1 Timɔntee 2

1

2

3

4

5

6

¹Mɛketimɛ̀, n dɔ́ di mbɑ́ɑ́mmu Kuyie mbɛnìtìbɛ̀ bɛmɔu kpɛ́í, kɛ́ nkù bɑ̀ɑ́ nkɛ kù mɔ̀ú di kpɑ dɛ̀, kɛ kù sɑ̃ntí,

²kɛ́ nkù bɑ̀ɑ́ mbɛkpɑ̀ɑ̀tìbɛ̀ kpɛ́í nnɛ̀ bɛ̀ɛ̀ bɑkɛ́ bɛmɔu bɛ kpɛ́í kɛ̀ ti mbo bɑ̀mmùù kɛ̀ dikɔnkɔɔ̀nnì bɑ́ mbo, kɛ̀ ti nkù tũ nkɛ kù dé kɛ dɔɔri kù dɔ́mɛ̀.

³Kuyie mmɛ ndɔ́, kunku kùù tu ti dɛɛtíwè.

⁴Kù dɔ́mu bɛnìtìbɛ̀ bɛmɔuu cootɛ́, kɛ yĩ́ɛ̃́tɛ́ timɔ́mmɔnti.

⁵Kuyie mbo kumɑ́ɑ̀ ndi, wèè tɑ̀unko Kuyie nnɛ̀ bɛnìtìbɛ̀ kòò bo omɑ́ɑ̀, weè tu Yesu Kirisi wèè tùótɛ́ tinitikɔ̃̀ntì.

⁶Wèè duɔ́ nhomɑ́ɑ̀ kɛ nɑɑ́ ntiyeti kɛ̀ bɛ̀ ò kùɔ kòò bo dɛɛtɛ́ bɛnìtìbɛ̀ bɛmɔu. Kuyie mmɔ̀nnì diì do tùɔ̀kɛ kòò mɛ̀ dɔ̀ɔ̀.

⁷Kuyie nkuù n tɑ̃ɑ̃tɛ́ kɛ n dɔ̀ɔ̀ ku tɔ̃nnì, kɛ̀ m bo nɑ́kɛ́ bɛ̀ɛ̀ í tú Sifubɛ timɔ́mmɔnti kɛ̀ bɛ̀ ntɑ̃́ Kuyie. N nɑ́ɑ́ mmɔ́mmuɔ nwe, n yí soú.

⁸N dɔ́ bɑ́ wè wè mbɑ́ɑ́ nKuyie nhò berínɛ̀ kɛ̀ɛ̀ bíɛ́kɛ̀ nɛ̀ o yɛ̀mmɛ̀ mɛmɔu ndi, kɛ dò mpɑ́íí kɛ bɑ́ mmɔkɛ mɛkpɑ̀rìyɛ̀mmɛ̀ yoo kɛmiɛkɛ.

⁹Bɛnitipòbɛ̀ níí nyi tiyɑ̀ɑ̀tì mɛsɑ̀ɑ̀, bɛ̀ bɑ́ nwɑnti idíítí ikperí kpɛti nɛ̀ mɛfĩmmɛ mɛsɔɔ nkɔ̃mɛ nɛ̀ yɛtootɔ̃rɛ nɛ̀ mɛdɛ̀ì nkɛ pɑ̃ɑ̃tì tiyùtì kɛ bo bɛnkɛ bɛmɑ́ɑ̀.

¹⁰Bɛ kó tisɑ̃tì ntú bɛ̀ bo ndɔɔrimɛ̀ mɛsɑ̀ɑ̀ nkɛ dé Kuyie.

¹¹Onitipòkù níí nkémmú itié mbɛ́u, kɛ́yie nyì yɛ̃ mmù.

¹²N yí dɔ́ onitipòkù ntiè nhonitidɔ̀ù yoo wè nhò bɑkɛ́.

¹³Kɛ yɛ̃́ Kuyie nketɛ́ kɛ dɔ̀ɔ̀mɛ̀ Adɑmmu nwe kɛ dèntɛ Ɛfu.

¹⁴Dɛ̀ í tú Adɑmmu nwe dibɔɔ̀ soutɛ́mɛ̀, Ɛfu nwe dì soutɛ́mɛ̀, kòò yetɛ Kuyie nkpɛti.

¹⁵Kuyie nnɛ́ yóó dɛɛtɛ́mu onitipòkù ò mɔ̀kɛ dìì mɔ̀nnì ibí, kɛ̀ nsɑ̀ nkòò kù tɑ̃́ kɛ kù dɔ́, kɛ kpɑ mɛyɛi, kòo yɛ̀mmɛ̀ wenni.