1Mangav tut ešeb (peršo), hoj pes te keren o modľitbi, o mangipena the o modľitbi vaš avrenge the o paľikeribena vaš savore manuša.
2A modľinen tumen the vaš o kraľa the vaš savore autoriti, hoj te dživas andro smirom cicho dživipen andre savoro sentňipen the pačivaľiben,
3bo kada hin lačho the šukar anglo Del amaro Spasiťeľis,
4savo kamel, hoj savore manuša te aven zachraňimen a te prindžaren o čačipen.
5Bo hin ča jekh Del a hin ča jekh, savo ačhel maškar o Del the maškar o manuša, o manuš Ježiš Kristus,
6savo počinďa peskere dživipnaha, hoj te cinel avri savoren, a o Del amenge ada sikaďa andro spravno časos.
7Vašoda somas me ačhado sar o apoštolos the kazaťeľis, o učiťeľis le Nažidenge, hoj lenge te vakerav pal o pačaben the čačipen. Vakerav čačo, na klaminav!
8Vašoda kamav, hoj pes o murša te modľinen pre dojekh than a te hazden o sentna vasta bi e choľi the vesekedišagos.
9Avke the o džuvľa pes mi uren šukares, avke sar kampel, žužipnaha the zľikeribnaha, jednoduche uchaňibnaha, bi o somnakaj, perli abo barikane gada,
10ale mi šukaľaren pes le lačhe skutkenca, avke sar oda kampel te kerel le džuvľenge, save phenen, hoj lašaren le Devles.
11E džuvľi cichones mi sikľol savora pokoraha.
12La džuvľake na domukav te sikavel, aňi te ľidžal le muršes, ale mi avel čhit.
13Bo o Adam sas stvorimen ešebno a paľis e Eva.
14Aňi o sap na klaminďa le Adam, ale la džuvľa; oj kerďa o binos.
15Ale e džuvľi ela zachraňimen prekal oda, hoj anela pro svetos le čhavoren, te ačhela andro pačaben, kamiben, sentňipen the zľikeriben.
