1Qui lë ni naꞌ le nac blau ruchiziaꞌ icj naggac bunách nac ca ral‑laꞌ ulidzruꞌ‑nëꞌ Dios len ca ral‑laꞌ gátaꞌyuruꞌ lahuëꞌ, len ca ral‑laꞌ gnabruꞌ lahuëꞌ bi rquíniruꞌ, len ca ral‑laꞌ guiëruꞌ‑nëꞌ: Xclenuꞌ. Yuguꞌ lë ni ral‑laꞌ gunruꞌ uláz quegac yúguꞌtë bunách.
2Lëzcaꞌ cni ral‑laꞌ gunruꞌ uláz quegac nup taꞌná bëꞌ, len quegac yúguꞌtë nup nacgac blau. Cni ral‑laꞌ gunruꞌ quië gac dxiꞌa queëruꞌ len gac queëruꞌ yöl‑laꞌ rböz dxíꞌadauꞌ. Ral‑laꞌ gunruꞌ cni lu yöl‑laꞌ rejlëꞌ queëruꞌ Dios len lu yöl‑laꞌ baꞌa ladxiꞌ queëruꞌ.
3Lë ni nac dxiꞌa len le rdzag ladxëꞌë Dios, Nu ruslá rëꞌu.
4Dioscz rëꞌnnëꞌ lulá yúguꞌtë bunách len rëꞌnnëꞌ lunbëꞌ le nac gdutë li.
5Tuzëꞌ naquëꞌ Dios, len tuzëꞌ bönniꞌ ruúnëꞌ dzag Dios len bunách. Nu ni nac Jesucristo, Nu böac bunách.
6Lëczëꞌ budö́d cuinëꞌ lu yöl‑laꞌ gut, le gdizxjnëꞌ qui dul‑laꞌ nabágaꞌgac yúguꞌtë bunách. Dios benëꞌ lnaꞌ lau queëꞌ catiꞌ bdxin dza queëꞌ gutiëꞌ.
7Ca nac lë ni, Dios buzóëꞌ nedaꞌ quië gunaꞌ lban qui, len gacaꞌ gbaz nasölëꞌë Cristo, quië usë́dgacdaꞌ bunách gzaꞌa ca nac le réjlëꞌruꞌ Cristo len ca nac le nac gdutë li. Blítedaꞌ len cutu caꞌ rziꞌ yëꞌa.
8Naꞌa, rëꞌndaꞌ lulidzëꞌ Dios bönniꞌ, látaꞌyuëꞌ lahuëꞌ gátiꞌtëz, nacquëꞌ gdu dxiꞌa, len culaꞌleynëꞌ lzaꞌquëꞌ, len culaꞌdíl‑l dídzaꞌquëꞌ.
9Lëzcaꞌ cni, rëꞌndaꞌ lácunu ngul le nac baꞌa. Le nac lach le ral‑laꞌ luluiꞌnu lahui nac yöl‑laꞌ nöxj ladxiꞌ len le nac gdu ladxiꞌ, len clëg le tuꞌpaꞌznu icj laucnu len oro, len yuguꞌ bga, len lariꞌ záquiꞌtsqui.
10Yuguꞌ le dxiꞌa tunnu luluíꞌ lahui le naccnu ca naꞌ run le tácunu le nac baꞌa. Cni ral‑laꞌ lunnu ngul núnbëꞌcnu Dios.
11Ral‑laꞌ laꞌcuaꞌnu dxiz ngul catiꞌ nu rusëdi lecnu len laꞌcuaꞌnu nöxj.
12Cutu runnaꞌ latj ngul lusë́dinu len culaꞌná béꞌinu bönniꞌ. Ral‑laꞌ laꞌcuaꞌnu dxiz ga nudubgac bunách queëꞌ Cristo.
13Cni ral‑laꞌ gac, le buzóëꞌ Dios ziꞌal Adán, atiꞌ gdöd naꞌ buzóëꞌ‑nu Eva.
14Adán naꞌ, cutu gzxiꞌ yeꞌi lëꞌ tuꞌ xöhuiꞌ, san ngul queëꞌ, gzxiꞌ yeꞌi lënu. Cni guc, gditsjnu zxba queëꞌ Dios,
15san ulanu ngul ruzoanu‑biꞌ biꞌidauꞌ chquiꞌ gúntecznu ca rajlö́z le réjlëꞌruꞌ Dios len yöl‑laꞌ nadxíꞌi, len chquiꞌ gacnu gdu dxiꞌa len gdu ladxiꞌ.
