1No bâbâni dâŋ moc gaza qâmoc epe: Nunumu wâwâsic â daŋge mumuteŋ izi ŋaŋacne â ŋic gâcne sasawa dopec‐jopahuc
2ŋicwofuŋ â kia gawaman mâmâc dopec‐jopanʒepieŋ. Eme soŋaŋ‐nâpohapie wamao mâteŋne â mitine juhâmopene ŋiczi mana‐nârepie fezejec.
3Izi biaŋkeocmu, â bâbâpiaŋ‐nâŋec Anutu e irec maname sâckeocmu.
4Eki ŋic mâmâc sasawa biaŋkerâ dâŋ fâri qizecne mana maŋ eniŋte muekac hâcne.
5Anutu mocjaha hâcne junârekac, erâ Anutu â ŋic ŋondeŋ‐nâŋecko ŋicwirec‐nâŋec mocjaha Jesu Kristo e ŋic ekicnezi junâre‐fârekac.
6Eki hâcne juju‐ticne qikiŋnehuc mâmâc sâko kiwiric‐nâŋec rowec, irec biŋezi dameŋ‐ticnao haŋ baocte.
7No irec biŋe mumu â aposolo jupemurâ râecnukicne, erâ ŋic qâpuc dâŋ fâri qizecne â mamanasiŋte fuŋne jaza mutâc epemurâ qaqazu gie munarekicne. Dâŋ i burec mâcne, jâmbomac mukopac.
8Ŋic jaŋere mukopac, jaŋe hae sâc aaric â maŋjahec tâmiric juhuc mejeŋic ɋaɋacne foha Anuturao sicnerâ numunʒerpieŋ.
9Â ŋokac jaŋere mukopac, jaŋe ŋaqi aickerâ rojuhuc rume rume jupie izi eri‐jeŋic ezejec, â qizec susuc‐jeŋicko mâsi qâreŋ ee, me eri wiac furi sâko qoqonaŋ, me ŋaqi hohonebâcne ro juju ine mi enʒepieŋ.
10Ŋokac mitio juzo muŋgopieŋzi eehâmo gie bapie sâckeocmu.
11Ŋokac jaŋe wahamicne juhuc niniŋkerâ hazec râehuc mamana gie banʒepieŋ.
12Ŋokaczi qaqazu gie baocte me ŋic qâhuc‐jopaocte mi manacnekopac, e mâc rumerâ juzejec.
13Adam e bâbâni bâfuakicne â Ewa ine ʒâhec.
14Adam e eesaic rune mi manacnewec, ŋokaczi ine manacnerâ qaqatara bâfuawec.
15Ŋokaczi motec roro‐ticnere biaŋkeocmu, ine mamanasiŋhec â maŋjauŋhec erâ maŋɋaɋac juniŋmu ŋokac i jaŋe iŋuc hâcne eniŋmu.
