ne nacd zha Israel, noseed naa zho grëse miṉe nac diidzli, zeeṉa guieṉ zho dib zdoo zho gliladz zho Dios. (Miṉe rne naa nu diidzliw, rquidieed naa.)
8Laa naa racladz sca, zaatne notaa zha ne dib zdoo rliladz Dios, grëse zha bgui none gzodiidznie zho Dios. Ni zeeṉe gzodiidznie zho me, none iṉe mbe zdoo zho, choot lo zha rlëëd zho, choot zha nodiḻnied zho.
9Laa grë meṉ wnaa, racladz naa tsoxco zho zaacse gacwxab zho, niowse, tibliladzse gac zho. Sac grë meṉ wnaa ne rliladz Dios, par gluniow zho rquiind ne gooṉ dieṉ paraa xixcuaa guitsguic zho, dieṉ pe quie rbebni, pe or gac xnil zho, gac zhibguiaa zho, pe lar niazh ne gacwgaa zho.
10Par gluniow zho, rquiin zaacse gbannie zho samiech zho, zig none gban zha ne nole xnëz Dios.
11Zig nac leṉ yadoo, none tibliladzse gac zho, dzese sob zho yquiaadiag zho teḻ pe nac wseed ne noyac;
12gnedzd naa diidz ne zha so cseed miech, o zhagaa gnabey lo mgui. None dzese sob zho,
13sac goṉ zeeṉe psaṉ Dios miech lo guidzliu, glose bzaa me Adán, dzigoraa bzaa me Ev.
14Ni stiba, pquidied meṉdox Adán, sinque laa ma güeyquidie Ev; ni porne bliladz Ev xtiidz ma, ga bdiits Ev xtiidz Dios.
15Per silaa Dios wnaa lo xtoḻ zho, teḻne dib zdoo zho gliladz zho me, tsoxco zho gban zho zigne racladz me, guieṉ zho guṉ zho miṉe rieguiaḻ wnaa, gap zho xpëëd zho ni cchoob zho win.
