1Anamag ambarelamsinne o'omnena ane: Allahag molon yubu mololapmundi, teko wamsilea sembe molbarelamsululom. Mololapmundi, nimi ni sembe babe Allahag molona molbarelamsimundi, Allahri tarelamsilne sembe, “Naba Nani, wali tarelamsilam” aro omeklamlulom.
2Yubu sia lerop nangap nimi nubu nang a'un sale-sale piamsiang nangap sembe babe molona Allahag molbarelamsululom. Molbarelamsimunne, “Tam yogne-yogne orog wamleba, aingniro wana wali uro wameberi, Allahri seneragna sunsunum uro malia uan koma wamukap,” aro molbarelamsululom.
3Undo ulapmunne agha Allah nu taulbahiropne poneko wana wali nenelamukap.
4Eldi yeng seneropnena, “Nimi ni sikne Yesus sembe el taheng. El taikti, Yesusag 'Sikne' aro seneraglamik andarina, sindi malia ulamangne agha taulbahinun,” aro yeng senelamla.
5Tam nene sembe sik yubu lemnuan. Allah nhonog wamlaba, nunap Allahap sembe anabiag talamlari, nu Allahap ma'abahinepne ot nhonog wamla. El nhonog wamlange poneko Allahri “Nimi so'oag nimi taulbahileri, saelbahilul,” aro poghogne Yesus Kristus wamla.
6El neneko “Nimi so'oag nimiri mali-malia uropne sembe kom nembahane,” aro kamna toptaogti, Eldi nimi taluro wali nembahinep. Yesusti undo unuaogne nenena, Allahri “Wene Nari wana kembaukang” senen ko'oag agha Yesusti uaogpa, Allahri “Yesusti uropne pere agha nimi ni Nanag saombanep,” aro yeng sembaogne lag taog.
7Undo unuaogne nene sembe Yesusti na pogneog. Poglamneogti, “Yahudi sisa kom nimiag yubu walinge Yesus sembe lag phoro sik uro ambarelamsileba, sik seneraglamukang,” aro Yesusti na pogneog. Nari lemnange nene orolenange agha lemna kom, otsikne agha lemna.
8Nari yeng senelamnangena, nimi kabuni tala-tala wamang nimi sindi wanaag, “Allahri senenne sunsunum uro ulamukap,” aro sae towalengero Allahag omekto molona mololamukang. Nari yeng senelamnange, “Allahri senenne sunsunum uro ulamikti, omekto mololamik andarina, nimiap-nimiap waptangkamna koma, nimiap se'el neneptangkamna koma wamukang,” senelamna.
9Kelabo sembe babe nari yeng senelamnangena ane: Allah omektop nimiri ulamukangne sunsunum uro sindi nongag enektangkamukang. Ora nimiri a'un anabiag kelabori nongag enektoamikne kembahiikti, “Ot sunsunum uro enektoamla,” senelamukang. A'un anabiag kelabo kembahiik nimiri, “Yesusag seneragto wana marop kelabo wamangdi, sunsunum uro enektoamang” senelamikti, kiplamsiikne sembe na yeng. Allah omektop kelabori sindi hongag leng-leng aroba emas kamna maikno toropne agha kauplamikti, ag babe kamna maiknoro torop ag agha enektangkamikpa, nimiri haing phende wilindi tiboghahiikne nene mali. Allah omektop kelabori sindi wali-walia towalengeptanep saogne uanepnena, sa'a-sa'a walia ulapmunba, nimiri kembahiikti, “Walia maikno ulamangdi, wali kelabo wamang,” sembaukang.
11A'un Yesusag seneragtop nimiap winiltalapmundi, kelabori Allah yubu sembe nengabo ambarelamsiseng kom. Kelabo yubu koma wamikti, ka'eamikpa, kaubuniri yubu ambarelamsiikne kelabori wana mamleba, ka'elamik tanena, el talamukang. Allah yubu lero winirobag nengabori Allah yubu ambarelamsiikpa, kelabori “Poneri yubu lelamlange ka'emnun kom,” aro ulamikne nene sunsunum kom.
13“Kelabori nengabo amoro ambarelamsiseng kom,” aro ambatsinne nenena tam nene sembe. Allahri nimi sunulamsiogti, Adam samenag sumbaogti, Hawa amik sumbaog.
14Allahri nimi sumbahiogpa, Adam poneko phaeri yubu orolena yubu sik sembaog kom. Sik sembaog kom aghana, Hawa keleneko phaeri yubu orolena yubu sik sembaogti, Allah yubu lebogne irikna phibaog. Adam poneko babe irikna phibaog aghana, phaeri yubu orolena yubu sik sembaog koma phibaog. Ane sembe Allahri kelabo sembe tam pipsiogne sunsunum uro nengabo umag wamukang.
15Kelabo sembe “Nengabo umag wamukang,” alamna aghana, kelabori me mangalamsiangneri kelabo sembe wali nenelamsil. Me mangalamsiikti, Yesusag sikne aro seneraglamikti, nimi o'ona senelamsiikti, Allahri senenne sunsunum uro ulamikti, wana mamleba wamik tanena kelabo wali wamukang.
