Galatiya 6

1

2

3

4

5

6

¹Ta ishato! Issi asi nagara ooththi bettikko inte qas Ayanan lo7o dizayti iza ashiketethara zaaranas bessees; gido attin nekka izade mala paacetonta mala ne hu7es naageta.

²Inte issoy issa deexxo tooho tookkite; hessa mala ooson Kirstoosa woga poleeta.

³Issadey aynne hanonta dishe bana gitasiza misatikko hessadey barka bana baleththes.

⁴Issi issi asi ba ooso barka paaci xeello. Hessafe guye hara asara bana ginasonta dishe izi bana ceeqqisizazi demmana.

⁵Issi issi asi barka ba tooho tookkanas bessees.

⁶Qaala tamarizay oonikka ba tamarida lo7o miisha ba astamarezara gishetto.

⁷Baletofte Xoossi qilica erenna. Asi ba zeridaro izo zaari maxana.

⁸Ba asho amo kunthanas zerizadey ashoppe dhayssi maxana. Ayana ufayssanas zeridadey gidikko ayanappe merna de7o maxana.

⁹Ane nu lo7o ooso ooththanas azallokko; nu ufaysi qanxonta agikko wodey gakkishin gakkida kath nu maxana.

¹⁰Hessa gish nuus dandayettikko asa ubbas harappeka ammaniza asas ane lo7o ooththoos.

¹¹Tani ta kushera intes ay mala gita pidalen xaafidakkone ane xeellite.

¹²Coo kare baggara bettana koyiza asati inte qaxxarettana mala wolqathana koyeettes. Isti hessa ooththizay Kirstoosa masqale gish giidi goodetonta malassa.

¹³Isti inte qaxxarettana mala koyizay inte ashon ceeqqettanas koyiza gish attin qaxxaretidayti woga naagizayta gidettenna.

¹⁴Qasse alamey taas; takka alames; kaqettida Goda Yesus Kirstoosa masqalenppe attin haran ceeqoy taappe haakko.

¹⁵Qaxxaretin woykko qaxxaretonta aggin izas go7ay baawa. Go7ay ooratha medheteth gideththa.

¹⁶Hayssa ha azazoza kaalliza ubbatasinne Xoossa dere gidida Isra7eele asatas sarotethinne maaroteth gido.

¹⁷Tani Yesusa malata ta asatethan tookkadis; hessa gish ha7i tana oonikka waaysenna.

¹⁸Ta ishato! Goda Yesus Kirstoosa aadho kiyatethi intenara gido! Amiin.