GALESIA 6

1

2

3

4

5

6

¹Sike mate notnabam! Aminu gikat nana tapatuta sanga wai takngatu tasiwan kakengu ginu Waung Kapata danipakunggak aminda waapae musipza kwikwiknga natangamuke itane musia tapa nomatayok. Ginu waapae natake ginda gisae tagwauke sanga wai ita tasikut takngane pimanam ngang natake gatangamunong.

²Ngan. Ginu meyaaknga notzata kaning kakngae natake gatayamunong. Sike aminu unzingu notna gatayamiu waapata mama wamu Kraisda tawake yanikut taknga tawake tasinggak kapa unin.

³Siakan. Aminu tapatuta notna gatayamunangge dua natake ita inane musiaatang apiapit wam yawiu waapata kem natake aminu moo amin binga dakngake yuwik.

⁴Siwan ginu kuupbam inandek inandek sanga ginda tasikaing kaknga gisa usanzike natapnong. Usanzike notzatane sangae dua natake ginda gisa usanzike natapa take siwanu ginda apbaknganong. Ginu notzatane sanga aknga kake gindane sanga akngasa ma usanziwam.

⁵Dasingge? Aminu kuupbamda sanga atasikaing kaknga inandek inandek usanzike natapanu asikaya tapatutane waiakngana wena siwik ba dasing? Aho. Kuupbamda inane waiaknganae atnatapning.

⁶Siwan aminu Anututane wamu gin danikapmakaingu gindane sangasa dua kotnake wa amindane gupna gatayamunanga aknga ginda ayamunong.

⁷Sike ginda kemu ma natapam. Aminu tapatuta Anutu kem tanzike ininanga dua. Aho. Sanga aminda tasiwik kaknga buya asaawan buya waakngakan tapik.

⁸Ngan. Aminu tapatuta sanga inane musia enaya akngae natanggamatake tasiwanu sanga waaknga buya aake ita aminu waapa atasiwan maiwik. Ngana aminu tapatuta katewan Waung Kapata waapa initakuwan sukuwiu ita akupanu Waungga gatu tangenake gatangaman ita kayuk asinggan asinggan yuwik.

⁹Siwan ninu kepi nomana akngane sukuke kwatan ngang natake dua bitatenim. Ninda semna dua natakengu tapduknga Anututa tekut gwene ninu buya waaknga atanim.

¹⁰Unzingge ninda tapduu notnin gatayamunanga gwene yuamang. Yuke aminu Jesue natapa kekekawan itane donga dakngakaing amin gatayamunim. Wa amikat gatu aminu kuupbamu kuut gatayamunim.

¹¹Nata leta buyambam daka daka nata ninae katakngata a matanggat daka daka kake ginda atnatapning. Na Pol. Nata pas asanu ginde matandamunggat.

¹²Aminu wa gin danindamuke gindane gupza Mosesdane mama wam tawake matanangge yakaingge natake nata daniwit. Wa aminu umana buyambam siknga aminu kundue kaine tanangge natake ginu gupza mataningge danikaing. Wa aminda natake aminbamda ninu pasiwa mainam ngang natake wamu Kraisda ninde tangge amin saamdakane kungwanimukut taknga takusopuke ginda sanga waakngae gepbiatang yutningge dua danikaing.

¹³Ngan. Aminda Mosesdane mama wam tawake gindane gupza matananga akngae danikaingu wa aminda mama wamu waaknga katak siknga dua tawake tasikaing. Aho. Ginda wa amin kapewa gindane gupza matake gin papa ginu Judia nana binga daknganing. Dakngawa wa aminda sanga waakngae umana buyambam tanangge natake danikaing.

¹⁴Ngana na. Nata sanga takngatu nata nina tasikum takngae baknganangge asiknga bitanggat. Nata Buyambam tapaninu Jesu Kraisde natake ita ninde tangge amin saamdakane kungwanimukut takngaekan natake apbakngawit. Sanga waakngata tasike sanga kepdakane nana tupa nata ie apbakngakum taknga tanguwan kumbut. Tanguwan kupan nata sanga waaknga gatukande tekum. Unzing aminu amin saamdakane kumbut tapata sanga kepdakane nana tupa ie apbakngakut taknga gatukande teke yuak binga nata sanga wa kuupbam gwa pekum.

¹⁵Sike na atnataat. Aminda gupna matawa kake Anututa natapan sanga moo singgak. Siwan aminda gupna dua matakingu Anututa wa aminde dua bitanggak. Ngana Waung Kapata tasiwan ninu musipmin tana tekwamban aminu inata kundu dakngake yuamang kakngata gataniman ninda Anutue nomune gitna yutnim.

¹⁶Siakan. Aminu kuupbam Anututane amina siknga dakngake natdetdeu waaknga gitna pake tawake tasikaingu wa aminde Anututa musia kwikwiknga natayamuke wa aminda butaya natayamikge natake nata wamu waaknga daninggat.

¹⁷Siwan aminu gikat nana tapatuta natane umana gatu dua tasiwan maiwan. Dasingge? Nata Jesue puya tasike yuwawa asikaya aminda na nuwa kupitde tasike na nukinggane gupmane gwaiknga wena ba dasing?

¹⁸Mate notnabam! Nata ginde natake Buyambam tapaninu Jesu Kraisda ginde musip kwikwik natandamikge take siknga nataat. Unukan.