1Oo8e nitam ka 8i ikido8an, panima ki aiamietama8aiakonig kakina a8iagog, e pagosenimaiak Kije Manido kidji minadjin ka nodesendjin, e k8ag8edjimaiak Kije Manido kidji ca8enimadjin, acitc mig8etc e inaiak 8ina8a odji.
2Kida aiamietama8ananag ogimag, acitc kakina ka nigani8adj, kidji gi pimadiziak ka iji pekadendag8ag, e manadjiaiak Kije Manido acitc e mino inakamigiziak.
3Mi ii8e men8acig acitc eji min8endag Kije Manido ka Ag8aciminak,
4ka nda8endag kakina a8iagon kidji ag8acimagani8indjin acitc kidji ani kikendamindjin teb8e8ini.
5Kije Manido mega pejigo eta, acitc pejigo a8iag nena8idj e tedj, kidji 8idjiadjin Kije Manidon acitc a8iagon kidji koki mama8 mino 8idji8idindjin, mi 8aa Jesos Christ, ka pi anicinabe8iidizodj.
6Ki pagidenimidizo kakina a8ian kidji gi ag8acimadjin. Mi oo 8edji kikendjigadeg Kije Manido e nda8enimadjin kakina a8ian kidji ag8acimagani8indjin. Ki ani kikendjigade dac maia apitc Kije Manido ka iji nda8endagiban.
7Nin dac, nigi onabamig kidji tibadjimo8an omin8adjimo8in acitc Jesos Odanodaganan kidji inagimigo8an. Teb8e nidikidonan, ka8in nikagina8ickisi. Nigi onabamig kidji kikinoama8ag8a ega ka Coda8inni8i8adj, kidji gi teb8etamo8adj acitc kidji gi kikendamo8adj teb8e8ini.
8Ninada8enimag dac nabeg adigotc ka te8adj kidji aiamie8adj, acitc kidji paiekidee8adj apitc icpinikeni8adj kidji aiamie8adj. Ninada8enimag kidji poni kiji8azi8adj acitc kidji poni kaganondi8adj.
9Ik8e8ag dac, ninada8enimag 8e8enda kidji pitcikonae8adj, ega kidji kitci ozam ijinagoidizo8adj. Ka8in kada kitci ijiosibanig. Ka8in kada inendasibanig panima ki kitci mino tidibakizama8adj acitc e kitci sanaganigin okonasi8an acitc onabikadjigani8an kidji gi odji minojici8adj.
10Tiegodj ik8e8ag ka manadjia8adjin Kije Manidon, kabe kada mino todamog, mi iidi ke iji minonagozi8adj odjitcagoci8akag.
11Panima ega ki kido8adj ik8e8ag apitc kikinoamagozi8adj aiamiemigi8amikag, e pagidendizo8adj.
12Ka8in nipagidinasi8ag ik8e8ag kidji kikinoama8a8adjin naben acitc kidji niganizi8adj nabekag. Panima ega ki kido8adj.
13Kije Manido mega nitam Adaman ogi kijeniman acitc mina8adj Eban (ève) ogi kijeniman.
14Acitc madji manido ka8in ododji 8aiejimasin Adaman. Ik8e sa dac 8in nitam ka 8aiejimagani8idj. Misa dac ik8e nitam kagi ana8eta8agobanen Kije Manidon.
15Anic dac ik8e8ag kada odabinodjijimi8ag. Midac kada ag8acimagani8i8ag, kicpin kabena teb8etamo8adj, sagia8adjin a8iagon, acitc paiekidee8adj, e nagadjiidizo8adj enakamigizi8adj.
