1Oras neꞌe, haꞌu atu kahuu foo lia tateꞌan nuneꞌe: Hamulak bodik ema hotu-hotu. Kalo emi seꞌi oin baa Naꞌi Maromak, hakroꞌan nebee Nia tulun ema susar sia. Hamulak hodi sera dodan baa Nia, tan Nia laran diꞌak.
2Hamulak bodik naꞌin no ulun sia. Hodi nunia, ita hotu-hotu bele moris mamatek no dame, tuir Naꞌi Maromak hakaran. Tan moris nunia, fatan bodik ema mak loꞌu-sudur baa Nia.
3Hamulak nunia moos kona baa Maromak neon. Nia, itakaan Maksorin
4mak nakara sori ema hotu-hotu. Nia moos nakara ema hotu-hotu natene hanorin loos. Hanorin nia, nuneꞌe:
5Naꞌi Maromak, ida dei. Ailalete moos, ida dei. Ailalete nia, mak Yesus Kristus. Yesus Kristus mak nalo Naꞌi Maromak laran malirin baa ita ema raiklaran. Yesus, ema raiklaran nodi aan.
6Nia latan isin lolon atu sori ita nosi itakaan salan. Maromak Niakaan oras toꞌo tiꞌan atu nalore hanorin nia baa ema hotu-hotu.
7Tan baa nia, Nia boi nola haꞌu kdadi klosan atu kbaa katak ema mak lahoos Yahudi sia iha fatin hotu-hotu, kodi kanorin sia nebee sia fiar baa Naꞌi Yesus no moris tuir dalan mak loos. Saa mak haꞌu katak neꞌe, tebes no loos.
8Haꞌu kakara nuneꞌe: Kalo emi libur malu atu hamulak, emi musti diꞌa-diꞌak ho malu. Keta hirus malu. Keta toe malu. Kalo foti liman atu hamulak, emikaan neon musti moos.
9Nunia moos, feto sia. Haꞌu kakara nebee sia nahulin isin lolon nalo fatan. Tau faru mak noo kneter. Sia keta natudu lisan nebee ema natutuk matan baa sia tan siakaan fuuk ilas oi-oik, lale, siakaan faru folin todan mak la noo kneter, lale, sia nafutar aan liu resik nodi mean-mutin no morteen. Lia mak nalo feto kabaas, lahoos nunia. Lia mak nalo feto kabaas, mak neꞌe: siakaan hahalok diꞌak no siakaan neon moon. Lia nia mak fatan bodik feto mak loꞌu-sudur baa Naꞌi Maromak.
11Kalo emi ema sarani libur malu atu rona hanorin, feto sia musti tuir ukun nodi rona hanorin nia diꞌa-diꞌak. Sia keta mu-muun.
12Tuir haꞌu, la kona, kalo feto sia nasaꞌek aan toꞌo ukun mane no nanorin mane. Diꞌak liu, feto sia mamatek dei.
13Tan Naꞌi Maromak naseꞌi uluk Adam, foin naseꞌi Efa.
14Lahoos Adam mak kona beꞌur uluk nosi diabu ulun, mais feto. Nahuu hori oras nia, ema raiklaran nakur Naꞌi Maromak ukun.
15Masik nunia moos, feto bele netan moris, tan nahoris oan. Surak sia fiar baa Yesus Kristus, sia moris nadomi malu, sia moris fatan bodik Kristus eman nodi neon moon.
